ޑައިމަންޑް ޖުބިލީ ފުޓުބޯޅަ ފެސްޓިވަލްގެ ނަމުގައި ސިލްސިލާ ފެސްޓިވަލް ތަކެއް ބާއްވަނީ

ޑައިމަންޑް ޖުބިލީ ފުޓުބޯޅަ ފެސްޓިވަލްގެ ނަމުގައި، ސިލްސިލާ ފުޓުބޯޅަ ފެސްޓިވަލް ތަކެއް ކުރިއަށް ގެންދަން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.

އެފްއޭއެމް އިން ނެރުނު ނޫސް ބަޔާނެއްގައި ބުނެފައި ވަނީ، މިއީ ރާއްޖޭގެ ފުޓުބޯޅަ އަށް 75 އަހަރު ފުރުން ފާހަގަ ކުރުމުގެ މުނާސަބަތުގައި ކުރިއަށް ގެންދާ ފެސްޓިވަލެއް ކަމަށެވެ. އެފްއޭއެމް އިން ނިންމާފައި ވަނީ ރާއްޖޭގެ ފުޓުބޯޅަ އަށް 75 އަހަރު ފުރުން ކުލަ ގަދަ ގޮތެއްގައި ފާހަގަ ކުރުމަށެވެ.

އެފްއޭއެމް އިން ބުނެފައި ވަނީ އޭގެ ތެރެއިން ފުރަތަމަ ފެސްޓިވަލް ކުރިއަށް ގެންދާނީ މި ހިނގާ ނޮވެމްބަރު މަހުގެ ހަތް ވަނަ ދުވަހުން ފެށިގެން، އަށް ވަނަ ދުވަހުގެ ނިޔަލަށް ކަމަށެވެ. މާފަންނު ޓާފް ދަނޑުގައި އޮންނަ އެ ފެސްޓިވަލްގައި މާލޭގެ ފުޓުބޯޅަ އެކަޑަމީ ތަކުން 1500 އަށް ވުރެ ގިނަ ކުދިން ބައިވެރިވާނެ ކަމަށް އެފްއޭއެމް އިން ބުނެފައިވެ އެވެ.

މީގެ އިތުރުން އެފްއޭއެމް އިން ބުނެފައި ވަނީ ކުރިއަށް އޮތް ދުވަސް ތަކުގެ ތެރޭގައި މި ފެސްޓިވަލް، ރާއްޖޭގެ އެކި ކަންކޮޅު ތަކުގައި ކުރިއަށް ގެންދާނެ ކަމަށެވެ. ދެ ދުވަހުގެ މުއްދަތަށް މާލޭގައި ކުރިއަށްދާ ފެސްޓިވަލްގައި އެކަޑަމީ ތަކުގެ މެޗުތަކާއި، ވާދަވެރިކަމާއި، އެކުވެރިކަމާއި، ކުޅިވަރުގެ ރޫޙާއި، މުޖުތަމައުގެ އެއްބައިވަންތަކަން ކުރިއެރުވުމަށް ފަރުމާ ކޮށްފައިވާ ޙަރަކާތްތައް ހިމެނޭނެ ކަމަށް އެފްއޭއެމް އިން ބުނެފައިވެ އެވެ.

އެފްއޭއެމް އިން ވަނީ ފުޓުބޯޅަ އަށް 75 އަހަރު ފުރުން ފާހަގަ ކުރުމަށް ފަރުމާ ކޮށްފައިވާ ޚާއްސަ ލޯގޯ ވެސް ލޯންޗު ކޮށްފަ އެވެ. އަދި ޑައިމަންޑް ޖުބިލީ ކޮމެޓީގެ ނަމުގައި އެފްއޭއެމް އިން ވަނީ ޚާއްސަ ކޮމެޓީއެއް ވެސް އެކުލަވާލައިފަ އެވެ.