ކަމުންރެކި ކައުންސިލް ހޯދަން މުއިއްޒު ޖަހާ ބޮޑުމަޅި

ރިޔާސީ އިންތިޚާބު ކެމްޕޭނުގައި ވިދާޅުވަމުން ގެންދެވީ މަދުވަނީ ރައީސުލް ޖުމްހޫރިއްޔާ ކަމެވެ. ރައްޔިތުން ކުރަންވީ ކަމަކީ މުއިއްޒު ހޮވަންވީ އެވެ. އޭރުން އެނިމުނީ ކަމަށެވެ. ކުރީގެ ސަރުކާރުން ކަން ކޮށްފައި އޮތްގޮތުން އިގްތިސޯދީ ކިތަންމެ ދަށް ހާލަތެއްގައި އޮތަސް ވަރިހަމަ އެވެ. ކަން ކުރާނަމެވެ. ކުރާނެ ޕްލޭންތައް ހުރީ ނިމިފަ އެވެ. ބޭނުންވާ ފައިސާވެސް ހުރީ ހަމަޖެހިފަ އެވެ. ފައިސާ ދޭނެ މީހުންވެސް ތިބީ ތައްޔާރަށް ކަމަށެވެ. އިތުރު މަޝްރޫއުތައް ހިންގާ މުޅި ރާއްޖެ ބަދަލުކޮށްލާއިރު ލަސް ސްޕީޑުގައި ކުރިއަށްދާ ކުރީ ސަރުކާރުން ފަށާފައިހުރި ހުރިހާ ކަމެއްވެސް އެއަށްވުރެ މާ ބާރު ސްޕީޑްގައި ނިންމައިދޭނެ ކަމަށެވެ. އެކަމަށް ބޭނުންވަނީ ރައްޔިތުންގެ ވޯޓުން ރައީސުލް ޖުމްހޫރިއްޔާ ކަމަށް ހޮވައިދިނުމެވެ.

ވެރިކަމަށް ހޮވުމާއެކު ދެން ފެށީ އެހެން ލަވައެކެވެ. ކަން ކުރެވޭނީ ޖެއްސުން ނުކުރާނެ މަޖިލީހެއް އޮވެގެންނެވެ. ކަންކަން ކުރެވޭނީ ރައްޔިތުންގެ މަޖިލީހުގެ ކޮންޓްރޯލް ލިބިގެންނެވެ. ކަންކުރެވޭގޮތައް އެމަޖިލީހުން ބަޖެޓްވެސް ފާސްކޮށްގެން ކަމަށެވެ. އެވާހަކަ އަޑުއަހާފައި ރައްޔިތުން އަތްގުޅި ނުކާވަރުގެ ބޮޑު ކޮންޓްރޯލެއް މަޖިލީހުން ދިނީ އެވެ. އެއާއެކު އެހެން މީހަކަށް މުއިއްޒާ ދެކޮޅަށް ކުޑަބޭރުވެސް އަރާ ނުލެވޭވަރުގެ ބާރެއް ލިބުނީ އެވެ. ވެރިކަން ހިންގާނެ ގޮތަކަށް ހިންގާން ވެރިކަމުގައި ކުރާނެހާ ކަމެއް ކުރާން މުއިއްޒަށް މުޅި ގައުމު ލިބުނީ އެވެ.

އެބާރުގައި ކުރާނެހާ ކަމެއް ގެންދަވަނީ ކުރައްވަމުންނެވެ. ވެރިކަމަށް ފައްސިޔަޔަށް ހަދާނެ އެއްޗެއް އެގެންދަވަނީ ހައްދަވަމުންނެވެ. ގާނޫނު ތަކާއި، ސީދާ ގާނޫނުއަސާސީ އަށްވެސް ބަދަލު ގެންނަމުންނެވެ. ކުރާނެ ދަތުރެއްކޮށް ކަނޑާނެ މީހަކު ކަނޑާއި ވަޒީފާ ދޭނެ މީހަކަށް ވަޒީފާ ދެމުންނެވެ. އެބީދައިން ކަންކުރާތާ ދެއަހަރާ ގާތް ކުރީމާ އެބަހާލީ ކާފަގެ މަސްބެހުމަށް ޕްރޮޖެކްތަކެކެވެ. އަމިއްލައަށް ހޮވާނެ ބަޔަކު ހޮވައިގެން ނެގި ކުންފުނިތަކަކަށެވެ. ކަމެއް ނުކުރާތީއާއި ގާނޫނުގައި ބުނާ ޝަރުތުތައް ހަމަނުވާތީ އުވާލުމުގެ މަރުހަލާގައިވެސް ހުރި ކުންފުނިތަކެއް ހިމެނޭ ގޮތަށެވެ. ދާހާ ރަށެއްގައި އަޅާން ބޭނުން ތަނެއްގައި ބިންގާވެސް އެޅީ އެވެ. ބިންގާ މަތީގައިވެސް ބިންގާ އެޅީ އެވެ. ފުޓްބޯޅަ ދަނޑުތަކާއި ވޮލީ ކޯޓުތަކުގެ މަތީގައިވެސް އިތުރަށް ދަނޑާ ކޯޓުވެސް އަޅަން ނިންމީ އެވެ. ވައުދުމައްޗަށް ވައުދުވެސް ވީ އެވެ. ނުފުއްދުނު ވައުދުގެ ވާހަކަ ރައްޔިތުން ދެއްކީމާ އެވައުދު އިތުރަށް ތިންގުނަ ކޮށްފައި އަނެއްކާ ވެސް ވައުދުވެ ނެގީ އެވެ. މާ ބޮޑެތި މަޝްރޫއުތަކެކޭ ހިތާ ކުރިން ގެނެސްފައިހުރި އޭޓީއެމްތަކެއް ބަހައްޓައި ރިބަން ދަމަދަމާފައިވެސް ކެނޑީ އެވެ.

