ދިވެހީންގެ ރާއްޖެ، ދިވެހީންގެ ބޭންކު، އެކަމަކު ހުރިހާ މޮޅެއް ޗައިނާ ގެ ކުންފުނިތަކަށް!

ބުނާ ގޮތުން ބޭންކް އޮފް މޯލްޑިވްސް އަކީ ދިވެހީންގެ ބޭންކެވެ. ދިވެހިންގެ ލާބަޔާ މަންފާ އަށް ހިންގާ ބޭންކެވެ. ދިވެހީންގެ ރާއްޖޭގައި ހިންގާ ދިވެހީންނަށް އިސްކަންދޭ ބޭންކެވެ.

ބަޔަކަށް ހައިރާންކަން ލިބުނެއް ކަމަކު ބޭންކުން ދިވެހިންނަށް ފޯރުކޮށްދޭ ޚިދުމަތްތައް ފުޅާ ކުރަމުން ގޮސް މިހާރު އެންމެ ފަހުން މިވަނީ ރިއަލް އެސްޓޭޓްގެ ތެރެއަށް ވެސް ވަދެފަ އެވެ. ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ފްލެޓު އެޅުމަށް "ބީއެމްއެލް އެފޯޑަބަލް ހޯމް ލީސިން ކޮމްޕެނީ ޕްރައިވެޓް ލިމިޓެޑް" ގެ ނަމުގައި މިދިޔަ އަހަރު ވަނީ ކުންފުޏެއް ވެސް އުފައްދައިފަ އެވެ.

ދެން އިވުނީ، ޗައިނާގެ މަޝްހޫރު ދެ ކުންފުންޏެއް ކަމަަށްވާ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާއި ޗައިނާ މެޝިނަރީ އިންޖީނިއަރިން ކޯޕަރޭޝަން (ސީއެމްއީސީ) އާ ޖުމްލަ ދެހާހަށް ވުރެ ގިނަ ހައުސިންގ ޔުނިޓް ތައް އެޅުމުގެ މަޝްރޫއު ބީއެމްއެލް އިން އުފެެއްދި ސަބްސިޑިއަރީ ކުންފުނިން ހަވާލު ކުރި ވާހަކަ އެވެ.

ބީއެމްއެލް އިން ބުނި ގޮތުގައި، ބީޔޫސީޖީއާ ހަވާލުކުރީ ހުޅުމާލޭ ޒޯން 2ގެ ޖުމްލަ 13،475 އަކަފޫޓުގެ ސަރަހައްދެއްގެ ހަތަރު ބިމެއްގައި 1،117 ހައުސިން ޔުނިޓު އިމާރާތް ކުރާށެވެ. ސީއެމްއީސީ އަށް ހުޅުމާލޭގައި އިމާރާތް ކުރަން ހަވާލު ކުރީ 1،224  ހައުސިން ޔުނިޓެވެ. ރާއްޖޭގެ ނިސްބަތުން ބޮޑެތި އިންފްރާސްޓްރަަކްޗަރ ޑިވެލޮޕްމަންޓް ޕްރޮޖެކްޓްތަކެކެވެ.

މަޝްރޫއު ހަވާލު ކުރި އެއް ކުންފުނިި ކަމުގައިވާ ބީޔޫސީޖީ އަކީ ފުނަދޫ އާއި ވެލާނާ އިންޓަރނޭޝަނަލް އެއަރޕޯޓް އާއި މާލެ އާއި މޮނޮ ރޭލަކުން ގުޅާލުމަށް ކުރިން ހަވާލު ކުރި ކުންފުންޏެވެ. މަޝްރޫއު ހަވާލު ކުރި އަނެއް ކުންފުނި ކަމުގައިވާ ސީއެމްއީސީ އަކީ ގުޅީފަޅުގެ މަގުތަކާއި، މުނިސިޕަލް އިންފްރާސްޓްރަކްޗަރ ހެދުމުގެ މަސައްކަތް ހަވާލު ކުރުމުގެ އިތުރުން ހުޅުމާލޭގެ ފިފްތު ޕަވަރ ޑިވެލޮޕްމަންޓް މަޝްރޫއު އާއި  ފުށި ދިއްގަރު މަޝްރޫއު ފަދަ ބޮޑެތި މަޝްރޫއުތައް ހަވާލު ކުރި ކުންފުންޏެވެ.

ބޭންކުން ކަނޑައަޅާ ކޮންޓްރޯލް އަގުތަކެއްގައި މަޝްރޫއުތައް ޗައިނާ ގެ ކުންފުނިތަކާ ހަވާލު ކުރި ކަމަށް ބުނި  ނަމަވެސް މި މަޝްރޫއުތަކަށް ޗައިނާގެ ކުންފުނިތައް ހޮވީ ކިހިނެއް ކަމެއް ނޭނގެ އެވެ.  އަދި އެ ކުންފުނިތަކަށް މަސައްކަތް ހަވާލު ކުރީ ކޮން އަގެއްގައި ކަމެއް ވެސް ނޭނގެ އެވެ.

