އެކަނިވެރި މައެއްގެ ޒާތީ މައުލޫމާތު ހާމަކުރެވުނީތީ ޝަހީމް މައާފަށް އެދިވަޑައިގެންފި
މިނިސްޓަރު ޝަހީމް ވިދާޅުވީ ޕޯސްޓު ކުރެއްވީ ފަގީރުންގެ ދަފުތަރުގައި ހިމަނަނީ ޝަރުއީ ގޮތުން ޝަރުތު ފުރިހަމަވާ ހައްގު މީހުންކަން ބަޔާންކޮށްދިނުމަށް ކަމަށް
އިސްލާމިކް މިނިސްޓަރު ޑޮކްޓަރު މުޙައްމަދު ޝަހީމް އަލީ ސައީދު
އެކައުންޓުގައި ފައިސާ ރޯލު ވާތީ ކަމަށް ބުނެ ޒަކާތު ފަންޑުން އެހީ ނުލިބުނުކަމުގެ ޝަކުވާ ކުރި އެކަނިވެރި މައެއްގެ ޒާތީ މައުލޫމާތު ހާމަކުރެވުނީތީ އިސްލާމިކް މިނިސްޓަރު މުހައްމަދު ޝަހީމް އަލީ ސައީދު މާފަށް އެދިވަޑައިގެންފި އެވެ.
މީސް މީޑިޔާގައި ޝަހީމް ކުރެއްވި ޕޯސްޓެއްގައި ވިދާޅުވީ އެއްވެސް މީހެއްގެ ޒާތީ މައުލޫމާތު ހާމަކުރުމަކީ އޭނާގެ މަގުސަދެއް ނޫން ކަމަށެވެ. އަދި އެ މައުލޫމާތު ހާމަކުރީ، އެ އަންހެން މީހާ ޒަކާތާ ގުޅިގެން ދެއްކި ވާހަކަތަކަކީ ހަގީގަތް އޮޅޭ ގޮތަށް ދެއްކި ވާހަކަތަކަކަށް ވާތީ ކަމަށް މިނިސްޓަރު ވިދާޅުވި އެވެ.
މިނިސްޓަރު ކުރެއްވި ޕޯސްޓުގައި ލިޔުއްވާފައިވަނީ އެ ބޭފުޅާގެ އިންސާނީ ޝުއޫރަށް ނުހަނު މަތީ ދަރަޖައަށް އިހުތިރާމުކުރައްވާ ކަމަށާއި އެކަމާ ގުޅިގެން ދެންނެވި ވާހަކައިން މި ނޫން މާނައެއް ނެގުނު ނަމަ، ނުވަތަ އެ ފަރާތުގެ ޒާތީ މައުލޫމާތު ހާމަކުރެވުނުކަމަށް ވާނަމަ، އެ ކަމަށް ނިހާޔަތަށް މައާފަށް އެދޭ ކަމަށެވެ.
ޝަހީމް ވިދާޅުވީ އެ ޕޯސްޓު ކުރެއްވީ ފަގީރުންގެ ދަފުތަރުގައި ހިމަނަނީ އެކަމަށް ޝަރުއީ ގޮތުން ޝަރުތު ފުރިހަމަވާ ހައްގު މީހުންކަން ބަޔާންކޮށްދިނުމާއި ރާއްޖޭގައި ޒަކާތުގެ ނިޒާމު ހިންގަން ތިބި މުވައްޒަފުން ކަންކަން ކުރަނީ ތެދުވެރިކަމާއެކު ބުނެދިނުމަށް ކަމަށެވެ. އަދި ރާއްޖޭގެ ޒަކާތު ފަންޑުން އެއްވެސް މީހަކަށް ދެރަކޮށް ކަންކަން ނުކުރާނެ ކަމަށް ވެސް ޝަހީމް ވިދާޅުވި އެވެ.
ވިލިމާލޭ ރައްޔިތުންނާ ބައްދަލުކުރެއްވުމަށް އާދިއްތަ ދުވަހުގެރޭ ރައީސް ޑރ. މުޙައްމަދު މުޢިއްޒު، ވިލިމާލޭގައި ބޭއްވި ޖަލްސާގައި އެކަނިވެރި މަޔަކު ޒަކާތު ފަންޑުން އެހީ ނުލިބުނުކަމުގެ ޝަކުވާ ކުރުމުން ޝަހީމް ވަަނީ ރައްދުގައި އެމީހާގެ ޒާތީ އެތައް މައުލޫމަތެއް ހާމަކުރައްވާފަ އެވެ.
