8218 ދަރިވަރުންނާއެކު އޯލެވެލް އިމްތިހާނު ފަށައިފި
މި އަހަރުގެ އޯލެވެލް އިމްތިހާނުގައި 8218 ދަރިވަރުން ބައިވެރިވެރިވާއިރު، މާލެއާއި އަތޮޅުތެރޭގެ ޖުމްލަ 267 ސެންޓަރެއްގައި މާޗު 6 ވަނަ ދުވަހުގެ ނިޔަލަށް އިމްތިހާނު ކުރިއަށްދާނެ. އިމްތިހާނު ފަށާއިރު ޑިސެމްބަރު 25 ގައި ބޮޑު ޗުއްޓީ ފެށުމުން ގްރޭޑް 10 ދަރިވަރުންނަށް އެންމެ މުހިންމު ދުވަސްވަރު ތައްޔާރުވެވޭނެ ނިޒާމެއް ނެތުމުން ބެލެނިވެރިން ކަންބޮޑުވެފައިވޭ.
ދަރިވަރުންތަކެއް އިމްތިހާނު ހޯލުގައި އިމްތިހާން ހަދަމުންދާ މަންޒަރު ފެންނަ ފޮޓޯ އެއް. | ރާއްޖެއެމްވީ
ކެމްބްރިޖް އޯލެވެލް އާއި އައިޖީސީއެސްއީ އަދި އެސްއެސްސީ އިމްތިހާނު ފަށައިފި އެވެ.
އިމްތިހާނާއި ގުޅޭގޮތުން އެޑިޔުކޭޝަން މިނިސްޓްރީ އިން ބުނީ މި އަހަރުގެ އޯލެވެލް އިމްތިހާނުގައި 8218 ދަރިވަރުން ބައިވެރިވެރިވާ ކަމަށެވެ. މި ފަހަރުގެ އޯލެވެލް އިމްތިހާނު މާލެ ސަރަހައްދުގައި 21 ސެންްޓަރެއްގައި ކުރިއަށްދާ އިރު އަތޮޅުތެރޭ ގެ 246 ސެންޓަރެއްގައި އިމްތިހާނު ކުރިއަށް ދާ ކަމަށް އެޑިއުކޭޝަން މިނިސްޓްރީ އިން ވަނީ ބުނެފަ އެވެ. އެހެންކަމުން ޖުމަލަ 267 ސެންޓަރެއްގައި މިފަހަރުގެ އޯލެވެލް އިމްތިހާނު ހަދާނެ އެވެ. އޯލެވެލް އިމްތިހާނުތައް އޮންނާނީ މާޗު މަހުގެ 6 ވަނަ ދުވަހުގެ ނިޔަލަށެވެ.
މި އިމްތިހާން ބުދަ ދުވަހު ފެށި އިރު ޑިސެމްބަރު 25 ވަނަ ދުވަހު ދަރިވަރުންނާއި މުދައްރިސުން ވަނީ ދިރާސީ ކަލަންޑަރުގައި ވާ ގޮތަށް ބޮޑު ޗުއްޓީ އަށް ގޮސްފަ އެވެ. މި އާއެކު ގްރޭޑް 10 ގެ ދަރިވަރުންގެ އެންމެ ފަހުގެ ތައްޔާރީ ތަކުގައި އެހީތެރިވެވޭނެ ނިޒާމެއް ނެތް ކަމަށް ބުނެ ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ.
ގްރޭޑް 10 ގެ ދަރިވަރުންގެ އިމްތިހާނަށް ތައްޔާރުވާން ލިބޭ އެންމެ މުހިންމު ދުވަސްވަރު ޗުއްޓީ އާ ދިމާވުމާ އެކު ބެލެނިވެރިންނާއި ދަރިވަރުން ތިބީ ވަރަށް ބޮޑު ކަންބޮޑުވުމެއްގެ ތެރޭގައި ކަމަށް ނިމިދިޔަ ސަރުކާރު ގެ އެޑިއުކޭޝަން މިނިސްޓްރީ ގެ ޑެޕިއުޓީ މިނިސްޓަރު މުހައްމަދު އިހުސާން ވެސް މީގެ ކުރިން ވިދާޅުވެފައި ވެ އެވެ. ނަމަވެސް މި މައްސަލައާ ގުޅޭގޮތުން އެޑިޔުކޭޝަން މިނިސްޓްރީގެ ބަހެއް ވަނީ ލިބޭ ގޮތް ނުވެފަ އެވެ.
2021 ވަނަ އަހަރުގެ ތެރޭގައި ސްކޫލުތަކުގެ ބޮޑު ޗުއްޓީ ޖޫން، ޖުލައި އަށް ބަދަލުކުރީ ކޮވިޑް-19 އާ ގުޅިގެން އައި ބަދަލުތަކުގެ އިތުރުން ފަތުރުވެރިކަމުގެ ސިނާއަތުގައި މަސައްކަތް ކުރާ މީހުންނަށް ވަރަށް ބޮޑަށް ބުރަވާތީ ގިނަ ބަޔަކު އެކަމަށް އެދުމުން ކަމަށް އޭރުގެ ސަރުކާރުން ބުނެފައިވެ އެވެ.
4 އަހަރަށްފަހު މި ސަރުކާރުން ސްކޫލުތަކުގެ ޗުއްޓީ ޑިސެންބަރަށް ބަދަލު ކުރުމާ ގުޅިގެން ރަނގަޅަށް ސިލަބަސް ކަވަރު ނުކުރެވި، ސްކޫލުތަކުގެ ދަރިވަރުންނާ ޓީޗަރުންނަށް ވަރަށް ބޮޑަށް ބުރަ ވެފައިވާ ކަމަށް ގިނަ ބަޔަކު ބުނެ އެވެ. އަދި ސަރުކާރުތަކުން ސިޔާސީ ވަކި މަގުސަދެއް ހާސިލް ކުރުމަށް ދަރިވަރުންގެ ތައުލީމަށް ނޭދެވޭ އަސަރު ކުރާ ގޮތަށް ސްކޫލުގެ ސިސްޓަމާ ނުކުޅުމަށް ގިނަ ބަޔަކު ދަނީ ގޮވާލަމުންނެވެ.
