ކީރިތި ރަސޫލާ ﷺ ގެ ހަދީޡްފުޅުތައް ދިރާސާކޮށް، ހަދީޡްފުޅުތަކާއި ބެހޭ 'ފަހުބަސް' ބުނާ އިދާރައެއް އުފެއްދުމަށް ސައުދީ އަރަބިއާގެ ރަސްގެފާނު، ސަލްމާން ބިން ޢަބްދުލްއަޒީޒް އަލް ސައުދުގެ ޤަރާރަކުން އަމުރުކުރައްވައިފިއެވެ.
އަންގާރަ ދުވަހު ސައުދީ ރަސްގެފާނު ނެރުއްވި ޤަރާރުގައި ހަތަރު ކަމެއް ކުރުމަށް އަމުރުކުރައްވާފައިވާއިރު، މި ޤަރާރުގައި ވަނީ، އިސްލާމީ ޝަރީޢަތާއި އެ ޝަރީޢަތުގެ މަސްދަރުތަކަށް ސައުދީން ކޮށްދެމުންދާ އަގުހުރި ޚިދުމަތުގެ ދަށުން، ކީރިތި ރަސޫލާ ﷺ ގެ ހަދީޡްފުޅުތަކާއިބެހޭ ސައިންޓިފިކް ދިރާސާކޮށް، ހަދީޡްފުޅުތަކާއިބެހޭ އެކިއެކި ހޯދުންތައް ހޯދައި، ހަދީޡްފުޅުތައް ގިންތި ކޮށް، ހަދީޡްފުޅުތަކާއިބެހޭ ނިންމުންތައް ނިންމާނެ އިސް އިދާރާއެއް ޤާއިމް ކުރުމުގެ މުހިއްމުކަން ދެކޭ ކަމަށެވެ.
މި ޤަރާރުގައި އަމުރުކޮށްފައިވާ 4 ކަމަކީ:
- "ކީރިތި ރަސޫލާ ﷺ ގެ ހަދީޡްފުޅުތަކަށްޓަކައި ދެ ހަރަމުގެ ބެލެނިވެރިޔާ، ރަސްގެފާނު ސަލްމާން ބިން ޢަބްދުލްއަޒީޒް އަލް ސައުދުގެ އިދާރާ" ގެ ނަމުގައި އިދާރާއެއް ޤާއިމްކުރުން.
- ދުނިޔޭގައި ތިބި ހަދީޡް އާއި ބެހޭ އިސް އިލްމުވެރިން ހިމެނޭ ސައިންޓިފިކް ކައުންސިލެއް މި އިދާރާގައި އުފެއްދުން. މި ކައުންސިލުގެ ރިޔާސަތާއި މެންބަރުން އައްޔަން ކުރާނީ ސަލްމާން ރަސްގެފާނުގެ ޤަރާރަކުން އެމަނިކުފާނު.
- މި އިދާރާގެ ޗެއާމަނަކަށް، އިސް އިލްމުވެރިންގެ ކައުންސިލްގެ މެންބަރު ޝައިޚް މުޙައްމަދު ބިން ހަސަން އަލް ޝައިޚް އައްޔަންކުރުން
- ކަމާއިބެހޭ އިދާރާތަކާއި އެހެނިހެން ފަރާތްތަކަށް މި ކަމާއިބެހޭ އަމުރުތައް ފޮނުވުން
ސައުދީ ރަސްގެފާނު މިފަދަ އިދާރާއެއް އުފައްދަވަން ނިންމެވިއިރު، މިއީ އިސްލާމީ ދުނިޔެ އަލް ސައުދު އާއިލާގެ ބާރުގެ ދަށަށް ގެންދިއުމަށް އެ އާއިލާއިން ކުރަމުންދާ މަސައްކަތަށް އިތުރުކުރި ބޮޅެއް ކަމަށް ބުނެ ބައެއް ފަރާތްތަކުން ދަނީ މި އަމުރަށް ފާޑުކިޔަމުންނެވެ.
