އިދިކޮޅުގައި އޮވެ، އެމްޑީޕީ އިން ދެއްކީ އަބަދު ވެސް ދައްކަމުން އަންނަ ޑިމޮކްރަސީގެ ރިވެތި ނަމޫނާ!
އިދިކޮޅު ޕާޓީއެއްގެ ގޮތުގައި އެމްޑީޕީ މަސައްކަތް ކުރަމުން އަންނަތާ ދެ އަހަރުވެފައިވާއިރު، ހުކުރު ދުވަހު ކުރިއަށް ގެންދިޔަ އެމްޑީޕީގެ ލޯކަލް ކައުންސިލް އިންތިޚާބުގެ ޕްރައިމަރީ އަކީ މި ފަހުން ޕާޓީ އަކުން ބޭއްވި އެންމެ ވާދަވެރި، އަދި އެންމެ ފޯރި ގަދަ އެއް އިންތިޚާބު. އެ އިންތިޚާބުގައި ވެސް އެމްޑީޕީގެ އެތެރެއިން ފެނިގެން ގޮސްފައި ވަނީ، ވާދަވެރި ކަމެއް. އެއާއެކު، އިންތިޚާބުގެ ވޯޓުލުން ނިމި، ނަތީޖާ ލިބިގެން ދިޔައިރު ފެނިގެން ދިޔައީ ޑިމޮކްރަސީގެ ރިވެތި ނަމޫނާ.
އެމްޑީޕީ އިން މީގެ ކުރިން ބޭއްވި ޙަރަކާތެއްގެ ތެރެއިން އެ ޕާޓީގެ ދިދަ ހިފައިގެން އާންމު މެމްބަރުން | ސޯޝަލް މީޑިއާ
ރާއްޖެ އަށް ޒަމާނީ ޑިމޮކްރަސީ އާއި، ގިނަ ޕާޓީތައް އެކުލެވޭ ސިޔާސީ ނިޒާމެއް ގެނެސްދިނީ، ދިވެހި ރައްޔިތުންގެ ޑިމޮކްރަޓިކް (ޕާޓީ) އިން ކުރި އެތައް މަސައްކަތް ތަކެއް ކޮށްގެންނެވެ. ފާއިތުވި 20 އަހަރުގެ ތެރޭގައި، ރާއްޖޭގައި އެއް ފިކުރެއްގެ ގޮތުގައި، ބަދަލު ނުވެ އޮތް ހަމައެކަނި ޕާޓީ އަކީ އެމްޑީޕީ އެވެ. އެމްޑީޕީ އަކީ އެތެރޭގެ އިންތިޚާބުތައް ވެސް ވާދަވެރި މާހައުލެއްގައި މިހާތަނަށް ބާއްވައި، ޑިމޮކްރަސީގެ އެންމެ ފުރިހަމަ ނަމޫނާ ދައްކަމުން އަންނަ ޕާޓީ އެވެ.
އިދިކޮޅު ޕާޓީއެއްގެ ގޮތުގައި އެމްޑީޕީ މަސައްކަތް ކުރަމުން އަންނަތާ ދެ އަހަރުވެފައިވާއިރު، ހުކުރު ދުވަހު ކުރިއަށް ގެންދިޔަ އެމްޑީޕީގެ ލޯކަލް ކައުންސިލް އިންތިޚާބުގެ ޕްރައިމަރީ އަކީ މި ފަހުން ޕާޓީ އަކުން ބޭއްވި އެންމެ ވާދަވެރި، އަދި އެންމެ ފޯރި ފަދަ އެއް އިންތިޚާބެވެ. އެ އިންތިޚާބުގައި ވެސް އެމްޑީޕީގެ އެތެރެއިން ފެނިގެން ގޮސްފައި ވަނީ، ވާދަވެރި ކަމެވެ. އެއާއެކު، އިންތިޚާބުގެ ވޯޓުލުން ނިމި، ނަތީޖާ ލިބިގެން ދިޔައިރު ފެނިގެން ދިޔައީ ޑިމޮކްރަސީގެ ރިވެތި ނަމޫނާ އެވެ.
