އިސްލާމިކް މިނިސްޓްރީން ގެންދިއުމަށް ހަމަޖެހިފައިވާ އެންމެ ބޮޑު ދެ ވަޤުފް މަޝްރޫއު ކަމަށްވާ ދާރުއްސަލާމް އަދި ދާރުލް އަރްޤަމް މަޝްރޫއު އަށް ބޭންކް އޮފް މޯލްޑިވްސް އިސްލާމިކް ރިއަލް އެސްޓޭޓް ފައިނޭންސިންގ ހަމަޖެއްސުމާ ގުޅޭ ގޮތުން އެއްބަސްވުމުގައި ސޮއިކޮށްފި އެވެ.

މިކަމަށްޓަކައި އިސްލާމީ މަރުކަޒުގެ ޖަލްސާކުރާ މާލަމުގައި ބުރާސްފަތި ދުވަހުގެ ހެނދުނު ކުރިއަށްދިޔަ ޚާއްސަ ރަސްމިއްޔާތެއް ގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. މުހައްމަދު ޝަހީމް އަލީ ސައީދުއެވެ. އަދި އެކުންފުނީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަދި މެނޭޖިންގ ޑިރެކްޓަރ މުހައްމަދު ޝަރީފް އެވެ.

މި އެއްބަސްވުމާ ގުޅޭގޮތުން މިނިސްޓަރު ޝަހީމް ވިދާޅުވީ، މިއީ ކުރިމަގަށް ހުޅުވިގެންދިޔަ ވަރަށް މުހިއްމު ސަފްހާ އެއް ކަމަށާއި، ރާއްޖޭގައި ކުރިއަށްދާ އެންމެ ބޮޑު ވަޤުފްގެ މަޝްރޫއުތައް ކުރިއަށް ގެންދިއުމަށް ބީއެމްއެލް އިން އެހީތެރިކަން ދިނުމަކީ ފާހަގަކޮށް ލެވޭ ކަމެއް ކަމަށެވެ. އަދި މިއީ މަޝްރޫއު ކުރިއަށް ގެންދިއުމަށް ލިބިގެންދިޔަ ބޮޑު ކުރިއެރުމެއް ކަން މިނިސްޓަރު ޝަހީމް ފާހަގަ ކުރެއްވި އެވެ.

މީގެ އިތުރުން މި އެއްބަސްވުމާއެކު ވަޤުފް މަޝްރޫއުތަކަށް އިސްލާމީ އުސޫލުގެ ދަށުން ފައިނޭންސިން ހަމަޖެހި މަސައްކަތް ކުރިއަށް ގެންދިއުމުގައި ބޮޑު ކުރިއެރުމެއް ލިބިގެންދާނެ ކަމަށާއި، އުންމީދަކީ އަދި އަމާޒަކީ ކުރިއަށް އޮތް ދެ އަހަރެއްހާ ދުވަހުގެ ތެރޭގައި ވަޤުފް މަޝްރޫއުތައް ނިމި މިކަމުގެ ނަފާ މުޅި ރާއްޖެއަށް ލިބިގެން ދިއުން ކަމަށް މިނިސްޓަރު ޝަހީމް ވިދާޅުވި އެވެ.

މީގެ އިތުރުން ބީއެމްއެލް ގެ ސީއީއޯ އަދި މެނޭޖިންގ ޑިރެކްޓަރ މުހައްމަދު ޝަރީފް ވިދާޅުވީ، ގައުމުގެ ތަރައްގީ އާއި އިޖުތިމާއީ ކުރިއެރުމަށް ރައްޔިތުންނަށް ފައިދާވާ މަޝްރޫއު ތަކުގައި ގައުމީ ބޭންކުގެ ގެ ހައިސިއްޔަތުން ބޭންކުން ބައިވެރިވެ އެހީތެރިކަން ދިނުމަކީ ބޭންކު ގެ އަމާޒެއް ކަމަށެވެ. އަދި މި އެއްބަސްވުމަކީ އިސްލާމީ ފައިނޭންސްގެ ދާއިރާއިން އެ ބޭންކު ކުރިއަށް ދިއުމަށް ކަޑައްތު ކުރެވުނު މުހިއްމު ހަރުފަތެއް ކަމަށެވެ.

މި އެއްބަސްވުމުގެ ދަށުން ބީއެމްއެލް އިސްލާމިކް އިން ވަޤުފު އިމާރާތްތައް ތަރައްގީ ކުރުމަށް އިސްލާމީ އުސޫލު ތަކުގެ ދަށުން 350 މިލިޔަން ރުފިޔާ ދިނުމަށް ނިންމާފައިވެ އެވެ.

އިސްލާމިކް މިނިސްޓްރީން މައުލޫމާތު ދޭ ގޮތުގައި، މިއީ އިސްލާމީ ދާއިރާއިން ކުރިއަށް ގެންދިއުމަށް ހަމަޖެހިފައިވާ އެންމެ ބޮޑު ދެ މަޝްރޫއެ އެވެ. މި އެހީތެރިކަމުގެ ތެރެއިން ހުޅުމާލޭގައި 12 ފަންގިފިލާ އިން ތަރައްގީ ކުރާ "ދާރުލްސަލާމް" އަދި މާލޭގައި 12 ފަންގިފިލާއިން ތަރައްގީ ކުރާ "ދާރުލްއަރްޤަމް" މަޝްރޫއު ކުރިއަށް ގެންދާނެ އެވެ. މި މަޝްރޫއުތައް ކުރިއަށް އޮތް ދެ އަހަރެއްހާ ދުވަހުގެ ތެރޭގައި ނިންމާލުމަށް އަމާޒު ހިފާފައިވާ ކަމަށް އިސްލާމިކް މިނިސްޓްރީން ބުނެ އެވެ.

މީގެ އިތުރުން މާލޭގައި ކީރިތި ގުރުއާނަށް ޚާއްސަ ވަޤުފް އިމާރާތެއް އެޅުމަށާއި އައްޑޫ، ފުވައްމުލައް، ތިނަދޫ، ކުޅުދުއްފުށި އަދި ގއ. ވިލިނގިލީގައި ވަޤުފް މަޝްރޫއު ފެށުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ނިންމަވާފަ އެވެ.