އިންޑިއާ ކާގޯ ބޯޓުން ކަނޑަށް ވެއްޓުނު މީހާ މަރުވެފައި އޮއްވާ ފެނިއްޖެ
25 ސެޕްޓެމްބަރު 2025 | ބުރާސްފަތި 18:07ކަނޑަށް ވެއްޓިގެން ހޯދަމުންދިޔަ މީހާގެ ހަށިގަނޑު މަރުވެފައި އޮއްވާ ކ. ފޭދޫފިނޮޅު ދެކުނުން
"އެމްއެސްވީ ޑައުލާ": މަރުވެފައި އޮއްވާ ފެނިފައިވާ މިހާ މޫދަށް ވެއްޓުނީ އިންޑިއާގެ މި ކާގޯ ބޯޓުން
އިންޑިއާގެ ކާގޯ ބޯޓެއް ކަމުގައިވާ އެމްއެސްވީ ޑައުލާ އިން ކަނޑަށް ވެއްޓިގެން ހޯދަމުންދިޔަ މީހާގެ މަރުވެފައި އޮއްވާ ފެނިއްޖެއެވެ. މި މީހާގެ ހަށިގަނޑު ފެނުނީ ކ. ފޭދޫފިނޮޅުގެ ދެކުނު ސަރަހައްދުންނެވެ.
އެމްއެންޑީއެފުން މައުލޫމާތު ދެއްވާފައިވާ ގޮތުގައި، މި ހާދިސާ ރިޕޯޓުކޮށްފައިވަނީ މި މަހުގެ 22 ވަނަ ދުވަހުގެ ރޭ 11:35 ހާއިރުއެވެ. އެ ވަގުތުން ފެށިގެން އެމްއެންޑީއެފްގެ ފަރާތުން ސާރޗް އެންޑް ރެސްކިއު އޮޕަރޭޝަނެއް ފެށިއެވެ.
މަރުވެފައިވާ މީހާގެ ހަށިގަނޑު ފެނިފައިވަނީ އެމްއެންޑީއެފް މާލެ އޭރިއާ ކޮމާންޑް ކޯސްޓްގާޑް ސެކަންޑް ސްކޮޑްރަން އަށެވެ. އެމްއެންޑީއެފުން ވަނީ މި ހާދިސާއާ ގުޅިގެން ކަނޑާއި ވައިގެ މަގުން ފުޅާ ދާއިރާއެއްގައި ބޯޓުން ވެއްޓުނު މިހާ ހޯދުމުގެ މަސައްކަތްތަކެއް ކުރިއަށް ގެންގޮސްފައެވެ.
އެމްއެންޑީއެފުން މައުލޫމާތު ދީފައިވާ ގޮތުގައި، މަރުވެފައި އޮއްވާ ފެނުނު މީހާގެ ހަށިގަނޑު މިހާރު ވަނީ މޯލްޑިވްސް ޕޮލިސް ސަރވިސްއާ ހަވާލުކޮށްފައެވެ.