އެމްޑީޕީ އިން ކުރިއަށް ގެންދިޔަ ޕްރައިމަރީ އަށް ހުރަސް އެޅުމަށް ސަރުކާރުގެ އެތެރެއިން ވަނީ ގިނަ ކަންކަން ކޮށްފަ އެވެ. އެގޮތުން ސަރުކާރުގެ ބައެއް ކުންފުނި ތަކުގައި މަސައްކަތް ކުރަމުން އަންނަ މުވައްޒަފުންގެ ތެރެއިން، ބައެއް މުވައްޒަފުންގެ ޑިއުޓީ ގަޑިތައް ބަދަލު ކޮށްގެން ޕްރައިމަރީގައި ވޯޓު ލުމަށް ވެސް ވަނީ ހުރަސް އަޅައިފަ އެވެ. އެކަމުގެ ސަބަބުން ބައެއް މެމްބަރުންނަށް ޕްރައިމަރީގައި ވޯޓު ލުމަށް ވެސް ދަތިވެގެން ދިޔަ ކަމީ ހަގީގަތެވެ.
އިދިކޮޅު ޕާޓީގެ ގޮތުގައި އޮވެ އެމްޑީޕީގެ ޕްރައިމަރީގެ ވޯޓުލުން ފެށިގެން ގޮސް، ޕްރައިމަރީ ނިމުމާ ހަމަ އަށް ވެސް ފެނިގެން ދިޔައީ ފުރިހަމަ ނަމޫނާ އެކެވެ. އަތޮޅު ތެރޭގެ ގިނަ ރަށްތަކާއި، މާލޭގައި އިންތިޚާބުގެ ވޯޓުލުން ކުރިއަށް ގެންގޮސްފައި ވަނީ ވަރަށް އަމާންކަމާ އޮމާންކަމާ އެކު އެވެ. އެގޮތުން ޒުވާބު ކުރުމާއި، ދެބަސްވުން އަދި ތަޅާ ފޮޅުމުގެ އެއްވެސް މަންޒަރެއް ފެނިގެން ގޮސްފައި ނުވެ އެވެ. ބައެއް ޕާޓީ ތަކުގެ ޕްރައިމަރީގައި ފޮށި ފަޅާލުމާއި، ވޯޓު ކަރުދާސްތައް އުކާލުން ފަދަ މަންޒަރު ފެނުނު ނަމަވެސް، އެމްޑީޕީގެ ޕްރައިމަރީގައި އެފަދަ އެއްވެސް މަންޒަރެއް ފެނިފައި ނުވެ އެވެ.
ވޯޓުލުން ހުރިހާ މަރުކަޒެއްގައި ވެސް ކުރިއަށް ގެންގޮސްފައި ވަނީ، އެކުވެރި މާހައުލެއްގަ އެވެ. އިންތިޚާބީ އެއްވެސް މަރުކަޒެއްގައި މައްސަލަ ދިމާވެ، ވޯޓުލުން ފެށުން ލަސްވެ، ވޯޓުލުން ބަންދު ކުރުން ލަސްވެގެން ގޮސްފައި ނުވާއިރު، ހުރިހާ ދިމާލަކުން ފެނުނީ ޕާޓީގެ ރޫހާއި، އިންތިޚާބީ ފޯރި އެވެ. އެއް ކެންޑިޑޭޓް އަނެއް ކެންޑިޑޭޓާއި، އެ ކެންޑިޑޭޓުންގެ ސަޕޯޓަރުންގެ ފަރާތުން ވެސް ފެނުނީ މަސްލަޙު އިސްކޮށް، އަމާންކަމާ އެކު އިންތިޚާބުގެ ކަންކަން ކުރިއަށް ގެންދިޔަ މަންޒަރެވެ.
އިންތިޚާބުގެ ވޯޓުލުން ނިމި، ވޯޓު ގުނުމުގެ ކަންކަން ވެސް ކުރިއަށް ގެންދިޔައީ އަމާންކަމާ އެކު އެވެ. އިންތިޚާބުގެ ވޯޓުލުމާއި، ވޯޓު ގުނުމުގެ ކަންކަން ކުރިއަށް ގެންދިޔުމަށް ޕާޓީ އިން ރަނގަޅު އިންތިޒާމު ތަކެއް ހަމަޖައްސާފައި އޮތްއިރު، ވޯޓު ގުނަމުން ދިޔައިރު ވެސް މައްސަލައެއް ދިމާވެ، ހައިޖާނު ގަނޑެއް ފެނިގެން ގޮސްފައި ނުވެ އެވެ. އެމްޑީޕީ އަކީ ރާއްޖޭގައި އޮތް އެންމެ ދުވަސްވީ ޕާޓީ އަށް ވާއިރު، މުޅި އިންތިޚާބުގައި އޮތީ ނަމޫނާ އާއި، ޑިމޮކްރަސީގެ ރީތި މިސާލު ފެންނާށެވެ.
