އޮގަސްޓް 13 ގެ ނިޔަލަށް އާމްދަނީއަށް ވުރެ އިތުރަށް 950 މިލިއަން ރުފިޔާ ޚަރަދުކޮށްފި

ފައިނޭންސް މިނިސްޓްރީން އާންމުކޮށްފައިވާ ހަފުތާގެ މާލީ ތަފާސްހިސާބުތަކަށް ބަލާއިރު، މި އަހަރުގެ އޮގަސްޓް މަހުގެ 13 ވަނަ ދުވަހުގެ ނިޔަލަށް ދައުލަތުން ކުރި ޖުމްލަ ޚަރަދު ވަނީ 28.1 ބިލިއަން ރުފިޔާއަށް ވުރެ އިތުރުވެފަ އެވެ. މިއާއެކު ދައުލަތުގެ ބަޖެޓުން މިހާތަނަށް 950.3 މިލިއަން ރުފިޔާގެ ޑެފިސިޓެއް ނުވަތަ ދަރަނި އުފެދިފައިވާކަން ރިޕޯޓުން ދައްކަ އެވެ.

މިއީ، 2025 ވަނަ އަހަރުގެ މި މުއްދަތުގައި ޚަރަދުވި 23.5 ބިލިޔަން ރުފިޔާއާ އަޅާބަލާއިރު، 19.3 އިންސައްތައިގެ އިތުރުވުމެކެވެ.

މި މުއްދަތުގައި ދައުލަތަށް އާމްދަނީ އާއި ހިލޭ އެހީގެ ގޮތުގައި 27.1 ބިލިއަން ރުފިޔާ ލިބިފައިވާ ކަމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިސަސް އިން ވަނީ ހާމަކޮށްފަ އެވެ. 

ދައުލަތަށް ލިބުނު އާމްދަނީގެ ތަފްސީލަށް ބަލާއިރު، އެންމެ ބޮޑު ބައެއް ހިއްސާކުރަނީ ޓެކްސް އާމްދަނީ އެވެ. އެގޮތުން ޓެކްސްގެ ގޮތުގައި 21.1 ބިލިއަން ރުފިޔާ ލިބިފައިވާއިރު، މީގެ ތެރޭގައި އެންމެ ބޮޑު އާމްދަނީއެއް ލިބިފައިވަނީ މުދަލާއި ޚިދުމަތުގެ އަގުން ނަގާ ޓެކްސް ނުވަތަ ޖީއެސްޓީންނެވެ. ޖީއެސްޓީގެ ގޮތުގައި 10.7 ބިލިއަން ރުފިޔާ ލިބިފައިވާއިރު، މީގެ ތެރެއިން ޓޫރިޒަމް ދާއިރާގެ ޖީއެސްޓީގެ ގޮތުގައި 7.2 ބިލިއަން ރުފިޔާ ވަނީ ލިބިފަ އެވެ. ޓެކްސް ނޫން އާމްދަނީގެ ގޮތުގައި 5.6 ބިލިއަން ރުފިޔާ ލިބިފައިވާއިރު، ހިލޭ އެހީގެ ގޮތުގައި 460.4 މިލިއަން ރުފިޔާ ވަނީ ލިބިފަ އެވެ.

ޚަރަދުތަކުގެ ތަފްސީލަށް ބަލާއިރު، ދައުލަތުގެ ހިންގުމުގެ ޚަރަދު ނުވަތަ ރިކަރަންޓް ޚަރަދުގެ ގޮތުގައި 24.5 ބިލިއަން ރުފިޔާ ވަނީ ހޭދަކޮށްފަ އެވެ. މީގެ ތެރޭގައި މުވައްޒަފުންގެ މުސާރަ އާއި އިނާޔަތްތަކަށް ކުރި 9.4 ބިލިއަން ރުފިޔާގެ ޚަރަދާއި، އިދާރީ އަދި ހިންގުމުގެ ޚަރަދުތަކަށް ހޭދަވި 15 ބިލިއަން ރުފިޔާ ހިމެނެ އެވެ. ހިންގުމުގެ ޚަރަދުތަކުގެ ތެރެއިން އެންމެ ބޮޑު ހޭދައެއް ކޮށްފައިވަނީ ސަބްސިޑީއަށެވެ. އެގޮތުން ސަބްސިޑީއަށް 3,5 ބިލިއަން ރުފިޔާ ހޭދަކޮށްފައިވާއިރު، އާސަންދައަށް 1.4 ބިލިއަން ރުފިޔާ ވަނީ ހޭދަކޮށްފަ އެވެ.

