ރައީސް މުއިއްޒުގެ ވެރިކަމުގައި ކައުންސިލްތަކުގެ ބާރު ހިނގަނީ ކައުންސިލްތަކުގެ އިދާރާގެ ގޭޓާ ހަމައަށް: ޣަފޫރު
12 ޖެނުއަރީ 2026 | ހޯމަ 07:45އެމްޑީޕީގެ ވަގުތީ ޗެއަރޕާސަން ޣަފޫރު ވިދާޅުވީ އެމްޑީޕީގެ ސަރުކާރުގައި ކައުންސިލްތަކުން ބާރުވެރިކަމާއެކު ވަރަށް ގިނަ މަސައްކަތްތައް ކުރެވުނު ކަމަށް. ރައީސް މުއިއްޒުގެ ވެރިކަމުގައި ކައުންސިލްތަކުގެ ބާރު ހަނިކޮށް މަސައްކަތަށް ހުރަސް އަޅަމުން ގެންދާ ކަމަށް. އަދި ކުރިއަށް އޮތް ކައުންސިލް އިންތިޚާބުގައި ރައީސް މުއިއްޒުގެ ކެންޑިޑޭޓުންނަށް ނޫނެކޭ ބުނަން ޖެހޭ ކަމަށް އޭނާ ވިދާޅުވި.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ވަގުތީ ޗެއަރޕާސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުއްޣަފޫރު މޫސާ ވާހަކަ ދައްކަވަނީ | އެމްޑީޕީ
ރައީސް މުއިއްޒުގެ ވެރިކަމުގައި ކައުންސިލްތަކުގެ ބާރު ހިނގަނީ ކައުންސިލްތަކުގެ އިދާރާގެ ގޭޓާ ހަމައަށް ކަމަށް އެމްޑީޕީގެ ވަގުތީ ޗެއަރޕާސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުއްޣަފޫރު މޫސާ ވިދާޅުވެއްޖެ އެވެ.
ހޯމަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ޣަފޫރު ވިދާޅުވީ ގިނަ ރަށްރަށުގައި ކައުންސިލްތަކުން ދެމުންއައި ޚިދުމަތްތަކާ މެދު ރައްޔިތުން ތިބީ ހިތްހަމަ ޖެހިގެން ކަމަށާއި، ކައުންސިލްގެ ޚިދުމަތް ނުލިބިގެން ރައްޔިތުން ޝަކުވާ ނުކުރާ ކަމަށެވެ.
އެމްޑީޕީގެ ސަރުކާރުގައި ކައުންސިލްތަކަށް ދިން ބާރުވެރިކަމާއެކު ވަރަށް ގިނަ މަސައްކަތްތައް ރަށު ތެރޭގައި ކުރެވުނުކަން ފާހަގަކުރައްވައި ޣަފޫރު ވިދާޅުވީ މީގެ ކުރިން ކުނި މެނޭޖް ނުކުރެވުމުގެ މައްސަލަ ވަރަށް ބޮޑު ކަމަށާއި، ނަމަވެސް ކައުންސިލްތަކުން އެމަސައްކަތް ކުރަން ފެށުމުން ކުޑަ ހަރަދަކާއެކު މުޅި ރަށް ސާފުވެ، އެ މައްސަލަ ހައްލު ވެގެން ދިޔަ ކަަމަށެވެ.
ނަމަވެސް ވެރިކަން ބަދަލުވެ، ރައީސް މުއިއްޒުގެ ވެރިކަމުގައި ކައުންސިލްތަކުގެ ބާރު ހަނިކޮށް މަސައްކަތަށް ހުރަސް އަޅަމުންދާ ކަމަށް އޭނާ ވިދާޅުވި އެވެ. އަދި ވިދާޅުވީ މިއަދު ކައުންސިލްތަކުގެ ބާރު ހިނގަނީ ކައުންސިލް އިދާރާގެ ގޭޓާ ހަމައަށް ކަމަށެވެ.
މީގެ އިތުރުން ޣަފޫރު ވިދާޅުވީ މިހާރު ވަރަށް ގިނަ ކައުންސިލަރުން ތިއްބެވީ ސަސްޕެންޑްގައި ކަަމަށާއި، ފިޔަވަޅު އަޅާފައިވަނީ ގާނޫނާ ހިލާފަށް ކަމަށެވެ.
