އިންޑިއާ ކަނޑުގެ ސަލާމަތަށް އިންޑިއާގެ ދައުރު މުހިންމު: ސަޖިތު ޕްރޭމަދާސަ
އިންޑިއާ އަކީ ދުނިޔޭގެ ބޮޑު ބާރެއްގެ ގޮތުގައި ފާހަގަ ކުރައްވަމުން، އދ ގެ ސަލާމަތީ މަޖިލީހުގެ ދާއިމީ ގޮނޑިއެއް ހޯދުމަށް އިންޑިއާ އިން ކުރާ މަސައްކަތަށް ޕްރޭމަދާސަ ވަނީ ތާއީދު ކުރައްވާފައި.
ސްރީ ލަންކާގެ އިދިކޮޅު ލީޑަރު ސަޖިތު ޕްރޭމަދާސަ | އޭއެފްޕީ
އިންޑިއާ ކަނޑުގެ ސަލާމަތަށް، އިންޑިއާގެ ދައުރު މުހިންމު ކަމަށް ސްރީ ލަންކާގެ އިދިކޮޅު ލީޑަރު ސަޖިތު ޕްރޭމަދާސަ ވިދާޅުވެއްޖެ އެވެ.
އޭއެންއައި އަށް ދެއްވި އިންޓަވިއުއެއްގައި، ޕްރެމަދާސަ ވަނީ އިންޑިއާ ކަނޑާއި، ދެކުނު އޭޝިއާގެ ސަލާމަތާއި ހަމަޖެހުން ގާއިމު ކުރުމުގައި އިންޑިއާ އަދާ ކުރާ މުހިންމު ދައުރަށް އަލި އަޅުއްވާލައްވާފައި އެވެ. ޕްރޭމަދާސަ ފާހަގަ ކުރެއްވި ގޮތުގައި އިންޑިއާ އާއި ސްރީ ލަންކާގެ ގައުމީ މަސްލަހަތުތައް ހުރީ އެއް މިސްރާބަކަށް ކަމަށް ވުމުން، ދެ ގައުމުގެ މެދުގައި އޮންނަ އެއްބާރުލުން އިތުރަށް ވަރުގަދަ ވެގެންދެ އެވެ.
އިންޑިއާ އަކީ ދުނިޔޭގެ ބޮޑު ބާރެއްގެ ގޮތުގައި ފާހަގަ ކުރައްވަމުން، އދ ގެ ސަލާމަތީ މަޖިލީހުގެ ދާއިމީ ގޮނޑިއެއް ހޯދުމަށް އިންޑިއާ އިން ކުރާ މަސައްކަތަށް ޕްރޭމަދާސަ ވަނީ ތާއީދު ކުރައްވާފައި އެވެ. މީގެ އިތުރުން، ސްރީ ލަންކާ އަށް ކުރިމަތިވި އިގްތިސާދީ ދަތި ހާލަތުގައި ބޮޑު ވަޒީރު ނަރެންދުރަ މޯދީގެ ސަރުކާރުން ފޯރުކޮށްދިން އެހީތެރިކަމަށްޓަކައި ޝުކުރު އަދާ ކުރައްވަމުން، މިކަމުގެ ސަބަބުން ދެ ގައުމުގެ ގުޅުން އިތުރަށް ބަދަހި ވެފައިވާކަން އޭނާ ފާހަގަ ކުރެއްވި އެވެ.
ދެކުނު އޭޝިއާގެ މަސްރަހަށް އަލި އަޅުއްވާލައްވަމުން ޕްރޭމަދާސަ ވިދާޅުވީ، ބަންގްލަދޭޝްގައި ވަރަށް އަވަހަށް ބޭއްވުމަށް ހަމަޖެހިފައިވާ އިންތިޚާބާ އެކު އެގައުމުގައި ސިޔާސީ ހަމަޖެހުން ގާއިމުވެ، ޑިމޮކްރަސީ ވަރު ގަދަވުމަށް އެދިވަޑައިގަންނަވާ ކަމަށެވެ. އަދި ސަރަހައްދީ ސުލްހައާއި ތަނަވަސްކަމަށްޓަކައި ސާކް ޖަމިއްޔާ އަލުން ހަރަކާތްތެރި ކުރުވުމަށް އޭނާ ގޮވާލެއްވި އެވެ.
ބަންގްލަދޭޝްގެ ޗީފް އެޑްވައިޒަރު މުހައްމަދު ޔޫނުސް ވެސް ވަނީ ސަރަހައްދީ އެއްބާރުލުން ކުރިއެރުވުމުގައި ސާކްގެ އޮތް ގާބިލިއްޔަތުކަމާ ބެހޭ ގޮތުން ދާދި ފަހުން ވާހަކަ ދައްކަވައިފަ އެވެ.
މަސްދަރު: އޭއެންއައި ނިއުސް