ތަރައްގީގެ މަޝްރޫއުތަކަށް ކުރާ ކެޕިޓަލް ޚަރަދުތަކަށް ބަލާއިރު، މި މުއްދަތުގައި ޖުމްލަ 3.6 ބިލިއަން ރުފިޔާ ވަނީ ހޭދަކޮށްފަ އެވެ. މީގެ ތެރެއިން އުމުރާނީ ތަރައްގީގެ މަޝްރޫއުތަކަށް 3.1 ބިލިއަން ރުފިޔާ ހޭދަކޮށްފައިވެ އެވެ. މީގެ ތެރޭގައި ބިން ހިއްކުމާއި އިމާރާތްކުރުމަށް ކުރި 1.2 ބިލިއަން ރުފިޔާގެ ޚަރަދާއި، މަގުތަކާއި ބްރިޖް އަދި އެއާޕޯޓް ތަރައްގީކުރުމަށް ކުރި 864.1 މިލިއަން ރުފިޔާގެ ޚަރަދު ހިމެނެ އެވެ. ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން އެންމެ ބޮޑު ހޭދައެއް ކޮށްފައިވަނީ އިގްތިސާދީ ދާއިރާގެ މަޝްރޫއުތަކަށެވެ.

ޕަބްލިކް ސެކްޓަރ އިންވެސްޓްމަންޓް ޕްރޮގްރާމް، (ޕީއެސްއައިޕީ) އަށް 3.6 ބިލިޔަން ރުފިޔާ ޚަރަދުވެފައިވާއިރު މިއީ، 2025 ވަނަ އަހަރު ޚަރަދުކުރި 5.2 ބިލިޔަން ރުފިޔާއާ އަޅާބަލާއިރު 30 އިންސައްތައިގެ ދަށްވުމެކެވެ.

ދައުލަތުގެ އިދާރާތަކުން ބަޖެޓް ބޭނުންކޮށްފައިވާ މިންވަރަށް ބަލާއިރު، އެންމެ ބޮޑު ހޭދައެއް ކޮށްފައިވަނީ މިނިސްޓްރީ އޮފް އެޑިއުކޭޝަން، ހަޔަރ އެޑިއުކޭޝަން އެންޑް ސްކިލްސް ޑިވެލޮޕްމަންޓުންނެވެ. އެ މިނިސްޓްރީން 3.2 ބިލިއަން ރުފިޔާ ބޭނުންކޮށްފައިވާއިރު، މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އާބަން ޑިވެލޮޕްމަންޓުން 2.4 ބިލިއަން ރުފިޔާ ވަނީ ބޭނުންކޮށްފަ އެވެ. މީގެ އިތުރުން ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން 2.1 ބިލިއަން ރުފިޔާ އަދި ފުލުހުންގެ ޚިދުމަތުން 1.6 ބިލިއަން ރުފިޔާ ވަނީ ބޭނުންކޮށްފަ އެވެ.

ދައުލަތުގެ ދަރަނީގެ ހާލަތަށް ބަލާއިރު، 2026 އޮގަސްޓް 10 ގެ ނިޔަލަށް ދައުލަތުން ވިއްކާފައިވާ ސެކިއުރިޓީޒްގެ ޖުމްލަ އަދަދު ވަނީ 99 ބިލިއަން ރުފިޔާ އަށް އަރާފަ އެވެ. މީގެ ތެރެއިން އެންމެ ބޮޑު ބައެއް ހިއްސާކުރަނީ ދިވެހި ރުފިޔާގެ ޓްރެޜަރީ ބިލްތަކެވެ. އެގޮތުން 41.4 ބިލިއަން ރުފިޔާގެ ޓީ-ބިލް ވިއްކާފައިވާއިރު، މީގެ ތެރެއިން ގިނަ އަދަދެއްގެ ފައިސާ ހިއްސާކުރަނީ ވިޔަފާރި ބޭންކުތަކުންނެވެ. މީގެ އިތުރުން 33.7 ބިލިއަން ރުފިޔާގެ ޓްރެޜަރީ ބޮންޑާއި 13.1 ބިލިއަން ރުފިޔާގެ ޔޫއެސް ޑޮލަރު ޓްރެޜަރީ ބޮންޑު ވެސް ހިމެނެ އެވެ.