އެކަމަކު ހައްދަވައިގެން ކަމެއް ނުކުރެވުނު ތާނގައި ކުރިން ކުރަމުން އައި ކަންކަން ވެރިކަން ބަދަލުވުމާއެކު ހުއްޓުނުގޮތައް ހުއްޓި ހުރީ އެވެ. ރަށްރަށުގައި ބޮޑު ރަސްމިއްޔާތުގައި ފެށި ކަންކަން އެހިސާބުގައި މަޑުޖެހުނު ގޮތަށް ހިރިވެސް ނުލަ އެވެ. އެޅި ބިންގާތަކަށް ފަސްއެޅި ފޮރުވުނުއިރު އަލިކުރި ބިންތަކުގައި ވިނަފަޅައި އެތަންތައް ގަސް ބޯވެ ވާވެސް ވީ އެވެ. ކައުންސިލް އިންތިޚާބާ ކުރިމަތިލާން އެޖެހުނީ މިހާލަތުގައެވެ. މައްޗަށް ނާރާނެ ކަމުގެ ޔަގީންކަން ދީފައި އޮތް ޑޮލަރު 20 ރުފިޔާއިން މައްޗަށް ގޮސް ތަކެތީގެ އަގު ބޮޑުވެ ރައްޔިތުން ރަތަށް އަރާފައި ވަނިކޮށެވެ.

ކޮންމެއަކަސް މޮޅު ހިންތާއެއްކޮށް ރަށްރަށުގައި މަޝްރުއުތައް ނުހިނގުން އެކަނޑާލީ ކައުންސިލަރުންގެ ބޮލަށެވެ. އެވެރިން ތަން ނުދީގެންނެވެ. ރަށްރަށުގައި ހިންގާން ބުނި ޕްރޮޖެކްޓައް ނުހިނގަނީ ކައުންސިލްތަކުން އެއްބާރުލުން ނުދީގެންނޯލަ އެވެ. ކަންކުރާނެ ތަނެއް ނުދީގެންނޯލަ އެވެ. ކައުންސިލްތަކުގެ މެޖޯރިޓީހޯދަން މާ ދުރާލާ އެޖެއްސެވީ ބޮޑު މަޅިއެކެވެ. ކަމުން ރެކި އެވެރިންގެ ބޮލަށް ޖެއްސެވިއިރު ހަގީގަތް ދިމާއަށް ފެންނާން އޮތްކަމެއް ހަނދުމަފުޅަކު ނެތެވެ. ކައުންސިލްތަކަށް މުއިއްޒު ވިދާޅުވިއްޔާ ވިދާޅުވިހާ ކަމެއް ނޫނީ ނުކުރެވޭއިރު އެވެރިން ތަނެއް ނުދެއްކިއްޔާ ހެދޭނެ ގޮތަށް ގާނޫނުވެސް ބަދަލު ގެނެސްފައިވާކަންވެސް ހަނދުމަފުޅަކު ނެތެވެ. ހިތުން ކަމުންރެކި ކައުންސިލް ހޯދަން ޖެހި ބޮޑު މަޅީގައި އަމިއްލައަށް ބެދުނީ އެވެ. ބެދޭމަޅި ނުފެންނާނެޔޭ ބުނާ ބީދައިން ރުވި މަޅިއަށް އަމިއްލައަށް އެރި ނިމުނީ އެވެ.