ބިޔޯންސޭ ބިލިއަނަރަކަށް!
ފޯބްސް އިން ވަނީ 2025 ވަނަ އަހަރު ޓެކްސް ނުހިމަނާ ބިޔޯންސޭ އަށް 148 މިލިއަން ޑޮލަރު ލިބިފައިވާ ކަމަށް ލަފާކޮށްފައި.
ރެކޯޑިން އާޓިސްޓް ބިޔޯންސޭ ޑިމޮކްރެޓިކް ޕާޓީގެ ރިޔާސީ ކެންޑިޑޭޓް، އެމެރިކާގެ ނައިބު ރައީސް ކަމަލާ ހެރިސް ގެ ކެމްޕޭން އިވެންޓެއްގައި
އެމެރިކާގެ މަޝްހޫރު ލަވަކިޔުންތެރިޔާ ބިޔޯންސޭ ބިލިއަނަރަކަށް ވެއްޖެ އެވެ.
ފޯބްސް މަޖައްލާ އިން ހޯމަ ދުވަހު ބުނި ގޮތުގައި، މި ދަރަޖަ އަށް ވާސިލްވި ފަސްވަނަ މިއުޒިޝަނަކީ ބިޔޯންސޭ އެވެ.
ދުނިޔޭގެ އެންމެ މުއްސަނދި މީހުންގެ ރޭންކިން އެކުލަވާލާ މަޝްހޫރު ފޯބްސް މަޖައްލާ އިން ބުނި ގޮތުގައި، 44 އަހަރުގެ މި ފަންނާނު މިހާރު ވަނީ އޭނާގެ ފިރިމީހާ، ރެޕަރ ޖޭ-ޒެޑް އާއި، ޓޭލަރ ސްވިފްޓް، ބްރޫސް ސްޕްރިންގްސްޓީން އަދި ރިހާނާ ފަދަ މަދު ބައެއްގެ ގްރޫޕުގައި ހިމެނިފަ އެވެ.
ބިޔޯންސޭ މި އުސްމިނަަށް ދިޔައީ ވަރަށް ކާމިޔާބު އެހެން ނަމަވެސް ގިނަ އަހަރުތަކެއް ފަހުންނެވެ.
2023 ވަނަ އަހަރު އޭނާގެ "ރެނެސަންސް ވޯލްޑް ޓޫރ" އިން ގާތްގަނޑަކަށް 600 މިލިއަން ޑޮލަރުގެ އާމްދަނީ އެއް ލިބިފައިވެ އެވެ.
ބިޔޯންސޭ ވަނީ 2024 ވަނަ އަހަރު ގްރެމީ އެވޯޑް ހާސިލްކުރި ކަންޓްރީ އަލްބަމް "ކައުބޯއި ކާޓަރ" އާއި އެކު އޭނާގެ މިއުޒިކަލް ޕްރޮފައިލް ބަދަލުކޮށް، 2025 ވަނަ އަހަރު ދުނިޔޭގެ އެންމެ ބޮޑު އާމްދަނީ އެއް ލިބުނު ޓުއަރ ބާއްވާފައެވެ.
މި އާމްދަނީތަކާއި، އޭނާގެ މިއުޒިކް ކެޓަލޮގް އާއި އެހެނިހެން އެއްބަސްވުންތަކުން ލިބިފައިވާ އާމްދަނީ އަށް ބަލާފައި، ފޯބްސް އިން ވަނީ 2025 ވަނަ އަހަރު ޓެކްސް ނުހިމަނާ ބިޔޯންސޭ އަށް 148 މިލިއަން ޑޮލަރު ލިބިފައިވާ ކަމަށް ލަފާކޮށްފަ އެވެ. މިއީ ދުނިޔޭގެ އެންމެ މަތީ އާމްދަނީ ލިބޭ ތިންވަނަ މިއުޒިޝަނެވެ.
ފޯބްސް މަޖައްލާ އިން ބިޔޯންސޭ ގެ މުޅި މިލްކިއްޔާތުގެ ތަފްސީލެއް ހާމަކޮށްފަ އެއް ނުވެއެވެ. ބިޔޯންސޭ ވަނީ އޭނާގެ ކެރިއަރާއި އުފެއްދުންތައް މެނޭޖް ކުރުމަށްޓަކައި "ޕާކްވުޑް އެންޓަޓެއިންމަންޓް" އުފައްދާފައެވެ.
ފޯބްސް އިން ބުނި ގޮތުގައި، ބިޔޯންސޭ ހެއަރ ކެއަރ ބްރޭންޑަކާއި، ހެދުމުގެ ބްރޭންޑެއް ފަދަ އެކި ވިޔަފާރިތަކުން އޭނާގެ ވިޔަފާރީގެ ދާއިރާ ފުޅާކޮށްފައިވީ ނަމަވެސް، އޭނާގެ އަމިއްލަ އާމްދަނީގެ ބޮޑު ބަޔެއް ލިބިފައި ވަނީ މިއުޒިކާއި، ދުނިޔޭގެ އެކި ކަންކޮޅުތަކުގައި ބާއްވާ ކޮންސަޓް ޓުއަރތަކުންނެވެ.
