ސައުދީ ސުޕަ ކަޕްގެ ފައިނަލްގެ ޖާގަ އަލް ނަޞްރު އިން ހޯދައިފި

ސައުދީ ސުޕަ ކަޕްގެ ސެމީ ފައިނަލްގައި އަލް އިއްތިހާދާ ދެކޮޅަށް ކުޅުނު މެޗުން މޮޅުވެ، އަލް ނަޞްރު އިން މުބާރާތުގެ ފައިނަލްގެ ޖާގަ ހޯދައިފި އެވެ.

އަންގާރަ ދުވަހުގެ ރޭ ކުޅުނު މެޗު އަލް ނަޞްރު އިން ކާމިޔާބު ކުރީ 2-1 އިންނެވެ. މެޗުގައި އަލް ނަޞްރު އިން ލަނޑު ޖަހައި ލީޑު ނަގާފައި ވަނިކޮށް، އަލް އިއްތިހާދު އިން ވަނީ ނަތީޖާ ހަމަހަމަ ވެސް ކޮށްފަ އެވެ. ނަމަވެސް ދެ ވަނަ ހާފުގައި ދެ ވަނަ ލަނޑެއް ޖަހައިގެން އަލް ނަޞްރު ވަނީ މެޗުން މޮޅުވެފަ އެވެ.

މެޗު ފަށައިގެން 10 ވަނަ މިނެޓުގައި އަލް ނަޞްރު އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ސަޑިއޯ މާނޭ އެވެ. ނަމަވެސް އަލް ނަޞްރަށް ލީޑުގައި އޮވެވުނީ އެންމެ ހަ މިނެޓު އެވެ.

މެޗުގެ 16 ވަނަ މިނެޓުގައި އަލް އިއްތިހާދުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ސްޓީވަން ބާގްވިން އެވެ.

އޭގެ ފަހުން މެޗުގެ 25 ވަނަ މިނެޓުގައި އަލް ނަޞްރުގެ މާނޭ އަށް ވަނީ ސީދާ ރަތް ކާޑު ދައްކައިފަ އެވެ. އަދި އަލް އިއްތިހާދުގެ އޭރިޔާ ތެރެއިން އެ ޓީމުގެ ގޯލު ކީޕަރަށް މާނޭ ކުރި ފައުލަކާ ގުޅިގެން ދެއްކި ރަތް ކާޑެކެވެ.

މެޗުގެ ބާކީ ބައި އެއް ކުޅުންތެރިޔަކު މަދުކޮށް ކުޅެން ޖެހުމުން އަލް ނަޞްރަށް ވަނީ އުނދަގޫތަކާ ކުރިމަތިވެފަ އެވެ. އޭގެ ފަހުން މެޗުގައި ލަނޑު ޖަހައި ލީޑު ނަގާނެ ފުރުސަތު އަލް އިއްތިހާދުން ވެސް ވަނީ ހޯދައިފަ އެވެ.

މެޗުން އަލް ނަޞްރު މޮޅުވީ 61 ވަނަ މިނެޓުގައި ޔާއޯ ފެލިކްސް ޖެހި ލަނޑުންނެވެ. އެއީ އަލް އިއްތިހާދުގެ ގޯލު ކުރިމަތިން އަލް ނަޞްރުގެ ކެޕްޓަން ކްރިސްޓިއާނޯ ރޮނާލްޑޯ އަށް ލިބުނު ފުރުސަތުގައި އޭނާ ދިން ބޯޅަ އަކުން ފެލިކްސް ޖެހި ލަނޑެކެވެ.

ސައުދީ ސުޕަ ކަޕްގެ ފައިނަލް އިން އަލް ނަޞްރު ޖާގަ ހޯދާފައިވާއިރު، އެ ޓީމުން ވަނީ މީގެ ކުރިން ދެ ފަހަރެއްގެ މަތިން އެ މުބާރާތް ކާމިޔާބު ކޮށްފަ އެވެ. އެގޮތުން އެ ޓީމުން ވަނީ 2019 ވަނަ އަހަރާއި، 2020 ވަނަ އަހަރު މުބާރާތް ކާމިޔާބު ކޮށްފަ އެވެ.