ބްރޯޑްކޮމްގެ ރައީސް ޝަހީބު ފުލުހަކަށް ހަމަލާދިން ކަމަށް ބުނާ މައްސަލައެއް ބަލަން ފަށައިިފި
13 ސެޕްޓެމްބަރު 2017 | ބުދަ 08:42ފުލުހުން ވަނީ މިފަދަ މައްސަލައެއް ބަލާކަން ކަށަވަރުކޮށްދީފަ
ބްރޯޑްކާސްޓިންގ ކޮމިޝަންގެ ރައީސް މުހައްމަދު ޝަހީބު
ބްރޯޑްކާސްޓިންގ ކޮމިޝަންގެ ރައީސް މުހައްމަދު ޝަހީބު ފުލުހަކަށް ހަމަލާދިން ކަމަށް ބުނާ މައްސަލައެއް ފުލުހުން ތަހުގީގު ކުރަން ފަށައިފި އެވެ.
ފުލުސް މީހާ ހުށަހެޅި މައްސަލަ ބަލަމުންދާއިރު، ޝަހީބު ވެސް މައްސަލަ ހުށަހަޅުއްވާފައި އެވެ. މައުލޫމާތު ލިބިފައިވާ ގޮތުގައި ޝަހީބު ހުށަހެޅުއްވީ އޭނާއަށް ފުލުސް މީހާ ހަމަލާދިން ކަމަށް ވިދާޅުވެ އެ މައްސަލައެވެ.
ފުލުހުންގެ މީޑިއާ އޮފިޝަލަކު ވިދާޅުވީ ފުލުހަކަށް މީހަކު ހަމަލާދިން ކަމަށް ބުނާ މައްސަލައެއް ތަހުގީގުކުރަމުންދާ ކަމަށާއި އެ މައްސަލަ ހުށަހެޅުނީ އަންގާރަ ދުވަހު ކަމަށެވެ.
ފުލުހުންގެ އޮފިޝަލް ވިދާޅުވީ އެ މައްސަލައާ ގުޅިގެން އިތުރު މައުލޫމާތު މިވަގުތު ދެވެން ނެތް ކަމަށެވެ. އެހެންނަމަވެސް، އެއީ ޝަހީބާ ގުޅުން ހުރި މައްސަލައެއްކަން ފުލުހުން ދޮގެއް ނުކުރެ އެވެ.
ޝަހީބާ ފުލުހަކާ ދެމެދު ހިނގި އެ ހަމަނުޖެހުމުގެ މަންޒަރު ފެނުނު މީހަކު ބުނީ ސޯސަންމަގު އެމްޑީޕީ އޮފީސް ކައިރީ ހުންނަ ގެއަކަށް ޝަހީބު ވަޑައިގެންނެވި ކަމަށާއި އެ ގެއަށް ވަދެވަޑައިގެންނެވިތާ އިރުކޮޅެއް ވެސް ނުވަނީސް ފެނުނީ ދުވެވަޑައިގަންނަވަމުން ނިކުންނެވި މަންޒަރު ކަމަށެވެ.
ޝަހީބުގެ ފަހަތުން އެހެން މީހަކު ކަތުރެއް ހިފައިގެން އެގެއިން ދުވެފައި ނިކުތް މަންޒަރު ފެނުނު ކަމަށާއި ޝަހީބާއި އެ މީހާއާ ދެމެދު ހަމަނުޖެހުން ހިނގި ކަމަށް މަންޒަރު ދުށް މީހާ ބުންޏެވެ.
މައުލޫމާތު ލިބިފައިވާ ގޮތުގައި ޝަހީބުގެ ފަހަތުން ކަތުރެއް ހިފައިގެން ދިޔައީ ފުލުހުންގެ ސްޕަޝަލް އޮޕަރޭޝަންސް(އެސްއޯ) ގައި މަސައްކަތް ކުރާ ފުލުހެކެވެ.
މިކަމާ ގުޅޭ ގޮތުން ޝަހީބުގެ ބަހެއް ހޯދުމަށް ތަކުރާރުކޮށް ރާއްޖެއެމްވީއިން މަސައްކަތް ކުރި ނަމަވެސް، ޝަހީބުގެ ބަހެއް ލިބޭގޮތް ވަނީ ނުވެފަ އެވެ. ރާއްޖެއެމްވީއިން ގުޅުމުން ފޯނަށް ޖަވާބު ދެއްވާފައިނުވާއިރު، މެސެޖްތަކަށް ވެސް ޖަވާބު ދެއްވާފައިނުވެ އެވެ.
