ބޮޑު ސޯބު އެނބުރޭ ގޮތަށް ކުދި ސޯބުތައް ވެސް އެނބުރޭނޭ ކަމަށާއި މި ސަރުކާރުގެ ކަންކަން ވަމުން ދަނީ އެފަދައިން ކަމަށް ވިދާޅުވެ ކުރީގެ އިސްލާމިކް މިނިސްޓަރު ޑރ އަހުމަދު ޒާހިރު އަލީ މި ސަރުކާރުގެ އިސްލާމިކް މިނިސްޓަރ ޑރ މުޙައްމަދު ޝަހީމް އަލީ ސައީދު އަށް ރައްދު ދެއްވައިފި އެވެ.

ބުދަ ދުވަހު ކުރިއަށް ގެންދިޔަ ރައްޔިތުން މަޖިލީހުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން، މިނިސްޓަރު ޝަހީމް ވިދާޅުވީ މިދިޔަ ސަރުކާރުގައި ދެ ޚުތުބާއެއް ނުކިޔަން ނިންމައި ފޮރުވާފައިވާ ކަމަށެވެ. އެއީ ރިބާގެ މައުޟޫއަށް އޮތް ޚުތުބާއެއްގެ އިތުރުން ވެރިމީހާގެ މަސްއޫލިއްޔާތު މި މައުޟޫއަށް އޮތް ޚުތުބާއެއް ކަމަށް ޝަހީމް ވިދާޅުވި އެވެ.

އެހެން ނަމަވެސް މި ސަރުކާރުގައި މިދިޔަ އަހަރުގެ ތެރޭގައި މި ދެ ޚުތުބާ ކިޔާފައިވާ ކަމަށް މިނިސްޓަރު ޝަހީމް ވިދާޅުވިއެވެ.

މިނިސްޓަރ ޝަހީމުގެ މިވާހަތަކަށް ރައްދުދެއްވައި ރާއްޖެ ޓީވީގެ ފަލަސުރުޚީ ޕްރޮގުރާމުގައި ވާހަދައްކަވަމުން އަހުމަދު ޒާހިރު އަލީ ވިދާޅުވީ މިދިޔަ ސަރުކާރުގައި ދީނީ ކަންކަމަށް ރައްޔިތުން ހޭލުންތެރި ކުރުވުމަށް ވަަރަށް ގިނަ މަސައްކަތްތަކެއް ކޮށް ވަރަށް ގިނަ ޕްރޮގްރާމުތައް ހިންގާފައިވާނޭ ކަމަށެވެ.

އެގޮތުން މީގެ ކުރިން، އެއްވެސް ދުވަސްވަރެއްގައި އިސްލާމިކް މިނިސްޓްރީން އިލްމުވެރިޔަކު ރާއްޖޭގެ އެއްވެސް ރަށަކަށް އަހަރަކު އެއްފަހަރު ވެސް ޒިޔާރަތްކޮށްފައި ނުވާ ކަން ފާހަގަ ކުރައްވައި އަހުމަދު ޒާހިރު ވިދާޅުވީ މިދިޔަ އެމްޑީޕީ ސަރުކާރުގައި ކޮންމެ އަހަރަކު މަދުވެގެން އެއްފަހަރު ޢިލްމުވެރިޔަކު ރަށަކަށް ޒިޔާރް ކޮށްފައިވާ ކަމަށެވެ.

އެހެންކަމުން މިކަމުން ވެސް އެނގިގެން ދަނީ މިދިޔަ ސަރުކާރުން އިލްމު ފެތުރުމަށް ގިނަ މަސައްކަތް ތަކެއް ކޮށްފައިވާކަން ކަމަށް އޭނާ ވިދާޅުވި އެވެ. އަދި ޚުތުބާއާ ގުޅޭގޮތުން މިނިސްޓަރު ޝަހީމް ދެއްކެވީ ދޮގު ވާހަކަތަކެއް ކަމަށާއި، އެކަމާ ހިތާމަ ކުރައްވާ ކަމަށް އޭނާ ވިދާޅުވި އެވެ.

އަހުމަދު ޒާހިރު ވިދާޅުވީ އެއްވެސް ޚުތުބާއެއް ފޮރުވާފައި ނޯންނާނެ ކަމަށާއި، އެއްވެސް ޚުތުބާއެއް ނުކިޔަން އަންގާފައި ވެސް ނުވާ ކަމަށެވެ.

ޒާހިރު ވިދާޅުވީ ފާހަގަކުރެއްވި ދެ ޚުތުބާގެ ތެރެއިން އެއް ޚުތުބާ ކަމުގައިވާ "ވެރިންގެ މަސްއޫލިޔަތު" މި މައުލޫއަށް ލިޔުއްވީ އިސްލާމިކް މިނިސްޓްރީގެ ކުރީގެ ސްޓޭޓް މިނިސްޓަރ ޝައިޚް އަނިލް ކަމަށާއި އަދި 2019 ވަނަ އަހަރު އެ ޚުތުބާ އިސްލާމީ މަރުކަޒުގައި ވިދާޅުވީ ވެސް ޝައިޚް އަނިލް ކަމަށެވެ.

މީގެ އިތުރުން ދެވަނަ އަށް މިނިސްޓަރ ޝަހީމް ވިދާޅުވި ރިބާގެ ޚުތުބާ 2022 ވަނަ އަހަރުގެ މެއި މަހުގެ 27 ވަނަ ދުވަހު ކިޔާފައިވާ ކަމަށް ޒާހިރު ވިދާޅުވި އެވެ. އަދި މި ޚުތުބާގައި ހުރި ބައެއް ވާހަކަތަކަށް ފާޑުކިޔައި ނޫސްތަކުގައި ވެސް ލިޔެފަ އެބަހުރި ކަމަށް ވެސް އޭނާ ވިދާޅުވި އެވެ.

ކަންމިހެން ހުރި އިރު މިނިސްޓަރ ޝަހީމް ދެއްކެވި އެ ވާހަތަތަކީ އެއްވެސް ވަރަކަށް ސާބިތު ހިފޭ ވާހަތަކެއް ނޫން ކަމަށް ޑރ އަހުމަދު ޒާހިރު އަލީ ވިދާޅުވެފަ އެވެ.