ރައީސް ސޯލިހް ފޮނުއްވި ސިޓީ އަނބުރާ ގެންނަވާނެ ކަމަށް ރައީސް މުޢިއްޒު ވިދާޅުވިއިރު، ސިޓީ ހާމަ ކުރަންވީ ވައުދު ވެސް ނުފުދޭ
2022 ވަނަ އަހަރުގެ އޯގަސްޓު މަހުގެ 22 ވަނަ ދުވަހު ދިވެހި ރާއްޖެ އިން މޮރިޝަސްގެ ބޮޑު ވަޒީރަށް ފޮނުވާފައިވާ ސިޓީގެ ސަބަބުން، ރާއްޖޭގެ ސިޔާދަތަށް ނާދެވޭ އަސަރު ކޮށްފައިވާ ކަމަށް ބައިނަލްއަޤުވާމީ މާހިރުން ލަފާ ދީފައިވާތީ، ދިވެހި ރާއްޖެ އިން އެ ސިޓީ އަނބުރާ ގެންނަން ނިންމާފައިވާ ކަމަށް ރައީސް ވިދާޅުވި.
ރިޔާސީ ބަޔާން އިއްވާ ޖަލްސާގައި ރައީސް ޑޮކްޓަރު މުޙައްމަދު މުޢިއްޒު | ރައީސް އޮފީސް
ފޯޅަވަހީގެ މައްސަލައިގައި މޮރިޝަސްގެ ބޮޑު ވަޒީރަށް ކުރީގެ ރައީސް އިބްރާހީމް މުޙައްމަދު ސޯލިހް ފޮނުއްވި ސިޓީ، ދިވެހި ރާއްޖެ އިން އަނބުރާ ގެންނާނެ ކަމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވެއްޖެ އެވެ.
ވެރިކަމަށް ވަޑައިގަންނަވަން ރައީސް މުޢިއްޒު ވައުދުވެ ވަޑައިގެންފައި ވަނީ ރާއްޖޭގެ ކަނޑުގެ ސަަރަހައްދުން ގެއްލުނު ބައި އަލުން އަނބުރާ ހޯއްދަވާނެ ކަމަށެވެ. އަދި މޮރިޝަސްގެ ބޮޑު ވަޒީރަށް ރައީސް ސޯލިހް ފޮނުއްވި ސިޓީ ވެސް އާންމު ކުރައްވާނެ ކަމަށް ވިދާޅުވި އެވެ. ނަމަވެސް، ސަރުކާރަށް ދެ އަހަރުވީއިރު ވެސް، އެ ސިޓީ އާންމު ކޮށްފައި ނުވެ އެވެ. ރަސްމީކޮށް އެ ސިޓީ އާންމު ނުކުރި ނަމަވެސް، ސޯޝަލް މީޑިއާގައި އެ ސިޓީ ލީކުވެފައިވެ އެވެ.
ރައްޔިތުންގެ މަޖިލީހުގައި ރިޔާސީ ބަޔާން އިއްވަވަމުން ރައީސް މުޢިއްޒު ވިދާޅުވީ، ދިވެހި ރާއްޖޭގެ އިޤްތިޞާދީ ސަރަހައްދުން ދޫކޮށްލި ބައި ހޯދުމަށް ޤާނޫނީ ގޮތުން ކުރަން ޖެހޭ ކަންކަން ކުރަން ފަށާފައިވާ ކަމަށެވެ. އަދި 2022 ވަނަ އަހަރުގެ އޯގަސްޓު މަހުގެ 22 ވަނަ ދުވަހު ދިވެހި ރާއްޖެ އިން މޮރިޝަސްގެ ބޮޑު ވަޒީރަށް ފޮނުވާފައިވާ ސިޓީގެ ސަބަބުން، ރާއްޖޭގެ ސިޔާދަތަށް ނާދެވޭ އަސަރު ކޮށްފައިވާ ކަމަށް ބައިނަލްއަޤުވާމީ މާހިރުން ލަފާ ދީފައިވާތީ، ދިވެހި ރާއްޖެ އިން އެ ސިޓީ އަނބުރާ ގެންނަން ނިންމާފައިވާ ކަމަށް ރައީސް މުޢިއްޒު ވިދާޅުވެފައިވެ އެވެ.
ދިވެހި ރާއްޖޭގެ ރައީސުލްޖުމްހޫރިއްޔާ ބާވީސް އޯގަސްޓު ދެހާސް ބާވީސް ވަނަ އަހަރު މޮރިޝަސްގެ ބޮޑު ވަޒީރަށް ފޮނުވި ސިޓީގެ ސަބަބުން، ދިވެހި ރާއްޖޭގެ ސިޔާދަތީ ސަރަހައްދުގެ ރައްކާތެރި ކަމަށް އަސަރު ކޮށްފައިވާ ކަމަށް ބައިނަލްއަޤުވާމީ މާހިރުންގެ ލަފާ ލިބިފައިވާތީ، ދިވެހި ރާއްޖެ އިން އެ ސިޓީ އަނބުރާ ގެންނަން ނިންމިކަން މި ފަޚުރުވެރި ދިވެހި ދައުލަތާއި، ލޮބުވެތި ރައްޔިތުންގެ ހައްގުގައި ތިޔަ އިއްޒަތްތެރި މަޖިލިސް މެމްބަރުންގެ ކުރިފުޅު މަތީގައި މިވަގުތު އަޅުގަނޑު އިއުލާން ކުރަން.ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު
ރައީސް މުޢިއްޒު މިހެން ވިދާޅުވެފައިވާއިރު، 2025 ވަނަ އަހަރުގެ އޮކްޓޫބަރު މަހުގެ 15 ވަނަ ދުވަހު ރައްޔިތުންގެ މަޖިލީހުގައި ވާހަކަ ދައްކަވަމުން ބަންޑާރަ ނައިބު އަޙުމަދު އުޝާމް ވިދާޅުވެފައި ވަނީ، އެ މައްސަލައިގައި ރާއްޖެ އަށް ގެއްލުން ވާނެ އެއްވެސް ލިޔުމެއް، އެއްވެސް ފަރާތަކުން ދީފައި ނުވާ ކަމަަށެވެ. މީގެ އިތުރުން ރައީސް ސޯލިހް ފޮނުއްވި ކަމަށް ބުނާ ސިޓީގައި ރާއްޖޭގެ ސިޔާދަތާއި، ރާއްޖޭޣެ މިނިވަންކަން އަދި އިސްތިޤުލާލަށް ގެއްލުންވާނެ ފަދަ މައްސަލައެއް ނެތް ކަމަށް، އެކި އެކި ފަރާތްތަކުން ވެސް ވަނީ ފާހަގަ ކޮށްފަ އެވެ. .
ސަރުކާރަށް ދެ އަހަރު ވެގެން ދިޔައިރު ވެސް، މި މައްސަލައިގައި މިހާތަނަށް އެކަށީގެންވާ ގޮތެއްގައި މަސައްކަތް ކޮށްފައި ނުވެ އެވެ.
