ވިލިމާލެ އައު ހޮސްޕިޓަލްގެ ކުރެހުންތަކާއެކު އަނެއްކާ ވެސް ރައްޔިތުންނަށް ހުވަފެނެއް؟

ރާއްޖެއިން ރަނގަޅު ސިއްހީ ޚިދުމަތް ނުލިބޭ ޝަކުވާ އަކީ އާއްމު ޝަކުވާ އެކެވެ. މިޝަކުވާ ބޮޑުވެފައިވަނީ ރައީސް މުއިއްޒުގެ ވެރިކަމުގަ އެވެ. އެއީ މީގެ ކުރިން ލިބުނު ޚިދުމަތްތައް މިހާރު ނުލިބޭތީ އެވެ. މުޅި ރާއްޖޭގެ 4 ސަރަހައްދުން އަދި މާލެސިޓީގެ ބޭސްފަރުވާގެ ހުރިހާ ޚިދުމަތެއް ރަނގަޅު ކޮށްދެއްވާނެ ކަމަށާއި، ހުޅުމާލޭގެ އިތުރުން ވިލިމާލޭގައި ވެސް ޒަމާނީ ފެންވަރުގެ ބޮޑު ހޮސްޕިޓަލެއް ގާއިމް ކޮށްދެވާނެ ކަމުގެ ހުވަފެން ރިޔާސީ އިންތިޚާބާއި، ރައްޔިތުން މަޖިލީހުގެ ކެންޕޭންގެ ތެރޭގައި ވެސް އެމަނިކުފާނު ދެއްވި އެވެ. 

އަނެއްކާ ވެސް ރާއްޖެ ކުރިމަތިލަމުން މިދަނީ އިންތިޚާބަކަށެވެ. އެއާއެކު މިހާރު އައު މަޝްރޫއުތައް ފެށުމާއި، އެއްބަސްވުންތަކުގައި ސޮއިކުރާ މަންޒަރު ފެނުން ގިނަވާނެ ކަމާމެދު ޝައްކެތް ނެތެވެ. ލޯކަލް ކައުންސިލް އިންތިޚާބަށް ކުޑަތަން ވެފައިވަނިކޮށް، އަނެއްކާ ވެސް މިވަނީ ވިލިމާލޭގައި އަޅާ ހޮސްޕިޓަލް ގެ އަމަލީ މަސައްކަތް ފެށުމަށް ބޮޑު ރަސްމިއްޔާތެއް ބާއްވައި، އެއްބަސްވުމުގައި ސޮއި ކޮށްފަ އެވެ. 

ބިނާރާ ބެހޭ ވުޒާރާ އިން މައުލޫމާތުދޭ ގޮތުގައި، ދެން ކުރިއަށްދާނީ ބީލަމުގެ އުސޫލުން މި މަޝްރޫއުއަށް ކޮންޓްރެކްޓަރެއް ކަނޑައެޅުމުގެ މަރުހަލާ އެވެ. އަދި ކޮންޓްރެކްޓަރަކު ހޯދާ، މަޝްރޫއުގެ އަމަލީ މަސައްކަތް މި އަހަރުގެ ތިން ވަނަ ކުއާޓަރުގައި ފެށުމަކީ އަމާޒެއް ކަމަށް ވެސް އެ ވުޒާރާ އިން ބުނެފައިވެ އެވެ. 

އެހެންކަމުން މަޒީގައި ކަންކަން ހިނގާފައިވާ ގޮތަށް ބަލާއިރު، މިއަހަރުގެ ތެރޭގައި ވެސް ޗައިނާގެ ހިލޭ އެހީގެ ދަށުން ވިލިމާލޭގައި އަޅާ 112 އެނދުގެ ޓާޝަރީ ފެންވަރުގެ މި ހޮސްޕިޓަލް ގެ އަމަލީ މަސައްކަތް ފެށޭނެ ކަމުގެ އުއްމީދެއް ނެތެވެ. 

އެއީ މިހޮސްޕިޓަލާ ގުޅޭގޮތުން ސަރުކާރުން އެކި ފަހަރު އެކި ތާރީހުތައް ދީފައިވާތީ އެވެ. 2024 ވަނަ އަހަރުގެ ތެރޭގައި ވެސް އަމަލީ މަސައްކަތް ވަރަށް އަވަހަށް ފަށާނެ ކަމަށް މިސަރުކާރުން ބުނެފައިވެ އެވެ.

ރިޔާސީ ބަޔާން 2025 އިއްވަވަމުން ރައީސް މުއިއްޒު ވިދާޅުވީ ވިލިމާލޭގެ ރައްޔިތުންނަށް ދިމާވެފައިވާ ހޮސްޕިޓަލުގެ ދަތިކަން ހައްލު ކުރުމަށް، ޗައިނާ ސަރުކާރުގެ ހިލޭ އެހީގެ ދަށުން ކުރިއަށްގެންދާ ޓާޝަރީ ހޮސްޕިޓަލުގެ އަމަލީ މަސައްކަތް ވެސް 2025 ގައި ފެށޭނެ ކަމަށެވެ.

އޭގެފަހުން 2025 ވަނަ އަހަރުގެ ނޮވެންބަރު މަހުގެ ތެރޭގައި ވިލިމާލެ ރައްޔިތުންނާއެކު ބޭއްވެވި ބައްދަލު ކުރެއްވުމުގައި ރައީސް މުއިއްޒު ވިދާޅުވީ ހޮސްޕިޓަލެއް އެޅުމަށް ހުރިހާ އިންތިޒާމެއް ހަމަޖެހިފައިވާ ކަމަށާއި، ފަންޑިންގެ އެއްވެސް މައްސަލައެއް ނެތް ކަމަށެވެ. ނަމަވެސް 2025 ވަނަ އަހަރު ނިމިގެންދިޔައިރު ވެސް މި ހޮސްޕިޓަލް ގެ އަމަލީ އެއްވެސް މަސައްކަތެއް ފެށިފައިނުވެ އެވެ.

އަނެއްކާ ވެސް 2026 ވަނަ އަހަރާއެކު، ލޯކަލް ކައުންސިލް އިންތިޚާބު ބޯމަތިވެފައިވަނިކޮށް، އަމަލީ މަސައްކަތް ފެށުމަށް އެއްބަސްވުމުގައި ސޮއިކުރި މަންޒަރު ރައްޔިތުންނަށް މިވަނީ ދައްކާފަ އެވެ. އަދި މިއަހަރުގެ 3 ވަނަ ކުއާޓަރުގައި އަމަލީ މަސައްކަތް ފެށޭނެ އުއްމީދެއް ދިން ނަމަވެސް ޔަގީންކަން ނުދެ އެވެ. އެހެންކަމުން މި މަޝްރޫއު ކުރިއަށް ގެންދިޔުމުގައި ސަރުކާރުގެ ހެޔޮ ނިޔަތެއް އޮތް ކަމާމެދު ސުވާލު އުފެދޭނުންތޯ އެވެ.