މިމަހުގެ 6ވަނަ ދުވަހު ދިވެހި ސިނަމާތަކަށް އައި ދިވެހި ފިލްމު "ހައްދު" މާދަމާރޭ ކުޅުދުއްފުށީގައި އަޅުވާއިރު ފުރަތަމަ ޝޯގެ ހައުސް ފުލްވެއްޖެއެވެ.

"ހައްދު" ގެ ޑައިރެކްޓަރ އަބްދުލްފައްތާހު ބުނީ ކުޅުދުއްފުށީގެ ޝޯ ފުލްވެފައިވަނީ ޝޯގެ ޓިކެޓް ވިއްކާލުމަށް ހުޅުވާލިތާ ދެގަޑިއިރުގެ ތެރޭގައިކަމަށެވެ. ފައްތާހު ބުނީ ކުޅުދުއްފުށީގައި ދެއްކުމަށް ހަމަޖެހިފައިވާ ދެވަނަ ޝޯވެސް މިހާރު ދަނީ ފުލްވަމުންކަމަށެވެ.

ކުޅުދުއްފުށީގެ އިތުރުން ބ. އޭދަފުށި، ކ. ހުރާގައިވެސް "ހައްދު" މާދަމާރޭ  ދައްކާނެއެވެ.  މީގެއިތުރުން މިހަފްތާގައި "ހައްދު ދެއްކުމަށް ހަމަޖެހިފައިވާ ރަށްތަކަކީ އައްޑޫ ސިޓީ މަރަދޫ ފޭދޫ، ހދ. ކުރިނބި، ހދ. ނާވައިދޫ އެވެ. 

ކާމިޔާބު ޝޯތަށް ދައްކަމުންދާ މި ފިލްމްގެ ހުރިހާ ޓިކެޓެއް ވެސް 100 ރުފިޔާއަށް ވިއްކުމަށް ހަމަޖެހިފައިވާއިރު، ފިލްމުގެ ތަރިންގެ ރޯލުން ފެނިގެން ދަނީ މުހައްމަދު ރަޝީދު (ދަރާ)، މަރިޔަމް ޝަކީލާ، އާރިފާ އިބްރާހީމް، ފައުޒިއްޔާ އަދި މަރިޔަމް ހަލީމް، މަރިޔަމް އައްޒަ، އައިމިނަތު ރިޝްފާ އަދި މި ދާއިރާއަށް އަލަށް ތައާރަފްވާ ޝިބާން އަހުމަދު، އަލީ އާޒިމް (ދޮންއައްޔަ) އާއި އަހުމަދު ނަޖާހް އެވެ.

މި ފިލްމުގައި ހާއްސަ ފެނިލުމެއްގެ ގޮތުގައި، ރާއްޖެ ޓީވީގެ ކުރީގެ ނޫސްވެރިޔާ އަހްމަދު ފައިރޫޒު ދައްކާލާފައިވެ އެވެ. ފައިރޫޒު ފެނިގެން ދަނީ، ފިލްމުގައި އައިމިނަތު ރިޝްފާގެ އަލަތު ފިރިމީހާގެ ގޮތުގަ އެވެ. މިއީ ވާހަކަ ލިޔުންތެރިޔާ މަހުދީގެ ވާހަކައެއްގެ މައްޗަށް ބިނާކޮށް އުފައްދާފައިވާ ވާހަކައެކެވެ. މި ފިލްގެ މަންޒަރުތައް ނަގާފައި ވަނީ ހއ. ކެލާ، ރ. ވާދޫ، މާލެ އަދި މާލެ ކައިރި ރިސޯޓްތަކުގައެވެ.