"ޕަރީ" ގެ ވީއެފްއެކްސް އާއި ސައުންޑްގެ މަސައްކަތް ފުރަތަމަ ފަހަރަށް އިންޑިއާގެ ޕްރޮފެޝަނަލް ސްޓޫޑިއޯ އަކުން ނިންމާލައިފި

އަލީ ސީޒަން ޑައިރެކްޓްކޮށްފައިވާ ބިރުވެރި ފިލްމު "ޕަރީ: ޗެޕްޓަރ 1" ގެ ވީއެފްއެކްސް (VFX) އާއި ސައުންޑް މިކްސިންގްގެ މަސައްކަތް އިންޑިއާގެ މަޝްހޫރު ސްޓޫޑިއޯއަކުން ކާމިޔާބުކަމާއެކު ނިންމާލައިފި އެވެ.

މިއީ ދިވެހި ފިލްމީ ތާރީހުގައިވެސް، ދިވެހި ފިލްމެއްގައި ވީއެފްއެކްސް އާއި ސައުންޑް މިހާ ފުރިހަމައަށް، އިންޑިއާގެ ޕްރޮފެޝަނަލް ސްޓޫޑިއޯއެއް ގައި ކުރިއަށް ގެންދިޔަ ފުރަތަމަ ފަހަރެވެ. މި ފިލްމު އުފެއްދުމުގައި އެންމެ ބޮޑު އިސްކަމެއް ދީފައިވަނީ ބައިނަލްއަގުވާމީ މިންގަނޑަށް ފެތޭ ފެންވަރަކަށް ގެނެސްދިނުމަށް ކަމަށް "ޕަރީ" ޓީމުން ވަނީ ބުނެފަ އެވެ.

މީގެ އިތުރުން މިފިލްމުގެ ވީއެފްއެސްގެ މަސައްކަތް ވަނީ ބަންގްލަދޭޝް އަދި ސްރީލަންކާގެ ވީއެފްއެސްގެ ސްޓީއޯތަކުން ކޮށްފަ އެވެ. 

ވީއެފްއެކްސް ނުވަތަ 'ވިޝުއަލް އިފެކްޓްސް' އަކީ ފިލްމު އުފެއްދުމުގެ ދުނިޔޭގައި ބޭނުންކުރާ އެންމެ ޒަމާނީ އެއް ޓެކްނޮލޮޖީ އެވެ. މިއީ ކެމެރާއިން ނަގާ ހަގީގީ މަންޒަރުތަކުގެ ތެރެއަށް، ކޮމްޕިއުޓަރ ގްރެފިކްސް ބޭނުންކޮށްގެން އިތުރު މަންޒަރުތައް ވެއްދުމެވެ.

ނަގަން އުނދަގޫ ނުވަތަ ނުނެގޭނެ ފަދަ ނާމާން، ބިރުވެރި އަދި ހިޔާލީ މަންޒަރުތައް ސްކްރީނުން ހަގީގަތެއް ފަދައިން ދައްކުވައިދިނުމަށް ބޭނުންކުރާ ޓެކްނޮލޮޖީއަކީ 'ވިޝުއަލް އިފެކްޓްސް' އެވެ.

"ޕަރީ" ފަދަ ބިރުވެރި ފިލްމެއްގައި ޖިންނި ޝައިތާނުން ސިފަވާ ގޮތާއި، ގުދުރަތީ ގޮތުން ނުވާނެ ފަދަ ބިރުވެރި ހަރަކާތްތައް ގެނެސްދިނުމުގައި ވީއެފްއެކްސްގެ ދައުރު ވަރަށް ބޮޑުވާނެ ކަމަށް ޓީމުން ބުންޏެވެ.

އާންމުކޮށް ދިވެހި ފިލްމުތަކުން ފެންނަ ގްރެފިކްސްތަކާ ހިލާފަށް، އިންޑިއާގެ ޕްރޮފެޝަނަލް ސްޓޫޑިއޯއަކުން "ޕަރީ" ގެ ވީއެފްއެކްސް ހެދުމުގެ ސަބަބުން، ފިލްމުގެ މަންޒަރުތައް ފެންނާނީ އަސްލާ އެއްގޮތަށެވެ. ބެލުންތެރިޔާއަށް އެއީ ހަދާފައިވާ އެއްޗެއްކަން އިހުސާސް ނުވާނެހާ ފުރިހަމައަށް، ފިލްމުގެ ވާހަކައާ ގުޅޭ ގޮތަށް މަންޒަރުތައް ވަނީ ފަރުމާކޮށްފަ އެވެ.

ހަމައެއާއެކު، 7.1 ސައުންޑްގެ އެހީގައި ފިލްމުގެ އަޑުތައް ޑިޒައިންކޮށްފައި ވަނީ ސިނަމާގައި ތިބޭއިރު، އެ ބިރުވެރި ހާދިސާތައް ހިނގަނީ ބެލުންތެރިޔާގެ ވަށައިގެން ކަހަލަ އިހުސާސެއް ކުރުވާނެ ފެންވަރަށެވެ.

ސްރީލަންކާގެ ހިތްގައިމު އަދި ނާމާން މާހައުލުތަކުގައި ޝޫޓްކޮށްފައިވާ މި ފިލްމު ސިނަމާއަށް އަންނާނީ އަންނަ ޖެނުއަރީ މަހުގެ 7 ވަނަ ދުވަހު އެވެ. މިއީ ދިވެހި ސިނަމާގެ ތަޖުރިބާ މުޅިން އެހެން ހަރުފަތަކަށް ގެންދާނެ ފިލްމަކަށް ވާނެކަމާމެދު ޝައްކެއް ނެތެވެ.

އޮލިމްޕަހުގެ ޓިކެޓް ކައުންޓަރ ނަންބަރު 9331242 އިން ޓިކެޓް ލިބެން ހުންނަ ދުވަސްތަކުގެ ފަހުގެ މައުލޫމާތު ލިބޭނެ ކަމަށާއި، މިފިލްމު އަތޮޅު ތެރޭގެ ރަށްރަށުގައި ސްކްރީން ކުރަން ބޭނުންވާ ފަރާތްތަކުން 9331243 އަށް ގުޅުއްވުމަށް ޕަރީގެ ޓީމުން ވަނީ އެދިފަ އެވެ.

މި ފިލްމަކީ އަހުމަދު އަހުސަން އާއި އަލީ ސީޒަން ޕްރޮޑިއުސްކުރާ ފިލްމަކަށް ވާއިރު، ޑައިރެކްޝަންގެ މަސައްކަތް ކޮށްފައިވަނީ އަލީ ސީޒަން އެވެ.