ވަން ޑައިރެކްޝަންގެ މެންބަރުންގެ އާ އުފެއްދުންތަކެއް އެއްފަހަރާ އާންމުންނަށް!

މަޝްހޫރު ބޭންޑް "ވަން ޑައިރެކްޝަން" ގެ ކުރީގެ ލަވަކިޔުންތެރިން އާ މިއުޒިކެއް ނުރެމަށް ސަޕޯޓަރުން އިންތިޒާރު ކުރާތާ ގިނަ ދުވަސްތަކެއް ވެފައި ވަނިކޮށް، އެ ބޭންޑުގެ ހަތަރު މެންބަރަކު މިވަނީ ގާތްގާތުގައި އާ އުފެއްދުންތަކެއް އާންމުންނަށް ދޫކޮށްލާފަ އެވެ.

މިދިޔަ ހަފުތާގައި ހެރީ ޓައިލްސް އާއި ލުއީ ޓޮމްލިންސަން މިއުޒިކް ޗާޓުތަކުގެ ކުރި ހޯދާފައި ވަނިކޮށް، ޒެއިން މާލިކް މިހާރު ވަނީ އޭނާގެ ފަސްވަނަ ސްޓޫޑިއޯ އަލްބަމް އިއުލާންކޮށްފަ އެވެ.

އެ އަލްބަމް ނެރުމަށް ހަމަޖެހިފައިވަނީ އަންނަ އޭޕްރިލް މަހު ކަމަށް ވިޔަސް، އޭގެ ކުރިން އޭނާ ވަނީ އަލްބަމްގެ ލީޑް ސިންގަލް "ޑައި ފޯ މީ" އާންމުންނަށް ދޫކޮށްލައި، ދުނިޔޭގެ އެކި ކަންކޮޅުތަކުގައި ބާއްވާ ވޯލްޑް ޓުއާއެއް ވެސް އިއުލާންކޮށްފަ އެވެ.

މީގެ އިތުރުން، ނިއަލް ހޯރަން ވެސް ވަނީ 2025 ވަނަ އަހަރުގެ ބްރިޓްސް ރައިޒިންގް ސްޓާ ކާމިޔާބުކުރި މައިލްސް ސްމިތާ ގުޅިގެން "ޑްރައިވް ސޭފް" ނަމަކަށް ކިޔާ އާ ލަވައެއް ނެރެފަ އެވެ.

ރޯލިންގް ސްޓޯން މެގަޒިންއިން "އިހުސާސްތަކުން ފުރިގެންވާ" ލަވައެއްގެ ގޮތުގައި ސިފަކޮށްފައިވާ ޒައިންގެ "ޑައި ފޯ މީ" އަކީ އޭނާގެ އާންމު ސްޓައިލް ކަމަށްވާ އާރް އެންޑް ބީ އަށް ބިނާކޮށްފައިވާ ޕޮޕް މިއުޒިކެކެވެ.

މިއީ 2024 ވަނަ އަހަރު އޭނާ ނެރުނު "ރޫމް އަންޑަ ދަ ސްޓެއާސް" އަލްބަމްގެ މަޑުމައިތިރި މިއުޒިކާ ތަފާތު ލަވައެކެވެ. މި ލަވައިގެ ތެރޭގައި "މަގޭ ހިތް ކަލެއަށް ދީފީމެވެ، އެއަށް ދެރައެއް ނުދޭށެވެ،" ފަދަ އަސަރުގަދަ ލިރިކްސް ހިމެނެއެވެ.

ނަމަވެސް، ޒެއިންގެ އާ އަލްބަމަށް ދީފައިވާ ނަމުގެ ސަބަބުން، އޭނާގެ މިއުޒިކަށް ބޮޑު ބަދަލެއް އަތުވެދާނެ ކަމަށް ބައެއް ސަޕޯޓަރުން އުންމީދު ކުރެ އެވެ.

ޒެއިންގެ އަމިއްލަ ވެބްސައިޓުގައި "ކޮންނަކޯލް" (Konnakol) ސިފަކޮށްފައިވަނީ އަނގައިން ތަފާތު އަޑުތައް ލައްވައިގެން މިއުޒިކް އުފެއްދުމުގެ ފަންނެއްގެ ގޮތުގަ އެވެ.

މިއީ ދެކުނު އިންޑިއާގެ ކާނާޓިކް ނުވަތަ ކްލެސިކަލް މިއުޒިކުގައި ބޭނުންކުރާ އުކުޅެކެވެ. މީގައި ވަކި ސިލަބަލްތަކެއް ނުވަތަ ބަސްތަކެއް ތަކުރާރުކޮށްގެން ޑްރަމް ޖަހާ ފަދަ އަޑުތަކެއް އުފައްދަ އެވެ.

އިނގިރޭސިވިލާތުގެ ބްރެޑްފޯޑަށް އުފަން ޒެއިން ބުނާ ގޮތުގައި "ކޮންނަކޯލް" އަކީ މިހާތަނަށް އޭނާގެ ސަގާފީ ނުފޫޒު އެންމެ ބޮޑަށް އެކުލެވޭ މަސައްކަތެވެ. ނަމަވެސް މިއީ އޭނާގެ މިއުޒިކުގައި ދެކުނު އޭޝިއާގެ އަސަރުތައް ހިމެނި ފުރަތަމަ ފަހަރެއް ނޫނެވެ.

