މާލޭގެ އަތޮޅު ފިހާރަތަކުގެ ބޭރު ފާރު ދިގު މުއްދަތަށް ރައްކާތެރިކޮށް އެ ސަރަހައްދު ޒަމާނީ ކޮމާޝަލް ފްރަންޓެއްގެ ގޮތުގައި ތަރައްގީކުރުމަށް އިންވެސްޓްކުރުމުގެ ފުރުސަތު މިއަހަރުގެ މެދުތެރޭގައި ހުޅުވާލަނީ
ލާމަރުކަޒީ ނިޒާމު ހަރުދަނާކުރުމަށް ޗައިނާގެ އެހީގައި 50 ރަށެއްގެ ކައުންސިލް އިދާރާ އިމާރާތްކުރުމުގެ މަޝްރޫޢުގެ ފީޒިބިލިޓީ ދިރާސާ މިހާރު ވަނީ ނިމިފައި ކަމަށާއި މިހާރު ކުރިއަށް ދަނީ ކައުންސިލް އިދާރާ އަޅާނެ ބިން ހޯދުމާއި އެނޫން ވެސް އިދާރީ މަސައްކަތްތައް ކަމަށް މުއިއްޒު ވިދާޅުވި.
ރައީސް މުއިއްޒު ރިޔާސީ ބަޔާން 2026 އިއްވަވަނީ - މާލޭގެ އަތޮޅު ފިހާރަ ބަރި ހުރި ސަރަހައްދު ޒަމާނީ ކޮމާޝަލް ފްރަންޓެއްގެ ގޮތުގައި ތަރައްގީކުރުމަށް، ސަރުކާރާ ގުޅިގެން އިންވެސްޓްކުރުމުގެ ފުރުސަތު މިއަހަރުގެ މެދުތެރޭގައި ހުޅުވާލައްވާނެ ކަމަށް ވިދާޅުވި. | ރައީސް އޮފީސް
މާލޭގެ އަތޮޅު ފިހާރަ ބަރި ހުރި ސަރަހައްދު ޒަމާނީ ކޮމާޝަލް ފްރަންޓެއްގެ ގޮތުގައި ތަރައްގީކުރުމަށް، ސަރުކާރާ ގުޅިގެން އިންވެސްޓްކުރުމުގެ ފުރުސަތު މިއަހަރުގެ މެދުތެރޭގައި ހުޅުވާލައްވާނެ ކަމުގައި ރައީސް ޑޮކްޓަރ މުޙައްމަދު މުޢިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ މިއަހަރުގެ ރައްޔިތުންގެ މަޖިލީސް ހުޅުވުމަށް ބުރާސްފަތި ދުވަހު ބޭއްވި، ރައްޔިތުންގެ މަޖިިލީހުގެ ޖަލްސާގައި ރިޔާސީ ބަޔާން އިއްވަވަމުންނެވެ.
އަތޮޅު ފިހާރަބަރި އަކީ މާލޭގެ މަލަމަތީގެ ރަމްޒެއްގެ ގޮތުގައި އެތައް ޒަމާނެއްވީ ތަރިކައެއް ކަމަށާއި އަތޮޅު ފިހާރައިގެ ޢިމާރާތުގެ ބޭރު ފާރު ދިގު މުއްދަތަށް ރައްކާތެރިކޮށް ހުންނާނޭގޮތަށް އަލުން ތަރައްޤީކުރެވޭއިރު ކުރިޔަށް ގެންދިއުމަށް ގަސްދުކުރައްވާކަމަށް ވެސް މުއިއްޒު ވިދާޅުވި އެވެ.
ލާމަރުކަޒީ ނިޒާމުގެ ތެރެއިން ކައުންސިލްތައް މާލީގޮތުން ބާރުވެރިކުރުމަށް މާލީ ތަނަވަސްކަން ހޯދުމުގެ ވަސީލަތެއްގެ ގޮތުގައި 27 ފަޅުރަށެއް ޚާއްޞަކޮށްފައިވާކަމަށާއި އޭގެތެރެއިން މިހާތަނަށް 6 ކައުންސިލަކަށް 7 ރަށް ދޫކުރެވިފައިވާކަމަށް މުއިއްޒު ވިދާޅުވި އެވެ.
މުޅިން އަލަށް 7 ރަށެއްގައި ޑޮލަރު އޭޓީއެމް ހުޅުވި، އިތުރު 70 ރަށުގައި ޑޮލަރު އޭޓީއެމް ބެހެއްޓުމަށްޓަކައި ކުރަންޖެހޭ މަސައްކަތް މިހާރު ފަށާފައިވާކަމަށް ވެސް މުއިއްޒު ވިދާޅުވި އެވެ. މި އަހަރުގެ މާރިޗު މަހުގެ ނިޔަލަށް މި އޭޓީއެމްތަކުން ރައްޔިތުންނަށް ޚިދުމަތް ލިބޭނެ ކަމަށް ވެސް މުއިއްޒު ހާމަކުރެއްވި އެވެ.
ރައީސް މުއިއްޒު ގެ ވާހަކަފުޅުގައި އަލަށް އުފެދިގެންދާ 2 ކައުންސިލް ކަމުގައިވާ، އައްޑޫ ހުޅުދޫ އާއި އައްޑޫ މީދޫ ކައުންސިލް ހިންގުމަށް ބޭނުންވާ ޖާގަ އިތުރު ކުރުމަށް ކުރަންޖެހޭ މަސައްކަތްތައް މި މަހު ފެށޭނެކަން ފާހަގަކުރެއްވިއެވެ. އަދި 2 ކައުންސިލަށް ބޭނުންވާ އިދާރީ މުވައްޒަފުންނާއި މުނިސިޕަލް ޚިދުމަތް ހަރުދަނާ ކުރުމަށްޓަކައި ބޭނުންވާ މުއައްޒަފުން ހަމަކުރުމަށްޓަކައި ކައުންސިލްގެ މުވައްޒަފުންގެ އޮނިގަނޑަށް ގެންނަންޖެހޭ ބަދަލުތައް ގެނެވި، މުވައްޒަފުން އިތުރު ކުރެވޭނެކަމަށްވެސް ވިދާޅުވިއެވެ.
މީގެ އިތުރުން ޗައިނާ ސަރުކާރުގެ ހިލޭ އެހީގައި ޢިމާރާތްކުރާ 50 ކައުންސިލް އިދާރާ ޕްރޮޖެކްޓްގެ ފީޒިބިލިޓީ ދިރާސާ ނިމިފައިވާކަމަށާއި މިހާރު ކުރިއަށް ދަނީ ކައުންސިލް އިދާރާ އަޅާނެ ބިން ހޯދުމާއި އެނޫން ވެސް އިދާރީ މަސައްކަތްތައް ކަމަށް މުއިއްޒު ވިދާޅުވި އެވެ.