ޗައިނާ ކުންފުނިތަކާ މަޝްރޫއު ހަވާލު ކުރިކަން ވެސް އޮތީ ސިއްރު ކޮށްފަ އެވެ. އެކަން އާންމުންނާ ހަމައަށް ތިލަވީ ވެސް މީޑިއާ ތަކުން ބޭންކަށް ސުވާލު ކުރުމުންނެވެ.

މީޑިއާ ތަކުން ކުރި ސުވާލުތަކަށް ދިން ޖަވާބުގައި ރެގިއުލޭޓަރީ އިދާރާތަކުން ކަނޑައަޅާފައިވާ ރިޕޯޓިން އަދި މައުލޫމާތު ހާމަކުރުމުގެ އެންމެހާ މިންގަނޑުތަކަށް ބީއެމްއެލް އިން އަމަލު ކުރާ ކަމަށް ބުނި އިރު، ހައުސިންގ މަޝްރޫއުތަކަށް ކޮންޓްރެކްޓަރުން ސިއްރުން ހޮވި ސަބަބެއް ބީއެމްއެލް އަށް ބުނެދެވިފަ އެއް ނުވެ އެވެ. ގުޑް ގަވަނަންސް ގެ އެންމެ އަސާސީ ސިފައަކީ ކޮމްޕެޓިޓިވް އުސޫލުން ދެފުށް ފެންނަ ގޮތަށް ޚާއްސަ ކޮށް މިފަދަ ބޮޑެތި މަޝްރޫއުތައް ކުރިއަށް ގެންދިއުން ކަމަށްވާއިރު ބީއެމްއެލް ފަދަ ޕްރޮފެޝަނަލް މުއައްސަސާ އަކުން އެކަން ސިއްރުން ކުރަންވީ ކީއްވެބާވަ އެވެ؟

ކަންކަން އަޑިނޭނގޭ ގޮތަށް ގެންދިއުމަކީ މިހާރު ރާއްޖޭގައި އޮތް ސަރުކާރުން ވެސް ނުހަނު ބޭނުންވާ އަދި އަަމަލު ކުރާ ގޮތެއް ކަމަށް ވެފައިވާއިރު، އަދި ބޭންކުގެ މައްޗަށް ސަރުކާރުގެ އިންތިހާ ނުފޫޒު އޮތް ކަން ދޭހަވާ ކިތަންމެ ކަމެއް މިދިޔަ ދޮޅު އަހަރެއްހާ ދުވަހުގެ ތެރޭގައި ހިނގާފައިވާއިރު، ރައްޔިތުންގެ ހިއްސާ ބޮޑު ބީއެމްއެލް އިން ސަރުކާރުގެ އަޑި ނޭނގޭ ސިޔާސަތު ތަންފީޒު ކުރަމުން ދެއްކި ބަހަނާ އަކީ "ކަނޑައެޅިފައިވާ އުސޫލުގެ ތެރެއިން ހާމަކުރަން ޖެހޭ މައުލޫމާތު ފިޔަވައި، ބޭންކުގެ ވިޔަފާރިއާ ގުޅުންހުރި ކޮމާޝަލް މައުލޫމާތު ހާމަކުރުމަކީ ވާދަވެރި މާކެޓެއްގައި އެ ބެންކަށް އޭގެ ގެއްލުން ލިބިދާނެ ކަމެކެވެ." މާނަ އަކީ ކޮމާޝަލް ސިއްރަކަށް ވާތީ ޗައިނާ ކުންފުނިތައް ހޮވުނު ގޮތާއި އެ ކުންފުނިތަކަށް ލިބޭ މާލީ ބޮޑު ފައިދާ ބީއެމްއެލް އިން ސިއްރު ކޮށްދޭނެ ކަމެވެ. 

ޗައިނާ އިން އެތައް މިލިއަން ޑޮލަރުގެ ލޯނު ނަގައިގެން ރާއްޖޭގައި ހިންގި އެއްވެސް އިންފްރާސްޓްރަކްޗަރ މަޝްރޫއަކަށް ދިވެހި ކުންފުންޏެއް ހޮވާފައެއް ނުވެ އެވެ. ފުރުސަތެއް ވެސް ނުދެ އެވެ. ނުވި ތާކަށް މަސައްކަތު މީހުންނާއި ހިކި މިރުހާއި ދަތްއުނގުޅާ ބޭހަށް ދަންދެން ވެސް ގެނެސްފައި ވަނީ ޗައިނާ އިންނެވެ. ޗައިނާ އިން ރާއްޖެ އަށް ދިން ހުރިހާ މާލީ އެހީ އެއް ބައްޓަން ކޮށްފައި އޮތީ އެ ހުރިހާ ފައިސާ އެއް އެނބުރި ޗައިނާ އަށް ޗެނެލްވާ ގޮތަށެވެ. ޗައިނާގެ ކުންފުނިތަކަށާއި ޗައިނާ މީހުންނަށާއި ޗައިނާ އަށް ފައިދާވާ ގޮތަށެވެ. އެއީ ލޯނު ދޫކުރުމުގެ އުސޫލު ކަމަށްވާތީ އެއަށް ތަބާވެގެން އެ ގޮތަށް ރުހިގެން ތިބީ ކަމަށްވެދާނެ އެވެ.

