މިއަހަރު އަދި އެއްވެސް ވަރަކަށް ގްރީން ފަންޑްގެ ރިޕޯޓު ސަރުކާރުން ހާމަނުކުރޭ، ފެންނަމުން ދަނީ ސަރުކާރުގެ ޓްރާންސްޕޭރެންސީ ތިމާވެށި ކަންކަމުގައި ގެއްލޭ މިންވަރު: ސަރުވަޝް
3 އޮކްޓޯބަރު 2026 | ހޮނިހިރު 04:29މިއަހަރުގެ ގްރީން ފަންޑުގެ ރިޕޯޓުތައް ސަރުކާރުން ހާމަނުކުރާތީ ތިމާވެށީގެ މަޝްރޫއުތަކަށް ކުރާ ހޭދައިގެ ދެފުށް ފެންނަ މިންވަރު ކުޑަވަމުންދާ ކަމުގެ ކަންބޮޑުވުން ކުރީގެ ބަޖެޓު އެގްޒެކެޓިވް އަހުމަދު ސަރުވަޝް ފާޅުކުރައްވައިފި. ފަންޑުގައި 4.5 ބިލިއަނަށްވުރެ ގިނަ ރުފިޔާ ހުންނާނެ ކަމަށް ލަފާކުރެވޭއިރު، މި ފައިސާގެ ތަފުސީލުތައް ވީހާވެސް އަވަހަށް އާންމުކުރުމަށް އޭނާ ވަނީ ފިނޭންސް މިނިސްޓްރީއަށް ގޮވާލައްވާފައި
ފިނޭންސް މިނިސްޓްރީގެ ކުރީގެ ޗީފް ފައިނޭންޝަލް ބަޖެޓު އެގްޒެކެޓިވް އަދި ކުރީގެ ޕެންޝަން ބޯޑު މެންބަރު އަހުމަދު ސަރުވަޝް އާދަމް | އެމްޑީޕީ
މިއަހަރު އަދި އެއްވެސް ވަރަކަށް ގްރީން ފަންޑްގެ ރިޕޯޓު ސަރުކާރުން ހާމަނުކުރާ ކަމަށާއި، ފެންނަމުން ދަނީ ސަރުކާރުގެ ޓްރާންސްޕޭރެންސީ ތިމާވެށި ކަންކަމުގައި ގެއްލޭ މިންވަރު ކަމަށް ފިނޭންސް މިނިސްޓްރީގެ ކުރީގެ ޗީފް ފައިނޭންޝަލް ބަޖެޓު އެގްޒެކެޓިވް އަދި ކުރީގެ ޕެންޝަން ބޯޑު މެންބަރު އަހުމަދު ސަރުވަޝް އާދަމް ވިދާޅުވެއްޖެ އެވެ.
އެމްޑީޕީގެ ކޮންގްރެސް ތެރެއިން "ރަށްވެހި ތަރައްގީ" ގެ ނަމުގައި ބޭއްވި އިންވެސްޓްމަންޓް ފޯރަމްގެ ޕެނަލް ޑިސްކަޝަންގައި ވާހަކަދައްކަވަމުން ސަރުވަޝް ވިދާޅުވީ، ގްރީން ފަންޑްގެ ބޭނުމަކީ ގްރީން ޓެކްސްގެ ގޮތުގައި ނަގަމުން އަންނަ ފައިސާ ތިމާވެށީގެ މަޝްރޫއުތަކަށް ހޭދަކުރުން ކަމަށެވެ. އެގޮތުން، ކުރިން އެކަން ކުރަމުން އައީ ތިމާވެށި މިނިސްޓްރީ ތެރޭގައި ހިމެނޭ އިންފްރާސްޓްރަކްޗަރ މަޝްރޫއުތައް ހިމެނޭހެން ކަމަށް އޭނާ ވިދާޅުވި އެވެ.