މިހާރު ވެސް އަޅުގަނޑުމެން މި ތިބެނީ، ގާތްގަނޑަކަށް ހަތް ވަރަކަށް ދުވަސްވީ ފެނާ ނުލައި މި އުޅެނީ ހުރިހާ ކުދިން ގޮވައިގެން، ހުރިހާ ކުދިން މިހާރު ވެސް އެ ދަނީ މިސްކިތަށް ބީޗަށް ފާޚާނާ ކުރަން، އެކަމަކު އިސްލާމިކް މިނިސްޓްރީއަށް ޒަކާތުގައި ޖެހުނީމާ މި ބުނަނީ ހައްގެއް ނޫނޭ، އެކައުންޓު ރޯލްވެފައޭ މި ބުނަނީ، ކޮބައިތޯ އެކަނިވެރި މައިންގެ އިހުސާސްތަކަކީ؟ރައީސް މުޢިއްޒު، ވިލިނގިއްޔަށް ވަޑައިގެން ބޭއްވި ޖަލްސާގައި ވާހަކަ ދެއްކި އެކަނިވެރި މައެއް
އެގޮތުން އެ މީހާއަށް މިދިޔަ އަހަރު ޒަކާތު ހައުސްއިން ދިން ފައިސާ ގެ އަދަދާއި އެކަނިވެރި މަޔަކަށް ވީތީ އޭނާއަށް ކޮންމެ މަހަކު ދައުލަތުން ލިބޭ އެހީ އާއި އޭނާގެ މުސާރައާއެކު ލިބޭ ޖުމުލަ ފައިސާގެ އަދަދު ވެސް ޝަހީމް ހާމަކުރައްވާފައިވެ އެވެ. އަދި އެ އަންހެން މީހާގެ އަތުގައި އެއްކޮށްފައި ހުރި ފައިސާގެ އަދަދު ވެސް ޝަހީމް ހާމަކުރެއްވި އެވެ.
މިނިސްޓަރު ކުރެއްވި އެ ޕޯސްޓާ ގުޅިގެން ގިނަ ބައެއްގެ ފާޑުކިޔުން އޭނާއަށް އަމާޒުވި އެވެ. އެގޮތުން ފާޑުކީ ބައެއް މީހުން ވަނީ ޝަހީމް ކުރެއްވީ ވަރަށް ދަށު ދަރަޖައިގެ ކަމެއްގެ ގޮތުގައި ސިފަކޮށްފަ އެވެ. އަދި އެއީ މިނިސްޓަރެއްގެ ފެންވަރުގައި ހުންނަ މީހަކު ކޮށްގެންވާނެ ކަމެއް ނޫން ކަމަށް ވެސް ގިނަ ބަޔަކު ބުނެފައިވެ އެވެ. ޒާތީ މައުލޫމާތު ހާމަކުރުމަކީ ގާނޫނީ ގޮތުން ވެސް ކުށެއް ކަމަށް ބައެއް ފަރާތްތަކުން ފާހަގަކުރި އެވެ.
ޝަހީމްގެ ޕޯސްޓަށް ގިނަ ބަޔަކު ފާޑުކިޔަން ފެށުމުން އޭނާ ވަނީ އެ ޕޯސްޓު ޑިލީޓުކުރައްވާފަ އެވެ. އެކަމަކު އެ ޕޯސްޓުގެ ސްކްރީންޝޮޓްތައް ސޯޝަލް މީޑިއާގައި ވަރަށް ބޮޑަށް ދައުރުވެ، ގިނަ ބަޔަކަު އަންނަނީ ޝަހީމް އަށް ފާޑުކިޔަމުންނެވެ.
މި މައްސަލައިގައި ޒަކާތު ފަންޑުން އެހީ ދިނުމުގައި ހުރި އުސޫލުތަކާއި އެ އުސޫލުތައް ހަމަހަމަކަމާއެކު ތަންފީޒު ކުރުމާ ބެހޭ ގޮތުން ވެސް ގިނަ ބަޔަކު ސުވާލު އުފައްދާފައިވެ އެވެ.
