ދަރުވާލާފައި ކިޔައިގެން މިނިސްޓަރު ޝަހީމް ބޭނުންކުރާ އިބާރާތަކީ ވަރަށް ނުބައި އިބާރާތެއް: ކުރީގެ މިނިސްޓަރު

އިސްލާމިކް މިނިސްޓްރީ ދަރުވާލާފައިވާ ކަމަށް ވިދާޅުވެ، މިނިސްޓަރު ޝަހީމް ބޭނުންކުރާ އިބާރާތަކީ ވަރަށް ނުބައި އިބާރާތެއް ކަމަށް ކުރީގެ ރައީސް އިބްރާހިމް މުހައްމަދު ސާލިހު ސަރުކާރުގެ އިސްލާމިކް މިނިސްޓަރު ޑރ.އަހުމަދު ޒާހިރު އަލީ ވިދާޅުވެއްޖެ އެވެ.

ރާއްޖެ ޓީވީގެ ފަށާއިރު ޕްރޮގްރާމަށް ދެއްވި ޚާއްސަ އިންޓަވިޔު އެއްގައި ޑރ.ޒާހިރު ވިދާޅުވީ ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި މިހާރުގެ އިސްލާމިކް މިނިސްޓަރު ޑރ. ޝަހީމް އަލީ ސައީދު ހެއްދެވީ ދޮގެއް ކަމަށާއި، މިނިސްޓްރީ 50 މިލިއަނުން ދަރުވާލާފައި ނުވާނެ ކަމަށެވެ.

އިސްލާމިކް މިނިސްޓްރީ ދަރުވާލާފައިވާ ކަމަށް ބުނެ މިނިސްޓަރު ޝަހީމް ބޭނުންކުރާ އިބާރާތަކީ ވަރަށް ނުބައި އިބާރާތެއް ކަމަށް ޑރ.ޒާހިރު ވިދާޅުވި އެވެ. އަދި ވިދާޅުވީ ކުރީގެ ސަރުކާރުގައި އިސްލާމިކް މިނިސްޓްރީގެ މަސައްކަތްތައް ހިންގަމުން ދިޔައީ ވަރަށް ތަރުތީބުން ކަމަށާއި، ވަރަށް ސިސްޓަމެޓިކް ކޮށް ކަމަށެވެ.

މީގެ އިތުރުން ޑރ.ޒާހިރު ވިދާޅުވީ މިއީ ހިނގަހިނގާ އޮތް ގައުމެއް ކަމަށާއި، މި ގައުމުގައި މިނިސްޓްރީން މަޝްރޫއުތައް ހިންގާނެ ކަމަށެވެ. އެ މަޝްރޫއުތައް ނިމުމުން ބިލުތައް ފޮނުވާނެ ކަމަށާއި، ބިލުތައް ލިބެމުންދާ ވަރަކަށް ފިނޭންސް މިނިސްޓްރީ އަށް ބިލު ފޮނުވާ ފައިސާ ދިނުމުގެ މަސައްކަތް ކުރާނެ ކަމަށެވެ. އެއީ މިނިސްޓްރީ ދަރުވާލުން ނޫން ކަމަށް އޭނާ ވިދާޅުވި އެވެ.

މަސައްކަތްތައް ދާ ވަރަކުން ބިލްތައް އައިމަ މިނިސްޓްރީން ވެރިފައި ކުރާނެ މަސައްކަތް ނިމިފައިތޯ ހުރީ. ކައުންސިލްތަކާ ވެސް ވާހަކަ ދައްކާނެ. ނިމިފައި ހުރި މިންވަރަކަށް ފައިސާ ދިނުމަށް ފިނޭންސްއަށް ފޮނުވާނީ. ފިނޭންސްއިން ފައިސާ ދޫކުރީމަ އިސްލާމިކް މިނިސްޓްރީން ފައިސާ ދޫކުރާނެ. އެތަންތަނަށް ޖަމާކުރާނެ. ނިމުނުއިރު އެ ވިދާޅުވާ އަދަދަކީ ވެސް ރަނގަޅު އަދަދެއް ނޫން. 50 މިލިއަނުން ފައިސާ ދައްކަން ހުރި ވާހަކަ. އަޅުގަނޑުމެން ދައުރު ނިމުނުއިރު، ގާތްގަނޑަކަށް 27 މިލިއަން ރުފިޔާގެ ބިލްތައް އައިސްފައި ހުންނާނީ. އޭގެފަހުން ޑިސެންބަރާއި ހަމައަށް އެއަހަރު ނިމުއިރު އިތުރު 5 މިލިއަނެއް އައިސްފައިވަނީ.

ކުރީގެ އިސްލާމިކް މިނިސްޓަރު ޑރ.އަހުމަދު ޒާހިރު އަލީ

ޑރ.ޒާހިރު ވިދާޅުވީ ރައީސް ސާލިހުގެ ސަރުކާރުގައި ވެސް ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގާފައިވާ މަޝްރޫއުތަކަށް ފައިސާ ދޫކޮށްފައިވާ ކަމަށެވެ. އެގޮތުން އުނގޫފާރުގައި އިމާރާތް ކުރި އިސްލާމީ މަރުކަޒަށް ފައިސާ ދެއްކިކަން ޑރ.ޒާހިރު ފާހަގަކުރެއްވި އެވެ.

ޑރ.ޒާހިރު ވިދާޅުވީ އިސްލާމިކް މިނިސްޓްރީން ކޮށްފައިވާ ދަތުރުތަކަކަށް ވެސް ފައިސާ ނުދައްކާ ހުރި ކަމަށާއި، އެ ދަތުރުތަކަށް ފައިސާ ދެއްކީ ރައީސް ސާލިހުގެ ސަރުކާރުގައި ކަމަށެވެ. މިއީ އަބަދުވެސް މިނިސްޓްރީތަކާއި މުއައްސަސާތައް ހިނގާނެ ގޮތް ކަމަށް އޭނާ ވިދާޅުވި އެވެ.