ސައުދީ ޕްރޯ ލީގުގައި އަލް ޤަދިޞިއްޔާއާ ދެކޮޅަށް ކުޅުނު މެޗުން ފަހު ވަގުތު އަލް ޙިލާލް ބަލިވެއްޖެ އެވެ.

ހޯމަ ދުވަހުގެ ރޭ ކުޅުނު މެޗުގައި ޤަދްޞިއްޔާ އިން އަލް ޙިލާލްގެ މައްޗަށް ކުރި ހޯދީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ޤަދްޞިއްޔާ އިންނެވެ. ނަމަވެސް އަލް ޙިލާލް އިން ލަނޑު ޖަހައިގެން ނަތީޖާ ހަމަހަމަ ކޮށްފައި ވަނިކޮށް، މެޗުގެ އެންމެ ފަހު ވަގުތުގައި ލަނޑު ޖަހައިގެން ޤަދްޞިއްޔާ ވަނީ މެޗުން މޮޅުވެފަ އެވެ.

މެޗު ފަށައިގެން ދެ ވަނަ މިނެޓުގައި ޕިއޭ އެމެރިކް އޮބާމަޔަން ވަނީ ލަނޑު ޖަހައި، ޤަދްޞިއްޔާ އަށް ކުރި ހޯދައިދީފަ އެވެ. މެޗުގެ ނަތީޖާ ހަމަހަމަ ކުރުމަށް އަލް ޙިލާލް އިން ކުރި މަސައްކަތް އެ ޓީމަށް ކާމިޔާބު ކުރެވުނީ ދެ ވަނަ ހާފުގަ އެވެ. މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި އަލް ޙިލާލަށް ނަތީޖާ ހަމަހަމަ ކޮށްދިނީ މާކޮސް ލިއޮނާޑޯ އެވެ. މެޗު އެއްވަރުވާން ދަނިކޮށް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އޮބާމަޔަން ވަނީ ދެ ވަނަ ލަނޑެއް ޖަހައި މެޗުން ޤަދްޞިއްޔާ މޮޅުކޮށްދީފަ އެވެ.

މި ނަތީޖާ އާއެކު ވެސް އަލް ޙިލާލް އެއް ވަނައިގައި އޮތީ މިހާތަނަށް އެ ޓީމު ކުޅެފައިވާ 17 މެޗުން 43 ޕޮއިންޓާ އެކު އެވެ. ހަމަ އެ އަދަަދަށް މެޗު ކުޅެގެން ދެ ވަނައިގައި އަލް އިއްތިފާޤަށް ވެސް ލިބެނީ 43 ޕޮއިންޓެވެ. އަލް ޙިލާލް އަތުން މޮޅުވި އަލް ޤަދްޞިއްޔާ އަށް ތިން ވަނައިގައި ލިބެނީ 37 ޕޮއިންޓެވެ.