އެކި ދާއިރާތަކުން އަލަށް މަތީ ތަޢުލީމުގެ 13 ޕްރޮގްރާމެއް ކްލިކުން އިފްތިތާޙްކޮށްފި
14 ސެޕްޓެމްބަރު 2017 | ބުރާސްފަތި 03:11ޔުނިވާސިޓީ ޕްރިޕަރޭޝަން ޕްރޮގްރާމް ވެސް ވަނީ ތަޢާރަފްކޮށްފަ
މަތީ ތަޢުލީމުގެ 13 ޕްރޮގްރާމެއް ކްލިކުން އިފްތިތާޙްކޮށްފި
ތަފާތު އެކި ދާއިރާތަކުން އަލަށް މަތީ ތަޢުލީމުގެ 13 ޕްރޮގްރާމެއް ކްލިކުން އިފްތިތާޙްކޮށްފިއެވެ.
ކްލީކް ކޮލެޖްގައި ބުދަ ދުވަހު ބޭއްވި ރަސްމިއްޔާތުގައި މިޕްރޮގްރާމްތައް ރަސްމީކޮށް އިފްތިތާޙުކޮށްދެއްވީ ކްލީކްގެ ވައިސް ޕްރެސިޑެންޓް ޙަސަން ޢަބްދުﷲ ސަޢީދުއެވެ.
ސައީދު ދެއްކެވި ވާހަކަފުޅުގައި އަލަށް ތަޢާރަފުކުރި ޕްރޮގްރާމްތަކުގެ ކޯސް ކޮންޓެންޓާއި ކިޔަވައިދެވޭ ބައިތައް ކަނޑައެޅުމުގައި އޮސްޓޭލިއާއާއި އިނގިރޭސިވިލާތުގެ ކަރިއިކުލަމްތައް ދިރާސާކޮށްފައިވާނޭކަމަށެވެ.
ފައުންޑޭޝަން ސްޓަޑީސް ސެޓްފިކެޓް ލެވެލް 3 އަދި 4 ގެ ޕްރޮގްރާމްތަކުގެ ގޮތުގައި ތަޢާރަފްކޮށްފައިވަނީ:
- އާރލީ ޗައިލްޑްހުޑް އެޑިޔުކޭޝަން
- އެޑިޔުކޭޝަން މެނޭޖްމަންޓް
- ބިޒްނަސް މެނޭޖްމަންޓް
- ބޭންކިންގ އެންޑް ފައިނޭންސް
- ސޯޝަލް ސާރވިސް
- މާރކެޓިންގ
- ހިއުމަން ރިސޯސް މެނޭޖްމަންޓް
- ޓްރެވަލް އެންޑް ޓުއަރިޒަމް
- އިންފޮރމޭޝަން ޓެކްނޮލޮޖީ
އެޑްވާންސް ޑިޕްލޮމާ ލެވެލް އިން އަލަށް ތަޢާރަފުކޮށްފައިވަނީ:
- އިނގިރޭސިވިލާތުގެ އޭސީސީއޭ ޕްރޮގްރާމްގެ ސްކިލްސް ލެވެލް
ޑިގްރީ ލެވެލް އިން އަލަށް ތަޢާރަފްކޮށްފައިވަނީ:
- ބެޗްލާރސް އޮފް އިންފޮމޭޝަން ޓެކްނޮލޮޖީ – މޯބައިލް އެޕްލިކޭޝަން ޑިވެލޮޕްމަންޓް
- ބެޗްލާރސް އޮފް އިންފޮމޭޝަން ޓެކްނޮލޮޖީ – ގްރެފިކްސް އެންޑް މަލްޓިމީޑިއާ
ޚާއްސަ ޕްރޮގްރާމެއްގެ ގޮތުގައި ޔުނިވާސިޓީ ޕްރިޕަރޭޝަން ޕްރޮގްރާމް ވެސް ވަނީ ތަޢާރަފްކޮށްފައެވެ.
މި ޕްރޮގްރާމްތަކަކީ ސާނަވީ ތަޢުލީމު ނިންމާ ދަރިވަރުންގެ ތެރެއިން އެދެވޭ ނަތީޖާއެއް ނުލިބުމުގެ ސަބަބުން ޔުނިވާސިޓީ ތަޢުލީމުގެ ތެރެއަށް ވަނުމަށް ޝަރުތު ހަމަނުވާ ދަރިވަރުންނަށްވެސް ޑިގްރީ ޙާޞިލްކުރުމަށް އަޅައިދެވޭ ބިންގަލެއް ކަމަށް ކްލިކުން ބުންޏެވެ.
މީގެ އިތުރުން ދަރިވަރުންނަށް މަތީތަޢުލީމަށް ކުރަން ޖެހޭ ހޭދަ ވީހާވެސް ލުއިކޮށްދިނުމަށްޓަކައި ފެމިލީ ޑިސްކައުންޓް ސްކީމާއި ކޯޕަރޭޓް ޑިސްކައުންޓް ސްކީމެއް މިއަހަރު ވަނީ ތަޢާރަފުކޮށްފައެވެ.
މިހާރު ކްލީކުން ލިބެންހުރި މަތީތަޢުލީމުގެ އެކި ފުރުސަތުތަކާއި އަލަށް މި ތަޢާރަފްކުރެވުނު 13 ޕްރޮގްރާމާއިއެކު އަމާޒަކީ، ވަކި ފަންތިއެއް ވަކި ގިންތިއެއް އިސްތިންނާކުރުމެއް ނެތި، ރާއްޖޭގެ ވަޒީފާގެ ބާޒާރާއި މަސައްކަތުގެ މާޙައުލަށް ބޭނުންވާ ޤާބިލް ހުނަރުވެރި ޖީލެއް ބިނާކޮށްދިނުން ކަމަށް އެކޮލެޖުން ބުންޏެވެ.
