ދެ އިންިތިހާބު އެއްކުރުމާއި ދެކޮޅަށް އެމްޑީޕީ އިން މަގުމައްޗަށް ނުކުމެ ރައްޔިތުންނަށް އުއްމީދެއް ދޭންޖެހޭ: ރާއީ

ލޯކަލް ކައުންސިލް އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށް ބޭއްވުމަށް ސަރުކާރުން ކުރަމުންދާ މަސައްކަތްތަކާ ދެކޮޅަށް އެމްޑީޕީން މަގުމައްޗަށް ނުކުމެ، ރައްޔިތުންނަށް އުއްމީދެއް ދޭންޖެހޭ ކަމަށް މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވިދާޅުވެއްޖެ އެވެ.

ރާއީ މިފަދައިން ވިދާޅުވީ އެމްޑީޕީގެ ގައުމީ މަޖިލީހުގެ ބައްދަލުވުމުގައި ވާހަކަ ދައްކަވަމުންނެވެ.

ގައުމީ މަޖިލީހުގެ ބައްދަލުވުމުގައި ވާހަކަ ދައްކަވަމުން ރާއީ ވިދާޅުވީ، އެމްޑީޕީ ފަދަ ބޮޑު ޕާޓީއަކުން ހަމައެކަނި ގަރާރުތައް ހުށަހަޅައި، އެއްޗެހި ފާސްކުރުމަށްވުރެ އެ ޕާޓީގެ ޒިންމާ މާ ބޮޑު ކަމަށެވެ. އަދި މިހާރުން މިހާރަށް ޕާޓީން ނިންމަންޖެހޭ ނިންމުމަކީ މަގުމައްޗަށް ނުކުމެ ހަރަކާތްތައް ފެށުން ކަމަށާއި، އިތުރަށް ކޮމިޓީތައް ހަދައި ވަގުތު ބޭކާރު ކުރަން ނުޖެހޭ ކަމަށް އޭނާ ވިދާޅުވި އެވެ. އެމްޑީޕީއަކީ ދިވެހި ރައްޔިތުންގެ އުއްމީދުތަކާ ގުޅިފައިވާ ޕާޓީއަކަށް ވާއިރު، ރައްޔިތުންގެ ހައްގުގައި މަގުމައްޗަށް ނުކުތުމަކީ ޕާޓީގެ މައްޗަށް އޮތް ވާޖިބެއް ކަމަށްވެސް ރާއީ ފާހަގަކުރެއްވި އެވެ.

ދެ އިންތިޚާބު އެއްކުރާ ވާހަކަ މި ދައްކަނީ. އެއީ ރައްޔިތުން އެންމެ މަދުން ވޯޓުލާ އިންތިޚާބު. ކައުންސިލު އިންތިޚާބަކީ ރާއްޖޭގެ ރައްޔިތުން އެންމެ މަދުން ވޯޓުލާ އިންތިޚާބު. ތިން އިންތިޚާބު ތެރޭ، ރައްޔިތުންގެ މަޖިލިސް، ރިޔާސީ އިންތިޚާބު. މިއީ އެންމެ މަދުން ވޯޓުލާ އިންތިޚާބު. އޭގައި މި ދައްކަނީ، އޭގެންނެއް ސާފެއް ނުވާނޭ ކޮބައިކަމެއް ރައްޔިތުން ބޭނުންވާ ގޮތެއް. އެހެންވީމާ، އަޅުގަނޑުމެން ބޮޑުކޮށް ނޫނެކޭ ބުނަން، މަގުމައްޗަށް ނިކުންނަންވީ. އަޅުގަނޑުމެންނާ މެދު ދިވެހިރާއްޖޭގެ ރައްޔިތުން މާޔޫސްވުމުގެ ކުރިން އެ ބޭފުޅުންނަށް އުއްމީދެއް ދޭންވީ. އެމް.ޑީ.ޕީގެ މެންބަރުންނަށް އުއްމީދެއް ދޭންވީ. 

މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ 

ރާއީ އިތުރަށް ވިދާޅުވީ، ރައްޔިތުންގެ މަޖިލީހުގެ ތެރެއިން މިހާރު މަސައްކަތް ކުރެވެން ނެތް ކަމަށާއި، މަޖިލީހުގައި ތިއްބެވި އެމްޑީޕީގެ 12 މެންބަރުންނަށް އެ ފުރުސަތު ސަރުކާރުން ބަންދުކޮށްފައިވާ ކަމަށެވެ. ރައްޔިތުން މިހާރު ތިބީ މާޔޫސްވެފައި ކަމަށާއި، އެ މީހުންނަށް އުއްމީދެއް ދެވެން އޮތީ އެމްޑީޕީން މަގުމައްޗަށް ނުކުމެގެން ކަމަށް އޭނާ ވިދާޅުވިއެވެ. އަދި މިރެއިން މިރެއަށް މުޒާހަރާތައް ފެށުމަށް ގޮވާލައްވައި، އެފަދަ ހަރަކާތްތައް ހިންގުމުގެ ހަކަތަ އެމްޑީޕީގައި ހުންނާނެ ކަމަށް ރާއީ ވިދާޅުވި އެވެ.

ރާއީ ވަނީ ކައުންސިލް އިންތިޚާބަށް ކުރާ ކެމްޕޭނަށްވުރެ ބޮޑު ކެމްޕޭނެއްގެ ގޮތުގައި މި ހަރަކާތް ކުރިއަށް ގެންދިއުމަށް ގޮވާލައްވާފަ އެވެ. ރަށްރަށުން ކައުންސިލަރުންނާއި އާންމު މެންބަރުން މާލެ އަރައި، ސަރުކާރާ ދެކޮޅަށް އަޑުއުފުލަންޖެހޭ ކަމަށާއި، އެހެންނޫންނަމަ ރައީސް މުއިއްޒު ބޭނުންހާ ގޮތަކަށް ކަންކަން ކުރައްވައި، ވައްކަމާއި ކޮރަޕްޝަން އިތުރުވެގެންދާނެ ކަމަށް ރާއީ ވިދާޅުވި އެވެ.