ބައިނަލްއަގުވާމީ މަޝްހޫރު މިއުޒިކް ފެސްޓިވަލް "ޔުއަރ ޕެރަޑައިސް" ރާއްޖެ އަށް!

ދުނިޔޭގެ ފެންވަރުގައި ބާއްވާ އެންމެ ތަފާތު އެއް މިއުޒިކް ފެސްޓިވަލް ކަމަށްވާ "ޔުއަރ ޕެރަޑައިސް" ފުރަތަމަ ފަހަރަށް ރާއްޖޭގައި ބޭއްވުމަށް ތައްޔާރުވެއްޖެ އެވެ.

ބ. އަތޮޅުގައި ހިންގަމުން އަންނަ އަވާނީ  ފަރެސް މޯލްޑިވްސް ރިސޯޓުން ހާމަކޮށްފައިވާ ގޮތުގައި، މި ފެސްޓިވަލް ބޭއްވުމަށް ހަމަޖެހިފައި ވަނީ 2026 ވަނަ އަހަރުގެ މެއި މަހުގެ 11 އިން 16 އަށެވެ. މިއީ މީގެ ކުރިން ފިޖީ ގައި ބާއްވަމުން އައި މަގުބޫލު ފެސްޓިވަލް  އިންޑިއާ ކަނޑުގެ ގައުމެއްގައި ބާއްވާ ފުރަތަމަ ފަހަރެވެ.

މި ފެސްޓިވަލާ ގުޅޭގޮތުން އަވާނީ ފަރެސް އިން ބުނީ، ހަ ދުވަހުގެ މުއްދަތަށް ކުރިއަށްދާ މި ހަރަކާތުގައި ދުނިޔޭގެ މަޝްހޫރު އިލެކްޓްރޯނިކް މިއުޒިކް އާޓިސްޓުން ފެނިގެންދާނެ ކަމަށެވެ. އޭގެ ތެރޭގައި ފުންނާބު އުސް ފަންނާނުން ހިމެނެއެވެ.

މި ހަރަކާތަކީ ހަމައެކަނި މިއުޒިކް ފެސްޓިވަލެއް ނޫނެވެ. މީގެ ތެރޭގައި ރާއްޖޭގެ ސަގާފީ ހަރަކާތްތަކާއި، ވެލްނަސް ސެޝަންތަކުގެ އިތުރުން މޫދު ކުޅިވަރުގެ ތަފާތު ހަރަކާތްތައް ވެސް ކުރިއަށްދާނެ އެވެ. މި ފެސްޓިވަލް އިންތިޒާމު ކުރެވިފައިވަނީ ޖުމްލަ 400 އެއްހާ މީހުންނަށް ބައިވެރިވެވޭ ގޮތަށް، ވަރަށް ޚާއްޞަ އަދި ލަގްޒަރީ ތަޖުރިބާއެއްގެ ގޮތުގަ އެވެ.

ބ. އަތޮޅުގެ ޔުނެސްކޯ ބަޔޮސްފިއަރ ރިޒާވްގެ ހިތްގައިމު މާހައުލުގައި ބާއްވާ މި ފެސްޓިވަލަކީ ރާއްޖޭގެ ފަތުރުވެރިކަން އާ ހަރުފަތަކަށް ގެންގޮސް، "ފެސްޓިވަލް ޑެސްޓިނޭޝަން " އެއްގެ ގޮތުގައި ރާއްޖެ އިތުރަށް އިޝްތިހާރު ކުރުމަށް ލިބޭ ބޮޑު ފުރުސަތެއް ކަމަށް ދާއިރާގެ ތަޖުރިބާކާރުން ދެކެއެވެ.

މި ފެސްޓިވަލްގައި ބައިވެރިވާން ބޭނުންވާ ފަރާތްތަކަށް މިހާރު ވަނީ ބުކިންގްސް ހުޅުވާލާފަ އެވެ. އަދި މިކަމަށް ޚާއްޞަ ޕެކޭޖްތަކެއް ވެސް އަވާނީ  ފަރެސް އިން ވަނީ ތައާރަފު ކޮށްފަ އެވެ.