އެމްޑީޕީ އިން ޕްރައިމަރީތައް ބާއްވާތާ 20 އަހަރު، އުންމީދަކީ ޕްރައިމަރީ އިން ހޮވޭ ކެންްޑިޑޭޓުން ރަނގަޅު ނަތީޖާ އެއް ހޯދުން
އެމްޑީޕީގެ ލޯކަލް ކައުންސިލް އިންތިޚާބުގެ ޕްރައިމަރީ މިއަދު މެންދުރު ފަހު 2:30ން ރޭގަނޑު 8:00ށް ކުރިއަށް ދާނެ. ކައުންސިލް އިންތިޚާބަށް 510 އަށް ވުރެ ގިނަ ކެންޑިޑޭޓުންނާއި ޑަބްލިއުޑީސީ އަށް 190 އަށް ވުރެ ގިނަ ކެންޑިޑޭޓުން ހުށަހަޅާފައިވޭ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު ވާހަކަދައްކަވަނީ | އެމްޑީޕީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ޕްރައިމަރީތައް ބާއްވާތާ 20 އަހަރު ވެފައި ވާ ކަމަށާއި އުންމީދަކީ ޕްރައިމަރީ އިން ހޮވޭ ކެންޑިޑޭޓުން ރަނގަޅު ނަތީޖާ އެއް ހޯދުން ކަމަށް ލޯކަލް ކައުންސިލް އިންތިޚާބުގެ ކަންކަން ވިލަރެސްކުރާ ކޮމިޓީ ގެ މުގައްރިރު އަދި ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު ވިދާޅުވެއްޖެ އެވެ.
ފަލާހު އެފަދައިން ވިދާޅުވީ އެމްޑީޕީގެ ކަައުންސިލް އިންތިޚާބުގެ ޕްރައިމަރީ އާއި ގުޅޭ ގޮތުން، އެ ޕާޓީގެ ސެކްރެޓޭރިއެޓްގައި ހިއްސާކުރެއްވި ވީޑިއޯ މެސެޖެއްގަ އެވެ. އޭނާ ވިދާޅުވީ އެދިވަޑައިގަންނަވާ ގޮތަކީ ޕްރައިމަރީގައި ވީހާވެސް ގިނަ މީހުން ވޯޓުލުން ކަމަށެވެ. އަދި އެ ޕާޓީގެ ކަންކަން ހިނގާނީ ޕްރައިމަރީގެ އުސޫލުން ކަމަށް ވެސް ފަލާހު ވިދާޅުވި އެވެ. ޒަމާނުއްސުރެ ފެށިގެން އެމްޑީޕީ އިން ޓިކެޓް ދެނީ ޕްރައިމަރީ އިން މޮޅުވާ ބަޔަކަށް ކަމަށާއި ޕްރައިމަރީ އިން މޮޅުވާ ބަޔަކާއި އެކު މަސައްކަތް ކޮށް ކާމިޔާބު ހޯދުން މުހިންމު ކަމަށް އޭނާ ވިދާޅުވި އެވެ.
ޕްރައިމަރީ ގެ ވޯޓުލުން ކުރިއަށް ދާނީ މިއަދު މެންދުރު ފަހު 2:30 އިން ރޭގަނޑު 08:00 އަށެވެ. ކުރިއަށް އޮތް ކައުންސިލު އަދި ޑަބްލިޔުޑީސީ އިންތިޚާބުގައި އެމްޑީޕީގެ ކެންޑިޑޭޓުންގެ ގޮތުގައ އިންތިޚާބުގައި ވާދަ ކުރުމަށް ކައުންސިލް އިންތިޚާބަށް 510 އަށް ވުރެ ގިނަ ކެންޑިޑޭޓުން، ޑަބްލިއުޑީސީ އަށް 190 އަށް ވުރެ ގިނަ ކެންޑިޑޭޓުން ހުށަހަޅާފައިވެ އެވެ.
މާލޭގައި 17 ދާއިރާ އެއްގައި ޕްރައިމަރީ ކުރިއަށް ގެންދާނެ އެވެ. އެންމެ ގިނަ އަދަދެއްގެ ބަޔަކު ޕްރައިމަރީގައި ވޯޓު ލަނީ މާލެ އަށް ކަން ފާހަގަކޮށްލެވެ އެވެ. ވޯޓު ފޮށިތައް ބަހައްޓަން ހަމަޖެހިފައިވާ ގޮތަށް ބަލާ އިރު ޖުމްލަ ބަހައްޓަން ހަމަޖެހިފައި ވަނީ 65 ވޯޓު ފޮށްޓެވެ. އަތޮޅުތަކަށް 14 ފޮށި އަދި މާލޭގެ ދާއިރާތަކަށް ޚާއްސަކޮށްގެން މާލޭގައި 17 ވޯޓު ފޮށި ބެހެއްޓުމަށް ވަނީ ހަމަޖެހިފަ އެވެ. މާލެއިން ބޭރުގައި 34 ވޯޓު ފޮށި ބެހެއްޓުމަށް ވަނީ ހަމަޖެހިފަ އެވެ.