އެހެން ނަމަވެސް މިއަދުގެ ހަގީގަތަކީ ކައުންސިލްގެ ބާރު މިއަދު ހިނގަނީ ކައުންސިލް އިދާރާގެ ގޭޓާ ހިސާބަށް. ސަރުކާރުން ބޭނުންވެއްޖެ ހިނދެއްގައި ކައުންސިލްގެ އިހުތިސާސްގެ ދަށުގައި ހުރި ބިން ބޭނުން ގޮތަކަށް ނަގާފައި ބޭނުން ފަރާތަކަށް ހަވާލުކުރެވޭ ގޮތަކަށް އޮތީ. އަދި އޭގެ އިތުރުން ރަށްރަށުގެ އިހުތިސާސްގެ ތެރޭގައި ހުރި ތަންތަން ވަރަށް ބޮޑަށް ހަނި ކުރެވި ވަރަށް ބޮޑަށް އެކަންކަން އުނި ކުރިވިފައިވަނީ. އެހެންވީމަ މިސަރުކާރަކީ އެއްވެސް ހާލަތެއްގައި ކައުންސިލްތައް ހިންގުމަށް މަގުފަހި ކޮށްދޭނެ ސަރުކާރެއް ނޫން. އެކަން ރައްޔިތުންނަށް ވަރަށް ބޮޑަށް ސާފުވާން ޖެހޭ.އެމްޑީޕީގެ ވަގުތީ ޗެއަރޕާސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުއްޣަފޫރު މޫސާ
މިސަރުކާރުން ރަށްރަށުގައި ފިތުނަފަސާދަ އުފެއްދުމަށް މަސައްކަތް ކުރާކަން ފާހަގަކުރައްވައި ޣަފޫރު ވިދާޅުވީ ތަރައްގީގެ މަޝްރޫއުތައް ކުރިއަށް ނުދަނީ ކައުންސިލްތަކުގެ ސަބަބުން ކަމަށް ރައީސް މުއިއްޒު ވިދާޅުވީ ރަށްރަށް ބޮޑަށް ދެބައި ކުރުމުގެ މަގުސަދުގައި ކަމަށެވެ.
އެހެންކަމުން ކުރިއަށް އޮތް ކައުންސިލް އިންތިޚާބުގައި ރައީސް މުއިއްޒުގެ ކެންޑިޑޭޓުންނަށް ނޫނެކޭ ބުނަން ޖެހޭ ކަމަށް އޭނާ ވިދާޅުވި އެވެ.
ޣަފޫރު ވިދާޅުވީ ކައުންސިލްތަކަކީ ސަރުކާރުން ބޭނުންވާ ގޮތަކަށް މަސައްކަތް ކުރަން ޖެހޭ ބައެއް ނޫން ކަަމަށާއި، އެއީ ރައްޔިތުން ބޭނުންވާ ގޮތަށް މަސައްކަތް ކޮށް ޚިދުމަތް ކުރުމަށް އިންތިޚާބު ކުރާ ބައެއް ކަމަށެވެ. އަދި ގައުމު ހިންގޭނީ ރައްޔިތުންގެ ބައިވެރިވުމާއެކު ކަމަށާއި، ރައްޔިތުން ބާކީ ކުރާނަމަ ގައުމު ކުރިއަށް ނުދާނެ ކަމަށް އޭނާ ވިދާޅުވި އެވެ.
މީގެ އިތުރުން ޣަފޫރު ވިދާޅުވީ އެމްޑީޕީގެ ފަރާތުން ކައުންސިލް އިންތިޚާބުގައި ވާދަ ކުރާ ހުރިހާ ކެންޑިޑޭޓުން ވެސް މަސައްކަތް ކުރާނީ ރައްޔިތުންގެ ހައްގުގައި ކަމަށާއި، އެމްޑީޕީގެ ސިޔާސަތަކީ ކައުންސިލްތައް ބާރުވެރިކުރުވައި ކައުންސިލްތަކަށް ދޭން ޖެހޭ އެންމެހައި ރައްކާތެރިކަން ދިނުމަށްފަހު ކައުންސިލްގެ ހިމާޔަތުގައި މަސައްކަތް ކުރުން ކަމަށެވެ.
މުޅި ދިވެހިރާއްޖޭގެ ލާމަރުކަޒީ ނިޒާމަށް ބަދަލުވާން ޖެހޭ ކަމަށް އެގޮތަށް މަސައްކަތް ކުރާނެ ކަމަށް އޭނާ ވިދާޅުވި އެވެ.