ގްރީން ޓެކްސްގެ ގޮތުގައި ނަގަމުންދާ މިންވަރަށް ވުރެ ހަރަދު ކުރަމުންދާ މިންވަރު މަދުކަން ފާހަގަކުރެވިފައިވާ ކަމަށް ސަރުވަޝް ވިދާޅުވި އެވެ. 2025 ވަނަ އަހަރު ނިމުނުއިރު ގްރީން ފަންޑުގައި 3.5 ބިލިއަން ރުފިޔާ ހުރިކަން ސަރުވަޝް ވިދާޅުވި އެވެ.
ތިމާވެށީގެ ކަންކަން ނުކުރެވި ދިވެހިރާއްޖޭގައި އެބަހުރި، މިކަމަށް ފައިސާ ހުރީކީ ނޫން، ފަންޑުގައި އަޅުގަނޑުމެންނަށް ހަރަދުނުކުރެވި މިހުރީ، ތިމާވެށީގެ ކަންކަމަށް ހަރަދުކުރުމަށްޓަކައި ޖަމާކުރެވިފައި 3.5 ބިލިއަން ރުފިޔާ ސަރުކާރުން ކަނޑައަޅާފައިވާ ކަމަށް އެބަ ދަންނަވައޭ އެކަމަކު ހަރަދެއް ނުއެއް ކުރޭއަހުމަދު ސަރުވަޝް އާދަމް
ސަރުވަޝް ވަނީ ގްރީން ފަންޑްގެ ރިޕޯޓް ސަރުކާރުން މިއަހަރު މިހާތަނަށް އެއްވެސް މިންވަރަކަށް ހާމަނުކުރާ ކަމަށާއި އެންމެ ފަހުން ސަރުކާރުން ރިޕޯޓް ހާމަކޮށްފައި އޮތީ 2025 ވަނަ އަހަރު ޑިސެންބަރު މަހުގެ ތެރޭގައި ކަމަށް ސަރުވަޝް ވިދާޅުވި އެވެ.
ސަރުކާރުގެ ޓްރާންސްޕޭރަންސީ ތިމާވެށީގެ ކަންކަމުގައި ގެއްލޭ މިންވަރު ފެންނަމުން ދަނީ މިކަމާއި ތިމާވެށީގެ މިނިސްޓަރު އެއްޗެއް ވިދާޅު ނުވުމަކީ އަޅުގަނޑު ދެކޭ ގޮތުގައި ގޯހެއް. އަޅުގަނޑަށް ޔަގީން ތިމާވެށީގެ މިނިސްޓަރަށް ވެސް މިހާރު ނޭންގޭނެ ކިހާ ވަރެއް ކަމެއް ފަންޑުގައި ހުރީކީ ވެސް، އަދަދަކީ ކިހާ ވަރެއް ކަމެއް ވެސް ނޭނގެ އެނގޭނެ ކަމެއްއަހުމަދު ސަރުވަޝް އާދަމް
މިއަހަރު މިހާތަނަށް ގްރީން ޓެކްސްގެ ގޮތުގައި 1.6 ބިލިއަން ރުފިޔާ ލިބިފައިވާކަން ފާހަގަކުރައްވާ ސަރުވަޝް ވިދާޅުވީ ކޮންމެވެސް މިންވަރެއް ހަރަދު ކުރި ކަމަށް ބާލާފައި ވެސް 4.5 ބިލިއަން ރުފިޔާއަށް ވުރެ ގިނައިން ގްރީން ފަންޑްގައި ހުންނާނެ ކަން ޔަގީން ކަމަށެވެ.
މީގެ އިތުރުން، ސަރުވަޝް ވަނީ ވީ އެންމެ އަވަހަކަށް ގްރީން ފަންޑްގެ ރިޕޯޓް އަދި މަންތްލީ ރިޕޯޓް ވެސް ހާމަކުރުމަށް ފިނޭންސް މިނިސްޓްރީއަށް ގޮވާލައްވާފަ އެވެ.