ޗައިނާ އިން ޗައިނާގެ ފައިސާ ޗައިނާ އަށް ފައިދާވާ ގޮތަށް އުސޫލުތައް ކަނޑައަޅާފައިވާ ބީދައިން، ގައުމީ ލޯބީގައި، ވަތަނީ ރޫހުގައި ގައުމެއް ހިންގަމުންދާ ސަރުކާރެއް އޮއްވާ ދިވެހިންނަށް ފައިދާވާ ގޮތަށް ދިވެހީންގެ ބޭންކުގެ ފައިސާ އިންވެސްޓް ނުކުރެވޭންވީ ކީއްވެ ހެއްޔެވެ؟ އެއާ ޚިލާފަށް ބީއެމްއެލް އިން ދިވެހި ކުންފުނިތަކަށް އިސްކަން ނުދިންތާ އެ ފުރުސަތައް ބިޑު ކޮށްލުމުގެ ފުރުސަތުވެސް ނުދިނެވެ. ރާއްޖޭގެ ފައިސާ ބޭނުން ކޮށްގެން ހިންގާ މިފަދަ މަސައްކަތްތަކަށް ދިވެހި ކުންފުނިތަކަށް ފުރުސަތު ފަހި ނުވާނަމަ އެ ކުންފުނިތަކުގެ ގާބިލުކަން ކުރި އަރާނީ ކިހިނެއްބާވަ އެވެ؟ ބީއެމްއެލް އިން ފަންޑު ކޮށްގެން ހިންގާ މަޝްރޫއެކޭ ޗައިނާ އިން ލޯނު ނަގައިގެން ހިންގާ މަޝްރޫއެކޭ އޮތީ ކޮން ތަފާތެއް ތޯއެވެ؟ ހުރިހާ މޮޅެއް ހުރިހާ ފައިދާ އެއް ޗައިނާ އަށެވެ.

ބީއެމްއެލް އިން ޗައިނާ ގެ ދެ ކުންފުންޏަކަށް ބޮޑު ދެ މަޝްރޫއު ހަވާލު ކުރި އިރު ޗައިނާ އިން ދިވެހިރާއްޖެ އާ އެކު ބާއްވާ ގުޅުމަށް ސްޓްރެޓީޖިކް ގޮތުން ބޮޑު ބަދަލެއް އައިސްފައިވާ ކަން ތަޖުރިބާކާރުން އޮތީ ފާހަގަ ކޮށްފަ އެވެ. ކުރިން ބޮޑެތި އަދަދު ތަކުން ލޯނު ދީގެން ޗައިނާ ކުންފުނިތައް މެދުވެރިކޮށް އެ ފައިސާ އޭގެ އަގުގެ އެތައް ގުނަ އިތުރަށް ޗައިނާ އަށް އަނބުރާ ޗެނެލް ކުރުމުގެ ވިސްނުން ގެންގުޅުމަށް ފަހު، މިހާރު ބޮޑަށް އަމާޒު ހިފާފައި ވަނީ ލޯނު ނުދީ ރާއްޖެ އިން ޗައިނާގެ ކުންފުނިތައް މެދުވެރިކޮށް ފައިސާ ހޯދުމެވެ. ޗައިނާގެ ކުންފުނިތަކަށް ބަރޯސާވެގެން ބޮޑެތި މަޝްރޫއުތައް ހިންގޭނެ ގޮތް ހެދުމެވެ. ލޯނުތައް ތަންފީޒު ކުރަން ރާއްޖެ ގެނައި ޗައިނާގެ ބޮޑެތި ކުންފުނިތައް މަޝްރޫއުތައް ނިމުމުން ވެސް ރާއްޖޭގައި ގާއިމުވެ ތިބީ އެ ސިޔާސަތުގެ ދަށުން ކަމަށް ބެލެ އެވެ. މިހާރު އެކުންފުނިތަކުގެ މަގްސަދަކީ ރާއްޖެ އިން މަޝްރޫޢުތަކުގެ ކޮންޓްރެކްޓްތައް ހޯދުމެވެ. އޭގެ ނަތީޖާ މި ދަނީ ފެންނަމުންނެވެ. މާލީ އަދި ތަޖުރިބާގެ ގޮތުން ގާބިލުކަން ކުޑަ ދިވެހި ކުންފުނިތަކަށް ޗައިނާ ގެ ކުންފުނިތަކުގެ މައްޗަށް ކުރި ނުހޯދޭނެ ކަން އެމީހުންނަށް އެނގެ އެވެ. އެއާއެކު ކަރަޕްޝަން އިންތިހާ އަށް އަށަގަނެފައިވާ ތަނަކުން އުސޫލެއް ނެތި، އަޑިއަޑިން ހަދާ ޑީލުތަކުގެ ތެރެއިން އެމީހުންނަށް މަޝްރޫއުތައް ހޯދޭނެ ކަންވެސް އެމީހުންނަށް އެނގެ އެވެ.