ޕްރައިމަރީ އިން ފެނުނީ އުފާވެރި މަންޒަރެއް، މިއީ އެމްޑީޕީ އިން ދެއްކި ނަމޫނާ އެއް: ނަޝީދު
16 ޖެނުއަރީ 2026 | ހުކުރު 14:47ކުރީގެ ރައީސް މުހައްމަދު ނަޝީދު ވިދާޅުވީ އެމްޑީޕީގެ ލޯކަލް ކައުންސިލް އަދި ޑަބްލިއުޑީސީގެ ޕްރައިމަރީ އިންތިޚާބުން އުފާވެރި ހިތްހަމަޖެހޭ މަންޒަރުތައް ފެނިގެން ދިޔަ ކަމަށް.
ކުރީގެ ރައީސް މުހައްމަދު ނަޝީދު ރާއްޖެ ޓީވީ އަށް އިންޓަރވިއު އެއް ދެއްވަނީ | ރާއްޖެ އެމްވީ
އެމްޑީޕީ ގެ ލޯކަލް ކައުންސިލް އަދި ޑަބްލިއުޑީސީގެ މޯލްޑިވިއަން ޑިމޮކްރެޓިކް ޕާޓީ ގެ ޕްރައިމަރީ އިން ފެނުނީ އުފާވެރި މަންޒަރެއް ކަމަށާއި އޮމާންކަމާއި އެކު މި އިންތިޚާބު ބޭއްވުމަކީ އެމްޑީޕީ އިން ދެއްކި ނަމޫނާ އެއް ކަމަށް ކުރީގެ ރައީސް އަދި އެމްޑީޕީގެ ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެ މަނިކުފާނު އެފަދައިން ވިދާޅުވީ ރާއްޖެޓީވީ އަށް ދެއްވި ބަސްތީގަތުމެއްގަ އެވެ.
އެމްޑީޕީ ގެ ލޯކަލް ކައުންސިލް އަދި ޑަބްލިއުޑީސީގެ މޯލްޑިވިއަން ޑިމޮކްރެޓިކް ޕާޓީ ގެ ޕްރައިމަރީ އަށް އިޝާރާތްކުރައްވާ ރައީސް ނަޝީދު ވިދާޅުވީ އެ އިންތިޚާބުން ފެނިގެން ދިޔައީ އުފާވެރި، ހިތްހަމަ ޖެހޭ މަންޒަރުތައް ކަމަށެވެ. އިންތިޒާމް ވެގެން ރޭވިގެން ހިންގާ ސުލްހަވެރި ސިޔާސީ ހަރަކާތަކީ ޕާޓީ އަކަށް އެންމެ މުހިންމު އެއް ކަންތައްކަން އެ މަނިކުފާނު ވަނީ ފާހަގަކުރައްވާފަ އެވެ.
"ހަނދާނަށް އަންނަނީ އެންމެ ފުރަތަމަ އިންތިޚާބެއްގެ ގޮތުގައި ވާދަކުރި އިންތިޚާބު. އެއީ ވެރިކަމުގެ ނިޒާމް ކަނޑައެޅުމަށް ބޭއްވި އިންތިޚާބު. ދެން އެއަށް ފަހު މި ދަނީ މި އިންތިޚާބުތައް ބާއްވަމުން." ނަޝީދު ވިދާޅުވި އެވެ.
އޮމާންކަމާއި އެކު އިންތިޚާބުތައް ބޭއްވުމުގެ ޤާބިލްކަން އެމްޑީޕީގެ ކިބައިގައި ހުންނާނެ ކަމަށާއި އެމްޑީޕީ އިން މިއަދުވެސް ދެއްކީ ނަމޫނާ އެއް ކަމަށް ނަޝީދު ވިދާޅުވި އެވެ.