ވޯޓުލުން ނިމި އިންތިޚާބުގެ ނަތީޖާ ލިބުމާ އެކު ވެސް، ކެންޑިޑޭޓުން ދެއްކީ ހަމަ އެ ނަމޫނާ އެވެ. ބަލިވި ކެންޑިޑޭޓުން، މޮޅުވި ކެންޑިޑޭޓުންނަށް މަރުޙަބާ ދެންނެވުމާއި، މޮޅުވި ކެންޑިޑޭޓުން، ބަލިވި ކެންޑީޑޭޓުންނަށް ހިތްވަރު ދިނުމުގެ ނަމޫނާ އެވެ. އެންމެ ވާދަވެރިކޮށް ފެނުނު މާލޭ ސިޓީ ކައުންސިލްގެ މޭޔަރު ޓިކެޓަށް ވާދަކުރެއްވި އަލީ އާޒިމް ވެސް ވަނީ، އިންތިޚާބު ކާމިޔާބު ކުރެއްވި އާދަމް އާޒިމް އަށް ފޯނުން ގުޅުއްވައި މަރުޙަބާ ވިދާޅުވެފަ އެވެ. އަދި އެކުގައި މަސައްކަތްކޮށް، ކުރިއަށް އޮތް އިންތިޚާބު ކާމިޔާބު ކުރުމަށް މަސައްކަތް ކުރާނެ ކަމުގެ ޔަގީންކަން ވެސް ދެއްވި އެވެ.
މާލެ އެކަންޏެއް ނޫނެވެ. އަތޮޅު ތެރޭގެ ސިޓީތަކާއި، ރަށް ތަކުން ވެސް ފެނުނީ އެ ނަމޫނާ އެވެ. މޮޅުވި ކެންޑިޑޭޓުންނަށް އެންމެ ފުރަތަމަ މަރުޙަބާ ވިދާޅުވެފައި ވަނީ، ނާކާމިޔާބުވި ކެންޑިޑޭޓުންނެވެ. އެއާ އެކު، ކޮންމެ ކެންޑިޑޭޓަކު ވެސް ފާހަގަ ކުރައްވާފައި ވަނީ، ކުރިއަށް އޮތް ލޯކަލް ކައުންސިލް އިންތިޚާބު އެމްޑީޕީ އަށް ކާމިޔާބު ކުރުމުގެ މުހިންމުކަމާއި، އެމްޑީޕީ އަށް ކައުންސިލް ތަކުގެ މެޖޯރިޓީ އޮތުމުގެ މުހިންމުކަންމުގެ ވާހަކަ އެވެ. އަދި އެމްޑީޕީ އާއެކު ދެމި ތިބޭނެ ކަމަށާއި، އެމްޑީޕީ އަށް އިންތިޚާބު ކާމިޔާބު ކުރުމަށް ގަދަ އަޅާ މަސައްކަތް ކުރާނެ ކަމުގެ ޔަޤީންކަން ވެސް ދެއްވި އެވެ.
އާންމު މެމްބަރުންނާއި، ޕާޓީގެ އިސް ސަފުން ވެސް ފެނިގެން ދިޔައީ އެ ނަމޫނާ އެވެ. ޕާޓީގެ އެންމެ އިސްވެރިންނާއި، އެހެން ލީޑަރުން އަދި އާންމު މެމްބަރުން ވެސް ވަނީ އިންތިޚާބު ކާމިޔާބު ކުރެއްވި ކެންޑިޑޭޓުންނަށް މަރުޙަބާ ވިދާޅުވެފަ އެވެ. އެއާ އެކު، ހުރިހާ ފަރާތްތަކުން ވެސް ފާހަގަ ކޮށްފައި ވަނީ ކުރިއަށް އޮތް ލޯކަލް ކައުންސިލް އިންތިޚާބު އެމްޑީޕީ އަށް ކާމިޔާބު ކުރުމުގެ މުހިންމު ކަމެވެ. އަދި އެކަމަށްޓަކައި ހުރިހާ ފަރާތްތަކުން ވެސް ގުޅިގެން މަސައްކަތް ކުރަން ޖެހޭ ކަމެވެ.
