ހުރިހާ މަޝްރޫއުތަކެއް ހަވާލުކޮށްފައި ވަނީ ޕްރޮސަސްގެ ތެރެއިން އެންމެ ގާބިލް ކުންފުނިތަކާ: ކުރީގެ އިސްލާމިކް މިނިސްޓަރު

އިސްލާމިކް މިނިސްޓްރީގެ ހުރިހާ މަޝްރޫއުތަކެއް ހަވާލުކޮށްފައި ވަނީ ޕްރޮސަސްގެ ތެރެއިން އެންމެ ގާބިލް ކުންފުނިތަކާ ކުރީގެ ރައީސް އިބްރާހިމް މުހައްމަދު ސާލިހު ސަރުކާރުގެ އިސްލާމިކް މިނިސްޓަރު ޑރ.އަހުމަދު ޒާހިރު އަލީ ވިދާޅުވެއްޖެ އެވެ.

ބުރާސްފަތި ދުވަހު ރާއްޖެ ޓީވީގެ ފަށާއިރު ޕްރޮގްރާމަށް ދެއްވި ޚާއްސަ އިންޓަވިޔު އެއްގައި ޑރ.ޒާހިރު ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި މަޝްރޫއުތައް ހަވާލު ކުރެވޭ ވަކި ޕްރޮސަސްއެއް އޮންނަ ކަމަށާއި، ހުރިހާ މަސައްކަތްތަކެއް ކުރިއަށް ގެންދިޔައީ އުސޫލުގެ ތެރެއިން ކަމަށެވެ.

މިނިސްޓްރީގެ ހުރިހާ މަޝްރޫއެއް ހަވާލުކޮށްފައިވަނީ އެކަމަށް ކުރިމަތިލާ ކުންފުނިތަކުގެ ތެރެއިން ބިޑަށް ގޮސްގެން އެންމެ ގާބިލް ކުންފުންޏާ ކަމަށް ޑރ.ޒާހިރު ވިދާޅުވި އެވެ.

މިހާރު ދިމާވެފައިވާ މައްސަލަ އަށް އިޝާރާތް ކުރައްވައި ޑރ.ޒާހިރު ވިދާޅުވީ މަސައްކަތް ކުރުމުން ކުންފުނި ތަކަށް ފައިސާ ދޭން ޖެހޭ ކަމަށާއި، ފައިސާ ނުދެވުން އެއީ މި ސަރުކާރުގެ މައްސަލަ އެއް ކަމަށެވެ. އެއީ ކުންފުނިތައް ނާގާބިލު ވެގެންވާ ކަމެއް ނޫން ކަމަށް އޭނާ ވިދާޅުވި އެވެ.

އެކަމަކު އަޅުގަނޑުމެންގެ ދުވަސްވަރު އޮންނަ ގޮތް ތަފާތު. އަޅުގަނޑުމެންގެ ދުވަސްވަރު ކޮންމެ ޕްރޮޖެކްޓެއް ވެސް ހަވާލުކުރެވޭނެ ގޮތްތަކެއް އޮވޭ. އުސޫލުތަކެއް އޮވޭ ކަނޑައެޅިފައި. އަނެއްކާ ހަމަ ހުރެފައި މިސްކިތެއް އަޅަން ދެނީއެއް ނޫން. ދުރާލާ ޕްލޭން ކޮށްގެން ރޭވިގެން ބަޖެޓު ކޮށްގެން ބަޖެޓުގައި ކޮން ރަށެއްގައި ކޮން މިސްކިތެއްކަން މިއެޅެނީ ކިހައި ބޮޑު މިނެއްގެ މިސްކިތެއްކަން މިހުރިހާ އެއްޗެއް ޕްލޭން ކުރެވިގެން ރޭވިގެން ކުރެވޭ ކަންތައްތައް އެއީ. އަޅުގަނޑުމެން ޓެންޑާ ބޯޑުން ފޮނުވައިގެން ފިނޭންސުން ދެން ޓެންޑާ ބޯޑުން ކަނޑައަޅާނީ އެބޭފުޅުން އިއުލާން ކުރާނީ. އިއުލާން ކުރީމަ ކުންފުނިތަކުން ހުށަހަޅާނީ. ކުންފުނިތަކުން ހުށަހެޅީމަ އެހުށަހަޅާ އެއްޗަކަށް ބަލާފައި ބިޑް ކާމިޔާބު ކުރަނީ. އެބޭފުޅުން ބަލާ މިންގަނޑުތަކަށް ބަލާފައި އުސޫލުތަކަށް ގާބިލު ކުންފުނިތަކަށް ހުރިހާ މިސްކިތްތައް ހަވާލުކުރެވިފައިވަނީ.

ކުރީގެ ރައީސް އިބްރާހިމް މުހައްމަދު ސާލިހު ސަރުކާރުގެ އިސްލާމިކް މިނިސްޓަރު ޑރ.އަހުމަދު ޒާހިރު އަލީ

ޑރ.ޒާހިރު ވިދާޅުވީ މަޝްރޫއުތައް ކުރިއަށް ގެންދިއުމުގައި ފަރުވާ ކުޑަ ކަމުގެ ޝަކުވާއެއް އަތުވެއްޖެނަމަ ނުވަތަ އެހެން ވެސް މައްސަލައެއް ފާހަގަ ކުރެވިއްޖެނަމަ މިނިސްޓްރީން ބަލަން ޖެހޭ ހުރިހާ ކަމެއް ބަލައި ފިޔަވަޅު އަޅާފައިވާ ކަމަށެވެ.

ޑރ. ޒާހިރު މިމޭރުން ވާހަކަ ދެއްކެވިއިރު، ބުދަ ދުވަހުގެ ޖަލްސާގައި އިސްލާމިކް މިނިސްޓަރު ޑރ.ޝަހީމް އަލީ ސައީދު ވިދާޅުވީ މިނިސްޓްރީގެ މަޝްރޫއުތައް ހަވާލުކޮށްފައި ވަނީ ގާބިލް ކުންފުނިތަކާ ނޫން ކަމަށެވެ.