ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ ހުޅުމާލޭގެ ގެދޮރުވެރިޔާ ސްކީމުގެ ފައިނަލް ލިސްޓުގައި ހިމެނުނު 450 އަށްވުރެ ގިނަ މީހުންގެ އަތުން އަސާސީ ޝަރުތު ހަމަނުވާތީ ފްލެޓް އަތުލާފައިވާ ކަމަށް. މިއީ ގެޒެޓްކޮށްފައިވާ ފައިނަލް ލިސްޓަށް ފްލެޓް ލިބޭނެ ކަމަށް ރައީސް މުއިއްޒު ވީ ވައުދާ ޚިލާފަށް ކުރެއްވި ކަމެއް. ކުރީ ސަރުކާރުން 13،763 މީހުންނަށް ފްލެޓް ދިނުމަށް ނިންމައި 11،000 ފްލެޓް އެޅުމުގެ މަސައްކަތް ފަށާފައިވާއިރު އެއިން 4000 ފްލެޓް ނިންމައި ހަވާލުކޮށްފައިވޭ.
ގެދޮރުވެރިޔާ ސްކީމްގެ ދަށުން ހުޅުމާލޭގައި އިމާރާތް ކޮށްފައިވާ ފްލެޓްތައް
ރައީސް އިބްރާހިމް މުހައްމަދު ސޯލިހް ގެ ސަރުކާރުން ހުޅުމާލޭގައި ގެދޮރުވެރިޔާ ސްކީމުގެ ދަށުން އިމާރާތް ކުރި ފްލެޓް ތައް ލިބުނު މީހުންގެ ފައިނަލް ލިސްޓުގައި ހިމެނުނު 450 އަށް ވުރެ ގިނަ މީހުންގެ އަތުން ފްލެޓު އަތުލާފައިވާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
އާދިއްތަ ދުވަހު ރައީސް އޮފީހުގައި އޮތް ނޫސްކޮންފަރެންސް ގައި މުއްތަލިބު ވިދާޅުވީ، ފްލެޓް އަތުލީ، ފައިލަން ލިސްޓުގައި ހިމެނުނު ނަމަވެސް "އަސާސީ ޝަރުތެއް ހަމަނުވާތީ" ކަމަށެވެ.
މުއްތަލިބު މިހެން ވިދާޅުވިއިރު ރައީސް މުހައްމަދު މުއިއްޒު ވެރިކަމަށް ވަޑައިގަތުމަށް ރައްޔިތުންނަށް ވީ ވައުދު ގައި އޮތީ ދިވެހި ސަރުކާރަކުން ގޯހުން ވިޔަސް އަދި ފެއިލްވެފައިވާ ސިޔާސަތަކުން ވިޔަސް ދީފައި އޮތް އެއްޗަކަށް އެމަނިކުފާނުގެ ސަރުކާރެއްގައި ހުރަސް ނާޅުއްވާނެ ކަމަށާއި، ރައްޔިތަކަށް އެއްޗެއް ލިބޭނެ ކުޑަނަމަވެސް ފުރުސަތެއް އޮތް ނަމަ އެއެއްޗެއް އަތުނުލައްވާނެ ކަމަށެވެ.
"ދިވެހި ސަރުކާރަކުން އެއީ ގޯހުން ވިޔަސް، އެއީ ފެއިލްވެފައިވާ ސިޔާސަތަކުން ވިޔަސް، ރައްޔިތުންނަށް ހެޔޮ ކަމެއް ވަންޏާ އެކަމަކަށް އަޅުގަނޑުމެން ހުރަސް އަޅައިގެން ނުވާނެ، ރައްޔިތަކަށް އެއްޗެއް ލިބޭނެ ގޮތެއް، ކުޑަ ނަމަވެސް، ކުޑަ ނަމަވެސް ފުރުސަތެއް ލިބޭ ގޮތައް އެއީ އަދި ވުޖޫދު ގައި ނެތް ކަމެއް ވިޔަސް އެއަކަށް އަޅުގަނޑުމެންގެ ސަރުކާރެއްގައި ހުރަހެއް ނާޅާނަން،" ޑރ. މުއިއްޒު ވިދާޅުވެފައިވެ އެވެ.
ކެމްޕޭން ގައި މިހެން ވިދާޅުވެފައި ވުމުގެ އިތުރުން ވެރިކަމަށް ވަޑައިގެން ރައީސް އޮފީހުގައި އޮތް ނޫސްވެރިންގެ ބައްދަލުވުމެއްގައި، ވިދާޅުވީ، ސަރުކާރަކުން ފައިނަލް ލިސްޓެއް ގެޒެޓް ކޮށްފައި އޮތްނަމަ އެއޮތީ ސަރުކާރުގެ ނިންމުމެއް ކަމަށާއި، އެ ލިސްޓާ އެއް ގޮތަށް ފްލެޓް ލިބޭނެ ކަމަށެވެ. އެއީ، ލިޔުން ނުލިބި އޮތް ކަމުގައި ވިޔަސް އަދި ރަޖިސްޓަރީ ނުލިބި އޮތް ކަމުގައި ވިޔަސް އެމީހަކަށް އެއޮތީ ފްލެޓް ނުވަތަ ގޯތި ލިބިފައި ކަމަށް ވެސް މުއިއްޒު ވިދާޅުވި އެވެ.
