ޖަރމަނީގެ މުސްލުމުންނާއި ދެކޮޅު ޕާޓީގެ އިސް ބޭފުޅަކު އިސްލާމްވެ، ޕާޓީ ދޫކުރައްވައިފި

ޖަރުމަންވިލާތުގެ ކަނާތު ފިޔައިގެ އޮލްޓަރނޭޓިވް ފޮރ ޖަރމަނީ (އޭ.އެފް.ޑީ) އަށް ނިސްބަތްވާ އިސް ބޭފުޅަކު އިސްލާމްވެ، އެޕާޓީގެ އިސް މަޤާމެއް ދޫކޮށްލައްވައިފިއެވެ.

އޭ.އެފް.ޑީ އަކީ އިސްލާމްދީނާއި ދެކޮޅުކަމަށް މަޝްހޫރު ޕާޓީއެކެވެ. އަދި ޖަރުމަންވިލާތް ނަޞާރާ ޤައުމެއްގެ ގޮތުގައި ބާއްވަން ބާރު އަޅާ އޭ.އެފް.ޑީ އަކީ އެޤައުމަށް މެދުއިރުމަތިންނާއި އެފްރިކާއިން މީހުން ހިޖުރަކުރުމާއި ވަރަށް ދެކޮޅު ޕާޓީއެކެވެ. އެޕާޓީއިން ވަނީ ނިމިދިޔަ އަހަރު ސެޕްޓެމްބަރު މަހު އޮތް ޖަރުމަންވިލާތުގެ ފެޑެރަލް އިންތިޚާބުގައި ރަނގަޅު ކާމިޔާބެއް ހޯދައި، ޤާނޫން ހަދާ މަޖިލީހުގެ 12.6 އިންސައްތަ ގޮނޑި ކާމިޔާބުކޮށްފައެވެ. ޤާނޫނު ހަދާ މަޖިލީހުގެ ގޮނޑިތައް ކާމިޔާބުކުރުމަށްފަހު އެންމެ ފުރަތަަމަވެސް އެޕާޓީއިން ހުށަހެޅި ބިލަކީ ޖަރުމަންވިލާތަށް ހިޖުރަކުރާ މުސްލިމުންނަށް އެމީހުންގެ އާއިލާތައް އެޤައުމަށް ނުގެނެވޭނެ ގޮތް ހެދުމެވެ.

އިސްލާމްވެ، އޭ.އެފް.ޑީއާއި ވަކިވީ ޖަރުމަންވިލާތުގެ ބްރެންޑެންބަރގްގައި އޭ.އެފް.ޑީގެ އިސް ރޯލެއް އަދާކުރައްވަމުން ގެންދެވި އާތަރ ވެގްނަރއެވެ. ވެގްނަރ އަކީ 2015 ވަނަ އަހަރުން ފެށިގެން އޭ.އެފް.ޑީގެ ޙަރަކާތްތެރި މެމްބަރެކެވެ.

ވެގްނަރ ޕާޓީ ދޫކޮށްލެއްވިކަން އެޕާޓީއިން ވަނީ ޖަރުމަންވިލާތުގެ މީޑިއާއަށް ކަށަވަރުކޮށްދީފައެވެ. އެހެން ނަމަވެސް އެކަމާއި ބެހޭ ގޮތުން މީޑިއާއާއި ވާހަކަ ދައްކަވަން ވެގްނަރ ބޭނުންފުޅެއް ނުވެއެވެ.

އިސްލާމް ދީނާއި އެހާ ދެކޮޅު އަދި މުސްލިމުން ޖަރުމަންވިލާތަށް ވަނުން މަނާކުރުމަށް ގޮވާލަމުން ދިޔަ ޕާޓީއެއްގެ އިސް ބޭފުޅަކު އިސްލާމްވުމުން ގިނަ ބަޔަކު ދަނީ އެކަމާއި ބެހޭ ގޮތުން ސޯޝަލް މީޑިއާގައި ވާހަކަ ދައްކަމުންނެވެ. ބައެއް މީހުން ވެގްނަރގެ ނިންމުމަށް މަރުހަބާ ކިޔަމުންދާއިރު، އަނެއް ބަޔަކު ދަނީ ވެގްނަރ އަށާއި އިސްލާމް ދީނަށް ފާޑުކިޔަމުންނެވެ.

އޭ.އެފް.ޑީ އަކީ ދާދިފަހުން ޖަރުމަންވިލާތުގެ ސިޓީއެއްގެ ފުލުހުން ޢަރަބި ބަހުން އައު އަހަރުގެ ތަހުނިޔާ ސޯޝަލް މީޑިއާގައި ކީ މައްސަލައިގައި ފުލުހުންނަށް ފާޑުކިޔަން ފެށި ޕާޓީއެވެ.