ސަރުކާރުން ދަނީ ފްލެޓަށް ވައްދާ ކޮންމެ މީހެއްގެ ވޯޓު ކަށަވަރު ކުރަން މަސައްކަތް ކުރަމުން: އަމްރު
އަމްރު ވިދާޅުވީ ސަރުކާރުން ބޯހިޔާވަހިކަމުގެ ކަންކަން ހަމަޖައްސަނީ ސިޔާސީގޮތުން ވޯޓު ކަށަވަރުކުރުމަށް ކަމަށް. ރަސްމާލެފަދަ ބޮޑެތި މަޝްރޫޢުތައް ހިންގި ނަމަވެސް މައްސަލައަށް މިހާރުން މިހާރަށް ޙައްލެއް ނުލިބޭނެ ކަމަށާއި މި 5 އަހަރު ނިމޭއިރު ބޯހިޔާވަހިކަމުގެ މައްސަލައަށް ޙައްލެއް ނުލިބޭނެ ކަމަށް އޭނާ ވިދާޅުވި.
އެސްޓީއޯ ގެ ކުރީގެ މެނޭޖިންގ ޑިރެކްޓަރު ހުސައިން އަމްރު
4000 ފުލެޓަށް މީހުން ވައްދާ ނުނިމިގެން އުޅެނީ މި ސަރުކާރަށް ވޯޓު ކަށަވަރު ނުވާތީ ކަމަށާއި، ފުލެޓްތަކަށް ވައްދާ ކޮންމެ މީހެއް ނޯޓް ކޮށް ވޯޓު ކަށަވަރު ކުރަން މަސައްކަތް ކުރަމުންދާ ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު ވިދާޅުވެއްޖެ އެވެ.
ރާއްޖެޓީވީގެ ފަލަ ސުރުހީ ޕްރޮގްރާމުގައި ވާހަކަ ދައްކަވަމުން އަމްރު ވިދާޅުވީ މި ސަރުކާރުން ދެއިރު ދެ ދަޅައަށް ސިޔާސަތުތައް ބަދަލުވާ ކަމަށާއި، ޕްރެސް ކޮންފަރެންސްތައް ބާއްވާ ކަމަށެވެ. އެކަމަކު ޙަޤީޤީ މާނައިގައި ބޯހިޔާވަހިކަމުގެ އެންމެ މަޝްރޫޢެއް ވެސް އަދި މިހާތަނަށް މި ސަރުކާރަށް ނުހިންގޭ ކަމަށެވެ. އޭނާ ވިދާޅުވީ ޙަޤީޤީ މާނައިގެ އެންމެ ޢާއިލާއަކަށް ވެސް ބޯހިޔާވަހިކަމެއް އަދި ހޯދައެއް ނުދެވުނު އިރު، ސަރުކާރުން ބޭނުންވާ އެހެން ކަންކަން ކުރާ ތަން ފެންނަ ކަމަށެވެ.
އެގޮތުން ރަސްމާލެ ކިޔާ ބޮޑުސިންގާ ތަނެއް ހިއްކަމުންދާ ކަމަށާއި، އެކަމަކު އެތަނަކަށް އަދި މި ފަސް އަހަރު ވެސް އަދި މި އަންނަ ފަސް އަހަރު ވެސް މީހަކަށް ގޮސް އާބާދުވެ އެތަނުގައި ދިރިއުޅެން ނުފަށޭނެ ކަމަށް އަމްރު ވިދާޅުވި އެވެ. އޭނާ ވިދާޅުވީ ޖެހިގެން މިއުޅެނީ ބޯހިޔާވަހިކަމުގެ މައްސަލަ ކަމަށާއި، އެއީ ރަނގަޅަށް ޕްލޭން ނުކުރެވޭތީ ދިމާވެގެން އުޅޭ މައްސަލަ އެއް ކަމަށް އަމްރު ވިދާޅުވި އެވެ.
