އިތުރު ދެ އަހަރު އާސެނަލްގައި މަޑުކުރަން ނިންމައި، އާސެން ވެންގާ އެއްބަސްވުމުގައި ސޮއިކޮށްފިއެވެ.
އާސެނަލްގައި 2019 ވަނަ އަހަރުގެ ނިޔަލަށް މަޑުކުރާނެކަން އެ ކްލަބުން ކަށަވަރުކޮށްދީފައިވާއިރު، އާސެނަލް އިން މި ގޮތަށް ނިންމީ އެ ކްލަބުގެ މެޖޯރިޓީ ޝެއާ ހޯލްޑަރ ސްޓާން ކޮރެންކޭއާ އެކު ބޭއްވި ސިއްރު ބައްދަލުވުމަކަށްފަހު ކަމަށް ގޯލްޑޮޓްކޮމް އިން ވަނީ ބުނެފައެވެ.
އާސެނަލްގައި މަޑުކުރަން ނިންމުމަށްފަހު އެ ކްލަބުގެ ރަސްމީ ވެބްސައިޓަށް ދިން އިންޓަވިއުއެއްގައި އޭނާ ބުނީ އާސެނަލް އަކީ ވަރަށް ލޯބިވާ ކްލަބެއް ކަމަށާއި، އަދިވެސް ކްލަބަށް ކާމިޔާބީތަކެއް ހޯދައިދޭން ބޭނުންވާ ކަމަށެވެ.
ފާއިތުވެދިޔަ 20 ސީޒަންގައި ޕްރެމިއަރ ލީގުގެ ގަދަ ހަތަރަކުން ޖާގަ ހޯދަމުން އަންނަ އާސެނަލްއަށް މިފަހަރު ޖާގަ ނުލިބުމަކީ ވަރަށް ބޮޑު ވެއްޓުމެއްގެ ގޮތުގައި ވެންގާ ސިފަކުރެއެވެ.
އެގޮތުން ވެންގާ ބުނީ އަންނަ ސީޒަނުގެ ޗެމްޕިއަންސް ލީގުގައި ކުޅުމުގެ ފުރުސަތު ގެއްލުމަކީ ބޮޑު ވެއްޓުމެއް ކަމަށެވެ.
ވެންގާ ބުނީ ގިނަ މެޗުތަކެއް ކުޅެންޖެހުނީ ވަރަށް ގޯސް މާހައުލެއްގައި ކުޅުންތެރިން ވެސް ޕްރެޝަރުގައި ތިބެގެން ކަމަށެވެ. އެހެންވެ ނަތީޖާ އެގޮތަށް އައުމަކީ އެކަށީގެންވާ ކަމެއް ކަމަށެވެ.
ޗެމްޕިއަންސް ލީގަށް ކޮލިފައި ނުވުމަކީ ބޮޑު ވެއްޓުމެއް ކަމަށް ވެންގާ އެއްބަސް ވިނަމަވެސް އޭނާ އަމިއްލައަށް އާސެނަލް ދޫކޮށްލައިފި ނަމަ އެ ޓީމަށް އުނދަގޫ ހާލަތެއް ކުރިމަތިވެދާނެ ކަމަށް ވެންގާ ބުނެއެވެ.
އާސެނަލް ކޯޗުކަމާ 1996 ވަނަ އަހަރު ހަވާލުވުމަށް ފަހު ވޭތުވެދިޔަ 21 އަހަރު ދުވަހުގެ ތެރޭގައި ވެންގާ ވަނީ އެ ޓީމަށް ތިން ފަހަރެއްގެމަތިން ޕްރިމިއާ ލީގާއި ހަ ފަހަރު މަތިން އެފްއޭ ކަޕް ކާމިޔާބުކޮށްދީފައެވެ.