"އަޅުގަނޑު ދެންނެވިން އެއްވެސް މީހަކަށް ފްލެޓެއް ގޯއްޗެއް ލިބުނު ތަނަކުން އެ ލިބުނު ގޯއްޗެއް ނޫނީ ފްލެޓެއް އެމީހެއްގެ އަތަކުން އަތެއް ނުލާނަމޭ، ދެން ރަސްމީ ކޮށް ގެޒެޓް ކުރެވިފައި އޮވެއްޖެއްޔާ އެއޮތީ އެމީހާ އަށް ލިބިފައި، އަދި ލިޔުން ނުލިބިވެސް ހުރެދާނެ އެ ފަރާތްތަކަށް، ރަޖިސްޓަރީ ނެހެދިވެސް ހުރެދާނެ، އެއީ އެހެން ކަމެއް، އެހެން ވީމާ ފައިނަލް ލިސްޓެއް ގެޒެޓް ކުރެވިފައި އޮވެއްޖެއްޔާ އެ އޮތީ ސަރުކާރުގެ ނިންމުމެއް، ދެން ސަރުކާރެއްގެ ނިންމުމެއް އޮވެއްޖެއްޔާ ލިބޭނެ،" ހުރިހާ ވަޒީރުންގެ ހާޒިރު ގައި މުއިއްޒު ވިދާޅުވި އެވެ. މުއިއްޒު އިތުރަށް ވިދާޅުވެފައި ވަނީ ޖުމްލަކޮށް އެކަން އޮންނާނެ ގޮތަކީ އެއީ ކަމަށެވެ. "އެއަކަށް ބަދަލެއް ނާންނާނެ."
ކުރީ ސަރުކާރުން ހިންގި ގެދޮރުވެރިޔާ ފުރަތަމަ ސްކީމުގެ ދަށުން ޝަރުތު ހަމަވީ، 13،763 މީހުންނެވެ. ޝަރުތު ހަމަވާ އެންމެންނަށް ފްލެޓް ދިނުމަށް ރައީސް ސޯލިހުގެ ސަރުކާރުން ނިންމާފައިވެއެވެ. އެއާ އެކު އެ ސަރުކާރުން ވަނީ 11،000 ފްލެޓް އެޅުމުގެ އަމަލީ މަސައްކަތް ފަށައި، ނިމިފައިވާ 4000 ފްލެޓުގެ ހައްގުވެރިންނަށް ފްލެޓުތައް ހަވާލުވެސް ކޮށްފަ އެވެ.
ބާކީ ތިބި 9763 މީހުންނަށް ފްލެޓް ދިނުމަށް އިންޑިއާގެ އެލްއޯސީ އިން ފައިނޭންސް ހަމަޖައްސާ، އިތުރު 6،000 ފްލެޓް އެޅުމަށް 4،000 ފްލެޓް އަޅަމުންދާ އިންޑިއާގެ ކުންފުނި ކަމަށްވާ ކޭޕީއައިއެލް އާއި ޖޭއެމްސީ ޕްރޮޖެކްޓްސް އާ އެ މަސައްކަތް 2023 ވަނަ އަހަރު ހަވާލުވެސް ކުރި އެވެ.
އޭގެ އިތުރުން އެޕޯލޯ ކުންފުންޏާ ހަވާލު ކޮށްގެން ކުރިއަށް ގެންދާ 1،000 ފްލެޓާއި އެކު ޖުމްލަ 7،000 ފްލެޓުގެ މަސައްކަތް ރައީސް ސޯލިހުގެ ސަރުކާރުން ފަށާފައިވެ އެވެ.
ގެޒެޓް ކޮށްފައިވާ ފައިނަލް ލިސްޓަށް ފްލެޓް ލިބޭނެ ކަަމަށް ޚުދު ރައީސް މުއިއްޒު ވައުދުވެވަޑައިގަތުމަށް ފަހު އެ ވައުދާ ސީދާ ޚިލާފަށް ފްލެޓް ލިބުނު މީހުންގެ ލިސްޓު އަލުން ރިވިއު ކޮށް "އަސާސީ ޝަރުތެއް" ހަމަ ނުވާ ކަމަށް ބުނެ ގިނަ ބައެއްގެ ހައްގު މި ވަނީ އަތުލައިގަނެފަ އެވެ.
ކުރީގެ ސަރުކާރުން ފެށި ގެދޮރުވެރިޔާ ސްކީމަށް ކުރިމަތިލުމުގެ އަސާސީ ޝަރުތަކީ މާލޭގައި މެދުނުކެނޑި ދިރިއުޅޭތާ 15 އަހަރުވުމާއި އަމިއްލަ ނަމުގައި ފްލެޓެއް ނުވަތަ ބިމެއް ނެތުމެވެ.
މުއްތަލިބު ވިދާޅުވީ 450 އަށްވުރެ ގިނަ މީހުންގެ އަތުން ފްލެޓު އަތުލާފައިވާ ކަމަށާއި ފްލެޓް ހަވާލުކުރުމުގެ މަރުހަލާ ކުރިއަށްދާއިރު އަދިވެސް ބައެއް ފޯމުތައް ރިވިއުކުރަމުން އަންނަ ކަމަށެވެ. އެހެން ކަމުން އިތުރު މީހުންގެ ފްލެޓު ގެއްލުމަކީ އަދިވެސް ވެދާނެ ކަމެއްގެ ގޮތުގައި ބެލެވެއެވެ.
