ރައީސުލްޖުމްހޫރިއްޔާ ރިޔާސަތު ބަލަހައްޓަވާ ގަވަރނިންގ ކައުންސިލެއް އެކުލަވާލުމަށް ހިމަނާ ވަތަނީ ޚިދުމަތުގެ ބިލު މަޖިލީހަށް ހުށަހަޅައިފި
އުމުރުން 16 އަހަރާއި 28 އަހަރާ ދެމެދުގެ ޒުވާނުންނަށް އަމާޒުކޮށް ހިންގާ މި ޕްރޮގްރާމުގެ ސިޔާސަތުތައް ކަނޑައަޅާނީ ރައީސުލްޖުމްހޫރިއްޔާ އިސްވެ ހުންނަވާ ޚާއްޞަ ގަވަރނިން ކައުންސިލަކުން. މި ބިލުގެ މައިގަނޑު މަގްސަދަކީ ޔުނިފޯމް އެޅި ޚިދުމަތްތަކާއި އެ ނޫން ދާއިރާތަކުން ޒުވާނުންނަށް ތަމްރީނާއި ތަޖުރިބާގެ ފުރުސަތުތައް ފަހިކޮށްދީ، ޤައުމަށް ޚިދުމަތްކުރާނެ ޤާބިލް ޖީލެއް ބިނާކުރުން ކަމަށް ބުނެފައިވޭ.
ދިވެހި ވަތަނީ ޚިދުމަތް އިފްތިތާހު ކުރުމުގެ ރަސްމިއްޔާތުގެ ތެރެއިން | އެމްއެންޑީއެފް
ރައީސުލްޖުމްހޫރިއްޔާ ހިމެނިވަޑައިގަންނަވާ ގަވަރނިންގ ކައުންސިލެއް އެކުލަވާލުމަށް ހިމަނާ ވަތަނީ ޚިދުމަތުގެ ބިލު މަޖިލީހަށް ހުށަހަޅައިފި އެވެ.
ބިލުގައި ބުނެފައި ވަނީ ވަތަނީ ޚިދުމަތުގެ ޕްރޮގްރާމް ހިންގުމާއި ގުޅޭ ސިޔާސަތުތައް ކަނޑައަޅާނީ ގަވަރނިންގ ކައުންސިލުން ކަމަށެވެ. އެ ކައުންސިލްގައި ތިއްބަވާނީ ރައީސް އާއި ނައިބު ރައީސްގެ އިތުރުން ދާހިލީ ވަޒީރު، ފިނޭންސް މިނިސްޓަރ، ޗީފް އޮފް ޑިފެންސް ފޯސް އަދި ކޮމިޝަނަރ އޮފް ޕޮލިސް އެވެ. އެ ކައުންސިލްގެ ރައީސް އަކީ ވެސް ރައީސުލްޖުމްހޫރިއްޔާއެވެ.
މި ޕްރޮގްރާމްގެ ސިޔާސަތުތައް އެކުލަވާލުމަށް ލަފާދިނުމަށް ލަފާ ދޭ ކޮމިޓީ އެއް އެކުލަވާލުމަށް ވަނީ ހިމަނާފަ އެވެ.
މި ބިލަކީ ވަތަނީ ޚިދުމަތުގެ ޕްރޮގްރާމެއް ތައާރަފްކޮށް، ހަރުދަނާ ޤާނޫނީ އޮނިގަނޑެއްގެ ދަށުން އެ ޕްރޮގްރާމް ފަރުމާކޮށް ހިންގުމަށް އެކުލަވާލާ ބިލެކެވެ.
ސަރުކާރުގެ ފަރާތުން މި ބިލް ހުށަހަޅަނީ ދައުލަތުގެ ޔުނިފޯމް އެޅި ޚިދުމަތްތަކުގެ އަދި އެ ނޫން ދާއިރާތަކުގައި ޚިދުމަތް ކުރަން އެދޭ ޒުވާނުންނަށް އެ ފުރުސަތު ފަހިކޮށްދިނުމަށް ކަމަށް މި ބިލުގައި ވަނީ ބުނެފަ އެވެ. މީގެ އިތުރުން ޒުވާނުން ބާރުވެރިކުރުވާ، ޤައުމަށާއި މުޖުތަމައު އަށް ޒުވާން ޖީލެއް ބިނާކުރުމުގެ ގޮތުން ޤާބިލްކަން އަށަގެނެވުމަކީ ބިލުގެ މަގްސަދެއް ކަމަށް ބުނެފައި ވެ އެވެ.
މި ބިލުގައި ބުނެފައި ވަނީ އެ ބިލު ތައާރަފްކުރުމުގެ މަގްސަދަކީ ވަތަނީ ޚިދުމަތުގެ ދަށުން ހިމެނޭ ދާއިރާތަކުގައި ވަތަނީ ޚިދުމަތް ފޯރުކޮށްދިނުމަށް، ޖިސްމާނީ އަދި ފިކުރީ ޤާބިލްކަން އެ ފަރާތްތަކަށް ފޯރުކޮށްދިނުމަށް ވަތަނީ ޚިދުމަތުގެ ޕްރޮގްރާމް ތައާރަފްކޮށް ތައުލީމާއި، ތަމްރީނު އަދި ތަޖުރިބާ ފޯރުކޮށްދިނުން ކަމަށެވެ.
ވަތަނީ ޚިދުމަތުގެ ޕްރޮގްރާމްގައި އެކުލެވިގެންވާ ބައިތައް ވެސް އެ ބިލުގައި ހިމަނާފައި ވެ އެވެ. މި ޕްރޮގްރާމްގައި ބައިވެރިވެވޭނީ އުމުރުން 16 އަހަރާއި 28 އަހަރާއި ދެމެދުގެ ފަރާތްތަކަށެވެ.
