ނ.ކެނދިކުޅުދޫ ޕޮލިސް ސްޓޭޝަންގެ މަސައްކަތް ކުރިއަށް ނުދޭ: "ތަނުގެ ކުރެހުން ވީ ހިސާބެއް ވެސް ނޭނގޭ"
16 ފެބުރުއަރީ 2026 | ހޯމަ 11:30ނ. ކެނދިކުޅުދޫގައި އާ ޕޮލިސް ސްޓޭޝަނެއް އެޅުމަށް ބޮޑު ބިމެއް ހަމަޖައްސައި ދީފައިވީ ނަމަވެސް، އެ މަސައްކަތް ހަވާލުކޮށްފައިވާ އެމްޓީސީސީއަށް މަޝްރޫއުގެ ތަފްސީލާއި ކުރެހުންތައް ނޭނގޭތީ ކައުންސިލުން ވަނީ ކަންބޮޑުވުން ފާޅުކޮށްފަ.
ދާ ސަރަހައްދުގައި ކައުންސިލްގެ ނައިބު ރައީސް ހަސަން މުހައްމަދު، ނ.ކެނދިކުޅުދޫ ޕޮލިސް ސްޓޭޝަންގެ މަސައްކަތް ކުރިއަށް ދާ ގޮތުގެ މައުލޫމާތު ދެއްވަނީ. | ރާއްޖެ އެމްވީ
ނ.ކެނދިކުޅުދޫ އާޕޮލިސް ސްޓޭޝަންގެ މަސައްކަތް އެއްވެސް ވަރަކަށް ކުރިއަށް ނުދާ ކަމަށާއި އެ ތަނުގެ ކުރެހުން ވީ ހިސާބެއް ވެސް ނޭނގޭ ކަމަށް އެ ރަށުގެ ކައުންސިލް އިން ބުނެފި އެވެ.
ކެނދިކުޅުދޫ ކައުންސިލްގެ ނައިބު ރައީސް ހަސަން މުޙައްމަދު ރާއްޖެޓީވީ އަށް މައުލޫމާތު ދެއްވަމުން ވިދާޅުވީ އެ ޕޮލިސް ސްޓޭޝަންގެ މަސައްކަތް ހަވާލުކޮށްފައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީ އަށް އެ ތަނުގެ މަސައްކަތާއި ގުޅޭ ތަފްސީލްތައް ނޭނގޭ ކަމަށެވެ. އަދި އެ ތަނުގެ ކުރެހުމާއި ގުޅޭ ގޮތުން އެމްޓީސީސީ އިން ސުވާލުކުރަނީ ކައުންސިލާއި ކަމަށް އޭނާ ވިދާޅުވި އެވެ.
"އަޅުގަނޑުމެންނަކަށް ނޭނގެ މި ތަނުގައި އަޅަނީ 1 ބުރީގެ ތަނެއް ކަމެއް، 2 ބުރީގެ ތަނެއް ކަމެއް. ބިން ހަވާލުކޮށްފައި މި އޮތީ. މަސައްކަތް ކުރިއަކަށް ނުދޭ." އޭނާ ވިދާޅުވި އެވެ.
ހަސަން ވިދާޅުވީ، ކެނދިކުޅުދޫ ކައުންސިލަކީ ސަރުކާރުން ކުރާ މައްކަތްތަކަށް ފުރިހަމަ އަށް އެއްބާރު ލުން ދޭނެ ކައުންސިލެއް ކަމަށެވެ. އެގޮތުން ކެނދިކުޅުދޫ އަށް ބޭނުންވާ ފެންވަރުގެ ޕޮލިސް ސްޓޭޝަން ޤާއިމް ކުރުމަށް ކައުންސިލުން ހިލޭސާބަހަށް ބޮޑު ބިމެއް އެ ރަށުން ދީފައި ވާކަން އޭނާ ފާހަގަކުރެއްވި އެވެ. މީގެ އިތުރުން މިހާރު އެ ރަށުގައި ހުރި ޕޮލިސް ސްޓޭޝަނަކީ ވެސް ކައުންސިލުން އިމާރާތް ކޮށް ކަމާއި ގުޅުން ހުރި އިދާރާ އާއި ހަވާލުކޮށްފައިވާ ތަނެއްކަން އޭނާ ފާހަގަކުރެއްވި އެވެ.
"ކައުންސިލުން ހަދާފައި އެތަން ހަވާލު ކުރީ. ދެން އެ ތަނަށް ކޮންމެވެސް ވަރެއްގެ ކުއްޔެއް ދައްކަން ޖެހޭތީ އެ ބޭފުޅުން އެ ކަންބޮޑުވެ ވަޑައިގަންނަވަނީ. މާލޭގައި އިމާރާތް ހަދައިގެން، މިލިއަނުން ފައިސާ ދިނަސް އެއީ މައްސަލަ އެއް ނޫން. ރަށެއްގައި ކުޑަ އެއްޗެއް ދައްކަން ޖެހުނީމަ ބޮޑު ކަމަކަށް މި ވަނީ." ކެނދިކުޅުދޫ ކައުންސިލްގެ ނައިބު ރައީސް ހަސަން ވިދާޅުވި އެވެ.
އޭނާ އިތުރަށް ވިދާޅުވީ އާ ޕޮލިސް ސްޓޭޝަން އެޅުމަށް އެންމެ ފުރަތަމަ ކައުންސިލުން ދިނީ 5000 އަކަފޫޓުގެ ބިމެއް ކަމަށެވެ. ނަމަވެސް އެތަން ކުޑަ ވެގެން އެ ޝަކުވާ ކުރުމުން، 18،000 އަކަފޫޓުގެ ބިމެއް ކައުންސިލުން ވާނީ އެ މަސައްކަތަށް ހަމަޖައްސާދީފައި ކަމަށް ހަސަން ވިދާޅުވި އެވެ.
ކެނދިކުޅުދޫ ކައުންސިލުން އެދިފައި ވަނީ މަދުވެގެން 8 މީހުންނަށް މަސައްކަތް ކުރެވޭ ގޮތަށް އެ ރަށުގެ ޕޮލިސް ސްޓޭޝަންގެ އިންތިޒާމްތައް ހަމަޖައްސާ ދިނުމަށެވެ. އެ ރަށުގައި ފުލުހުންގެ ޚިދުމަތް ދޭން ފެށީ 2022 ވަނަ އަހަރެވެ.
