ދެ އިންތިޚާބު އެއްކޮށްލުމަށް ނޫނެކޭ ބުނުމަށް އެމްޑީޕީ އިން ފާސްކޮށްފި
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ގާނޫނުއަސާސީއަށް ބަދަލު ގެންނަން ސަރުކާރުން މަސައްކަތް ކުރަނީ ރައްޔިތުންގެ ބަސް ހޯދުމެއް ނެތި އަވަސްއަރުވާލައިގެން ކަމަށް އެމްޑީޕީން ތުހުމަތުކުރޭ. މިކަމާ ގުޅޭގޮތުން ނަގާ ފެންނަ ނުފެންނަ ވޯޓުގައި އެ ބަދަލާ ދެކޮޅަށް ވޯޓު ދިނުމަށް އެ ޕާޓީގެ ގައުމީ މަޖިލީހުން ވަނީ އިއްތިފާގުން ފާސްކޮށްފަ.
އެމްޑީޕީ ގައުމީ މަޖިލީހުގެ ބައްދަލުވުމުގެ ތެރެއިން | ރާއްޖެ އެމްވީ
ކުރިއަށް އޮތް ލޯކަލް ކައުންސިލް އިންތިހާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ވޯޓުގައި އެކަމަށް ނޫނެކޭ ބުނުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ގައުމީ މަޖިލީހުން ފާސްކޮށްފި އެވެ.
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ހުށަހަޅުއްވާ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ތާއީދުކުރައްވާފައިވާ އެ ގަރާރު ގައުމީ މަޖިލީހުން ފާސްކޮށްފައި ވަނީ ރިޔާސަތު ހިމެނޭހެން 49 މެމްބަރުންގެ އިއްތިފާގުންނެވެ.
މީކާއިލް ހުށަހެޅުއްވި ގަރާރުގައި ވަނީ ރާއްޖެ ފަދަ ޑިމޮކްރެޓިކް އުސޫލުން ހިންގާ ދައުލަތެއްގައި ރައްޔިތުންނާއި ގުޅުން ހުރި މިފަދަ މުހިންމު ކަންކަމުގައި ރައްޔިތުންގެ ޚިޔާލު ދެނެގަތުމަށް ނުވަތަ ރައްޔިތުންގެ ބަސް ހޯދުމަށް މަޝްވަރާ ކުރުމަކީ މުހިންމު ކަމެއް ކަމަށެވެ. ނަމަވެސް ޤާނޫނުއަސާސީ ބަދަލުކުރުމަށް މަޖިލީހަށް ހުށަހެޅުމުގެ ކުރިން ރައްޔިތުންނާއި މަޝްވަރާ ނުކުރާކަން ވަނީ ފާހަގަކޮށްފަ އެވެ.
ޤާނޫނުއަސާސީ އަށް ބަދަލު ގެނެސް ބިލު ދިރާސާ ކުރުމަށާއި ބިލާއި މެދު މަޝްވަރާކުރުމަށް އެކަށީގެންވާ ވަގުތާއި ފުރުސަތު ދިނުމުގެ ބަދަލުގައި އަވަސް އަރުވާލައިގެން ބިލު ފާސްކުރުމަށް މަސައްކަތް ކުރި ކަމަށް މީކާއިލް ވިދާޅުވި އެވެ. އަދި ސަރުކާރުން އަމާޒު ހިފާފައި ވަނީ އެ ދެ އިންތިޚާބު އެއްކޮށްލަން ކަމަށް ވާއިރު ކައުންސިލް އިންތިޚާބާއި އެކު ރިފަރަންޑަމް އެއް ނެގުމަކީ ރައްޔިތުންނަށް މައުލޫމާތު ދިނުމަށާއި ހޭލުންތެރިކުރުމަށް އަދި ކެމްޕެއިން ކުރުމަށް އެކަށީގެންވާ މުއްދަތެއް ނޫން ކަމަށް ވަނީ ބުނެފަ އެވެ.
ހަަމައެހެންމެ އެއްވެސް ސިޔާސަތެއް، ހަރުދަނާ ވިސްނުމެއް އަދި ސީދާ މަގްސަދެއް އަދި ރޭވުންތެރިކަމެއް އޮވެގެން ކުރާ ކަމެއް ނޫން ކަމަށް މީކާއިލް ވިދާޅުވި އެވެ. އެ ގަރާރު ފާސްކުރީ އިންތިޚާބު އެއްކޮށްލަން ނޫނެކޭ ބުނުމަށް ގެނައި އިސްލާހާއި ވެސް އެކުގަ އެވެ. އެއީ ކެންދޫ ދާއިރާގެ މެމްބަރު މައުރޫފް ޒާކިރު ހުށަހެޅުއްވި އިސްލާހެކެވެ.
