މި އަހަރުގެ ކިޔެވުން ނިމި ސްކޫލުތައް ބޮޑު ޗުއްޓީ އަށް، ގްރޭޑް 10ގެ ދަރިވަރުންގެ އިމްތިހާނަށް ތައްޔާރުވާން ލިބޭ އެންމެ މުހިންމު ދުވަސްވަރު ކަމަށްވާތީ ތިބީ މާޔޫސް ކަމުގައި
ބުރާސްފަތި ދުވަހު ރާއްޖޭގެ ހުރިހާ ސްކޫލެއް ގައި ވެސް ރިޕޯޓު ފޮތް ވަނީ ހަވާލުކޮށްފައި. މިއަހަރު 84،000 އެއްހާ ދަރިވަރުން ތައުލީމު ހާސިލްކޮށްފައިވާއިރު، 6،516 ދިވެހި ޓީޗަރުންނާއި 1،843 ބިދޭސީ ޓީޗަރުން ހަރަކާތްތެރިވި. މި ދުވަސްވަރަކީ ގްރޭޑް 10ގެ ދަރިވަރުންގެ އިމްތިހާނަށް ތައްޔާރުވާން ލިބޭ އެންމެ މުހިންމު ދުވަސްވަރު ނަމަވެސް ދަރިވަރުންގެ އެންމެ ފަހުގެ ތައްޔާރީ ތަކުގައި އެހީތެރިވެވޭނެ ނިޒާމެއް ނެތް.
ބެލެނެވެރިއަކު ސްކޫލު ދަރިވަރެއްގެ ރިޕޯޓު ފޮތް ބަލަނީ
ދިރާސީ އަހަރުގެ ކިޔެވުން ނިމި، ސްކޫލުތަކުގެ ބޮޑު ޗުއްޓީ ފަށައިފި އެވެ.
ބުރާސްފަތި ދުވަހު މާލެ އާއި އަތޮޅުތަކުގެ ހުރިހާ ސްކޫލެއްގައި އަހަރުގެ ކިޔެވުން ނިންމައި ވަނީ ރިޕޯޓު ފޮތް ހަވާލު ކޮށްފަ އެވެ.
އެކަޑަމިކް ކަލަންޑަރުގައިވާ ގޮތުން ސްކޫލްތަކުގެ ކިޔެވުން ފެށޭނީ 27 ޖެނުއަރީ 2026 ގަ އެވެ. އެހެންކަމުން ދަރިވަރުންނަށް މަސް ދުވަހުގެ ޗުއްޓީއެއް ލިބޭނެ އެވެ.
މީގެ އިތުރުން އަންނަ އަހަރުގެ ފުރަތަމަ ޓާމްގެ މިޑް ބްރޭކް ލިބޭނީ 24 މެއި 2026ން 30 މެއި 2026ށެވެ. އަދި ފުރަތަމަ ޓާމްގެ ކިޔެވުން ނިންމައި ޗުއްޓީ ލިބޭނީ 17 ޖުލައި 2026ން 1 އޯގަސްޓް 2026ށެވެ. މީގެ އިތުރުން ބޮޑު ޗުއްޓީ ލިބޭނީ 18 ޑިސެމްބަރު 2026ން 12 ޖެނުއަރީ 2027 ށެވެ.
އެޑިޔުކޭޝަން މިނިސްޓްރީން މައުލޫމާތުދޭ ގޮތުގައި މި އަހަރު ރާއްޖޭގެ ސްކޫލުތަކުގައި 84،000 އެއްހާ ދަރިވަރުން ތައުލީމު ހާސިލުކުރި އެވެ. އަދި އެ ދަރިވަރުންނަށް ކިޔަވައިދިނުމުގައި ދިވެހި 6،516 ޓީޗަރުންނާއި 1،843 ބިދޭސީ ޓީޗަރުން ހަރަކާތްތެރިވި އެވެ.
ދިވެހި ޓީޗަރުން ލިބުމުގައި ދަތިތައް ކޮންމެ އަހަރަކު ވެސް ކުރިމަތިވެ އެވެ. ޓީޗަރުން މަދުވުމުގެ ޝަކުވާ ބޮޑުވި ނަމަވެސް އެކަށީގެންވާ ހައްލެއް ހޯދިފައިނުވާ ކަމަށް ގިނަ ބެލެނިވެރިން ދަނީ ބުނަމުންނެވެ.
މީގެ އިތުރުން މި ދުވަސްވަރަކީ ގްރޭޑް 10ގެ ދަރިވަރުންގެ އިމްތިހާނަށް ތައްޔާރުވާން ލިބޭ އެންމެ މުހިންމު ދުވަސްވަރު ކަމަށްވާތީ ބެލެނިވެރިންނާއި ދަރިވަރުން ތިބީ ވަރަށް ބޮޑު ކަންބޮޑުވުމެއްގެ ތެރޭގައި ކަމަށް ނިމިދިޔަ ސަރުކާރު ގެ އެޑިއުކޭޝަން މިނިސްޓްރީ ގެ ޑެޕިއުޓީ މިނިސްޓަރު މުހައްމަދު އިހުސާން ވިދާޅުވެފައިވެ އެވެ. އަދި 28 ޖެނުއަރީ 2026 ގައި ސާނަވީ ނިންމާ އިމްތިހާނުތައް ގްރޭޑް 10 ގެ ދަރިވަރުން ފަށާނެ ކަމަށާއި، ދަރިވަރުންގެ އެންމެ ފަހުގެ ތައްޔާރީ ތަކުގައި އެހީތެރިވެވޭނެ ނިޒާމެއް ނެތް ކަމަށް އޭނާ ވިދާޅުވި އެވެ.
ނަމަވެސް މި މައްސަލައާ ގުޅޭގޮތުން އެޑިޔުކޭޝަން މިނިސްޓްރީގެ ބަހެއް ވަނީ ލިބޭ ގޮތް ނުވެފަ އެވެ.
2021 ވަނަ އަހަރުގެ ތެރޭގައި ސްކޫލުތަކުގެ ބޮޑު ޗުއްޓީ ޖޫން، ޖުލައި އަށް ބަދަލުކުރީ ކޮވިޑް-19އާ ގުޅިގެން އައި ބަދަލުތަކުގެ އިތުރުން ފަތުރުވެރިކަމުގެ ސިނާއަތުގައި މަސައްކަތް ކުރާ މީހުންނަށް ވަރަށް ބޮޑަށް ބުރަވާތީ ގިނަ ބަޔަކު އެކަމަށް އެދުމުން ކަމަށް އޭރުގެ ސަރުކާރުން ބުނެފައިވެ އެވެ. 4 އަހަރަށްފަހު މި ސަރުކާރުން ސްކޫލުތަކުގެ ޗުއްޓީ ޑިސެންބަރަށް ބަދަލު ކުރުމާ ގުޅިގެން ރަނގަޅަށް ސިލަބަސް ކަވަރު ނުކުރެވި، ސްކޫލުތަކުގެ ދަރިވަރުންނާ ޓީޗަރުންނަށް ވަރަށް ބޮޑަށް ބުރަ ވެފައިވާ ކަމަށް ގިނަ ބަޔަކު ބުނެ އެވެ. އަދި ސަރުކާރުތަކުން ސިޔާސީ ވަކި މަގުސަދެއް ހާސިލް ކުރުމަށް ދަރިވަރުންގެ ތައުލީމަށް ނޭދެވޭ އަސަރު ކުރާ ގޮތަށް ސްކޫލުގެ ސިސްޓަމާ ނުކުޅުމަށް ގިނަ ބަޔަކު ދަނީ ގޮވާލަމުންނެވެ.