އޭނާގެ 2016 ވަނަ އަހަރުގެ ފުރަތަމަ އަލްބަމްގައި ހިމެނޭ "ފްލާވާ" ލަވައިގައި އުރުދޫ ބަހުން ލަވަކިޔާފައިވާއިރު، 2024 ވަނަ އަހަރު ޕާކިސްތާނުގެ ބޭންޑެއް ކަމަށްވާ "އައުރް" އާއެކު ކިޔާފައިވާ ލަވައަށް ވެސް ބޮޑު ތަރުހީބެއް ލިބުނެވެ.

މީގެ އިތުރުން، ދާދި ފަހުން ލަސް ވޭގަސްގައި ބޭއްވި ޝޯތަކެއްގައި ވެސް ޒެއިން ވަނީ އުރުދޫ ބަހުން ހިމެނޭ، އަދި ރިލީޒްނުކުރާ ބައެއް މިއުޒިކްތައް އިއްވާލާފައެވެ.

ބައެއް މީހުން ފާހަގަކުރާ ގޮތުގައި "ކޮންނަކޯލް" އަލްބަމްގެ ކަވަރުގައި ޒައިންގެ މޫނުގެ އެއްބަޔާއި ސުނޯ ލެޕަޑެއްގެ މޫނު ގުޅުވާލާފައިވާ ކުރެހުމަކީ ވެސް ދެކުނު އޭޝިއާގެ ފުލޯކް ވާހަކަތަކާ ގުޅުންހުރި ރަމްޒެކެވެ.

އެހެންނަމަވެސް، މި އަލްބަމްގެ ނަމާ އެއްގޮތަށް އޭގައި "ކޮންނަކޯލް" ވޯކަލް ޕާކަޝަން ހިމެނޭތޯ އެނގޭނީ އޭޕްރިލް 17 ގައި އަލްބަމް ނެރުމުންނެވެ.

ވަން ޑައިރެކްޝަންގެ ތަރިން އާ މިއުޒިކް ނެރުމުގެ މާނައަކީ، އެ ބޭންޑުގެ ސަޕޯޓަރުންނަށް އެ ތަރިން ލައިވްކޮށް ބަލާލުމުގެ އިތުރު ފުރުސަތެއް ލިބުމެވެ.

ހެރީ އާއި ލުއީ ފަދައިން، ޒައިން ވެސް ވަނީ އޭނާގެ ސޯލޯ ކެރިއަރުގައި ބާއްވާ އެންމެ ބޮޑު ޓުއާ އިއުލާންކޮށްފައެވެ. މި ޓުއާގައި ދުނިޔޭގެ އެކި ސިޓީތަކުގައި 31 ޝޯ ބޭއްވުމަށް ހަމަޖެހިފައިވާއިރު، ފުރަތަމަ ޝޯ އޮންނާނީ މެއި 12 ގައި މެންޗެސްޓާގެ އޭއޯ އެރީނާގަ އެވެ.

މީގެ ކުރިން "އެކްސްޓްރީމް އެންޒައިޓީ" އާ ގުޅިގެން ބައެއް ޝޯތައް ކެންސަލްކޮށްފައިވާ 33 އަހަރުގެ ޒެއިން، މިފަހަރު އުތުރު އަދި ދެކުނު އެމެރިކާގައި ވެސް ޝޯތައް ދިނުމަށް ވަނީ ރާވާފައެވެ.

ޒެއިން މަޝްހޫރުވެގެން ދިޔައީ ވަން ޑައިރެކްޝަން ބޭންޑުގެ މެންބަރުން ކަމަށްވާ ހެރީ ސްޓައިލްސް، ނިއަލް ހޯރަން، ލުއީ ޓޮމްލިންސަން އަދި ލިއަމް ޕޭން އާ އެކުގަ އެވެ.

މީގެ ތެރެއިން ލިއަމް ޕޭން ވަނީ 2024 ވަނަ އަހަރުގެ އޮކްޓޫބަރު މަހު އާޖެންޓީނާގެ ހޮޓަލެއްގެ ބެލްކަނިން ވެއްޓި މަރުވެފަ އެވެ.

ޒެއިން އެ ބޭންޑުން ވަކިވެ ސޯލޯ ކެރިއަރެއް ފެށީ 2015 ވަނަ އަހަރުއެވެ. އަދި އޭގެ އެއް އަހަރު ފަހުން އޭނާ ނެރުނު ފުރަތަމަ އަލްބަމް "މައިންޑް އޮފް މައިން" އަކީ ޗާޓުތަކުގެ އެއްވަނަ ހޯދި ކާމިޔާބު އަލްބަމެކެވެ.

މިދިޔަ ހަފުތާގައި ސިންގަލް އަދި އަލްބަމް ޗާޓުގެ އެއްވަނަ ހޯދި ހެރީ އާއި ލުއީ ފަދަ ކާމިޔާބީއެއް ޒައިންގެ އާ އުފެއްދުންތަކަށް ލިބޭނެތޯ އެނގޭނީ އަންނަ އޭޕްރިލް މަހުގަ އެވެ.