ގައްޒާފީގެ ދަރިކަލުން ސައިފުލް އިސްލާމް ގައްޒާފީގެ ޖަނާޒާގައި އެތައް ހާސް ބަޔަކު ބައިވެރިވެއްޖެ

ލީބިޔާގެ ކުރީގެ ލީޑަރު މުއައްމަރުލް ގައްޒާފީގެ އެންމެ ނުފޫޒު ގަދަ ދަރިކަލުން ސައިފުލް އިސްލާމް ގައްޒާފީގެ ޖަނާޒާގައި އެތައް ހާސް ބަޔަކު ބައިވެރިވެއްޖެ އެވެ.

ސައިފުލް އިސްލާމް ގައްޒާފީގެ ހަށިކޮޅު ހުކުރު ދުވަހު ވަޅުލާފައި ވަނީ، ލީބިޔާގެ ވެރިރަށް ޓްރިޕޮލީއާ ގާތް ގަނޑަކަށް 175 ކިލޯ މީޓަރު ދުރުގައި އޮންނަ ބަނީ ވަލީދުގަ އެވެ. 

މީގެ ގާތް ގަނޑަކަށް 15 އަހަރު ކުރިން، 2011 ވަނަ އަހަރު ނޭޓޯގެ އެހީތެރިކަމާ އެކު ގެނައި އިންގިލާބެއްގައި މުއައްމަރުލް ގައްޒާފީ އަވަހާރަކޮށްލި ފަހުން، އޭނާގެ އާއިލާ އަށް ތާއީދު ކުރާ ގިނަ އަދަދެއްގެ ބަޔަކު ވަނީ ހުކުރު ދުވަހު އޮތް ސައިފުލް އިސްލާމް ގައްޒާފީގެ ޖަނާޒާގައި ބައިވެރިވެފަ އެވެ. ސައިފުލް އިސްލާމް ގައްޒާފީ އަކީ އެއް ދުވަސް ވަރެއްގައި ވެރި ކަމުގެ ވަލީ އަހުދު ކަމަށް ގިނަ ބަޔަކު ޤަބޫލު ކުރި ފަރާތެވެ. 

ސައިފުލް އިސްލާމް ގައްޒާފީ އަވަހާރަ ކޮށްލާފައި ވަނީ މިދިޔަ އަންގާރަ ދުވަހުގެ ވަގުތެއްގަ އެވެ. އެއީ ލީބިޔާގެ ހުޅަނގު އުތުރުގެ ސިޓީއެއް ކަމަށްވާ، ޒިންތާންގައި ހުންނަ އޭނާގެ ގެކޮޅުގެ ބަގީޗާއެއްގައި ހުންނަވަނިކޮށެވެ. އޭނާގެ އޮފީހުން ނެރުނު ބަޔާނެއްގައި ބުނެފައި ވަނީ، އޭނާ އަވަހާރަ ކޮށްލާފައި ވަނީ ގެއަށް ވަދެގަތް ހަތިޔާރު އެޅި، ގޮތް ނޭނގޭ ހަތަރު މީހަކު ވެގެން ކަމަށެވެ. 

ލީބިޔާގެ އެޓަރނީ ޖެނަރަލްގެ އޮފީހުން ބުނެފައިވާ ގޮތުގައި، އުމުރުފުޅުން 53 އަހަރުގެ ސައިފުލް އިސްލާމް ގައްޒާފީގެ ހަށިގަނޑު ތަހުގީގު ކުރި ފޮރެންސިކް ޑޮކްޓަރުން ވަނީ އޭނާ އަވަހާރަވީ ބަޑީގެ ހަމަލާ ތަކުގެ ސަބަބުންކަން ކަށަވަރު ކޮށްދީފަ އެވެ. އޭނާ އަވަހާރަ ކޮށްލަން ހަމަލާ ދިން މީހުން ހޯދުމުގެ މަސައްކަތް ކުރިއަށް ގެންދަމުންނެވެ. 

ޖަނާޒާގައި ބައިވެރިވުމަށް 300 އެއްހާ ކިލޯ މީޓަރު ދުރުގައި އޮންނަ ސިރުތުން އައި އުމުރުން 33 އަހަރުގެ އަންހެނަކު ބުނެފައި ވަނީ، އެ މީހުން އެ ތަަނަށް އައީ، އެ މީހުންގެ އުންމީދުތަކާ ގުޅިފައިވާ ލީޑަރުގެ ދަރިކަލުންނަށް އެންމެ ފަހުގެ އިޙުތިރާމް އަދާ ކުރުމަށް ކަމަށެވެ. 

ބައްޕަގެ 40 އަހަރުވީ ވަރުގަދަ ވެރި ކަމުގެ އެއްވެސް މަގާމެއްގައި ސައިފުލް އިސްލާމް ގައްޒާފީ ނެތް ނަަމަވެސް، އޭނާ ަކީ ޑި ފެކްޓޯ ބޮޑު ވަޒީރުގެ ގޮތުގައި ގިނަ ބަޔަކު ދެކުނު ފަރާތެވެ. އޭނާ ވަނީ ލީބިޔާ އިން ފަނާ ކުރަނިވި ހަތިޔާރު ދޫކޮށްލުމަށާއި، 1988 ވަަނަ އަހަރު ލޮކާބީ ބޮން ގޮއްވާލުމުގެ ހާދިސާގައި މަރުވި މީހުންގެ އާއިލާ ތަކަށް ބަދަލު ދިނުމުގެ މަޝްވަރާ ތަކުގައި އިސް ދައުރެއް އަދާ ކުރައްވައިފަ އެވެ.