ދެން މިހާރުން މިހާރަށް ބޯހިޔާވަހިކަމެއް ނުވަތަ ވަންނާނެ ތަނެއް ނެތިފައި ތިބި ނުވަތަ ކުދިން އިންތިހާއަށް ބޮޑުވެގެން ހަދާނެ ގޮތެއް ނެތިގެން ދެކޮޅުނުޖެހިގެން އުޅޭ ބައިވަރު މިހެން އެބައުޅޭ. އެ މައްސަލަތަކަށް މިހާރުން މިހާރަށް ޙައްލު ހޯދައިދޭން މި ޖެހެނީ. އެހެންވީމާ، އަދި ބޮޑުސިންގާ ތަނެއްގައި ގުޅީ ކައިރީގައި އަދި ހިއްކިޔަސް މި މައްސަލައަކަށް ޙައްލެއް ނުލިބޭނެ. އެހެންވީމާ، އަސްލު މައްސަލައެއް ޙައްލު ހޯދައިދެވޭނީ އަސްލު ރައްޔިތުންގެ ކޮންސަރންތަކަށް ޙަޤީޤަތުގައި ވިސްނައިގެން. އެކަމަކު އަޅުގަނޑަށް ފެންނަނީ މި ސަރުކާރުގައި ބޯހިޔާވަހިކަމޭ ބުނާ ކޮންމެ ފަހަރަކު މި ސަރުކާރަށް ފެންނަނީ ވޯޓެއްގެ ގޮތުގައި. ބޯހިޔާވަހިކަން މި ކަށަވަރު މި ކޮށްދެނީ ވޯޓެއް ކަށަވަރުވީމަ. އެހެންވީމާ، އެއްކަލަ 4000 ވަނީ ނަލަ ހަދައި ނިމިފަ. މީހުންނަށް ދީފައި ހުރި ތަންތަން އަދިވެސް އެ އުޅެނީ މީހުން ނުވެއްދިގެން. އެއީ، ނޯޓުކުރަން އެބަޖެހޭ މީނާ އެ ތަނަށް ވައްދައިފިއްޔާ މީނާގެ ވޯޓު ކަށަވަރުވޭތޯ. އެކަން ނުވާހާ ހިނދަކު މި ސަރުކާރުން އެންމެ މީހަކަށްވެސް ބޯހިޔާވަހިކަމެއް ނުދޭނެ.އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު
އަމްރު ވިދާޅުވީ ބޯހިޔާވަހިކަމުގެ މައްސަލައަކީ ޙައްލުނުވާވަރުގެ މައްސަލައެއް ނޫން ކަމަށެވެ. އަދި މި މައްސަލަ ޙަޤީޤަތުގައި ޙައްލުނުވެގެން އުޅެނީ ސިޔާސަތުތައް ބަދަލުވާތީ ކަމަށާއި، ސިޔާސަތުތައް ބަދަލުވަނީ ސިޔާސީގޮތުން ވިސްނާތީ ކަމަށް އޭނާ ވިދާޅުވި އެވެ.
އަމްރު ވިދާޅުވީ ރައްޔިތުން އުޅޭ ހާލާ މެދު، ނޫނީ ރައްޔިތުން އެ ބޭނުންވާ ކަންކަމާ މެދު ސަރުކާރުން ވިސްނާނުލާ ކަމަށެވެ. 4000 ފްލެޓު ދީ ނިންމިޔަސް، 60،000 ޢާއިލާއަކަށް ބޯހިޔާވަހިކަން ދީ މައްސަލަ ހައްލުކުރަން އަދިވެސް ޖެހޭ ކަމަށެވެ. ނަމަވެސް އެވަރު މި ސަރުކާރަށް ނުވާ ކަމަށާއި، އަހަރު ވެގެންދާ އިރު ވެސް އެކަމުގެ އެއްވެސް ނިޝާނެއް ފެންނަން ނެތް ކަމަށެވެ.
އަމްރު ވިދާޅުވީ ބޯހިޔާވަހިކަމުގެ މައްސަލަ ހައްލުކުރަން މި ސަރުކާރުގެ ޕްލޭނެއް ނެތް ކަމަށެވެ. އަދި 2 އަހަރު ދިޔަ އިރު އައު ޕްލޭނެއް ނުވަތަ މިހާރުން މިހާރަށް ބޯހިޔާވަހިކަން ޙައްލުކޮށްދޭނެ ޕްލޭނެއް، އަދި ކުރިއަށް އޮތް 3 އަހަރު ކުރާނެ ކަމެއް ވެސް ހަދާނެ ގޮތެއް ވެސް މި ސަރުކާރަކަށް ނޭނގޭ ކަމަށެވެ. އޭނާ ވިދާޅުވީ މި 5 އަހަރު ނިމޭއިރުގައި ބޯހިޔާވަހިކަމުގެ އެއްވެސް ކަމަކަށް ޙައްލެއް ނުލިބޭނެ ކަމަށެވެ.
