ރަޝިޔާގެ ރައީސް ވުލަޑިމިއަރ ޕުޓިން، ޑިސެމްބަރު މަހުގެ ހަތަރު ވަނަ ދުވަހު ރަސްމީ ދަތުރުފުޅެއްގައި އިންޑިއާ އަށް ވަޑައިގަންނަވާނެ ކަމަށް، ރަޝިޔާގެ ރިޔާސީ ގަނޑުވަރު ކްރެމްލިން އިން ހާމަ ކޮށްފި އެވެ.

ކްރެމްލިން އިން ހުކުރު ދުވަހު ހާމަ ކޮށްފައިވާ ގޮތުގައި، ޑިސެމްބަރު މަހުގެ ހަތަރު ވަނަ ދުވަހު ޕުޓިން އިންޑިއާ އަށް ވަޑައިގަންނަވާނީ ދެ ދުވަހުގެ ދަތުރުފުޅެއްގަ އެވެ. އަދި އިންޑިއާ އަށް ކުރައްވާ ދަތުރުފުޅު ނިންމަވާލެއްވުމަށް ފަހު، ޑިސެމްބަރު މަހުގެ ފަސް ވަނަ ދުވަހު ޕުޓިން ޤައުމަށް ވަޑައިގަންނަވާނެ އެވެ.

ކްރެމްލިން އިން ހާމަ ކޮށްފައިވާ ގޮތުގައި ޕުޓިންގެ މި ދަތުރުފުޅަކީ އިންޑިއާގެ ބޮޑު ވަޒީރު ނަރެންދްރަ މޯދީގެ ދައުވަތަކަށް އެ ޤައުމަށް ކުރައްވާ ދަތުރުފުޅެކެވެ. މީގެ ކުރިން ވެސް، ރަޝިޔާ އާއި އިންޑިއާ ސަރުކާރުގެ އިސް އޮފިޝަލުންނާ ހަވާލާދީ މީޑިއާ ތަކުން ވަނީ މިއަހަރުގެ ފަހު ކޮޅު ޕުޓިން އިންޑިއާ އަށް ވަޑައިގަންނަވާނެ ކަމަށް ރިޕޯޓު ކޮށްފަ އެވެ.

އިންޑިއާ އަށް ޕުޓިން ކުރައްވާ ދަތުރުފުޅުގައި، އިންޑިއާ އާއި ރަޝިޔާއާ ދެމެދު ވިޔަފާރީގެ އެއްބަސްވުން ތަކެއްގައި ސޮއި ކުރާނެ އެވެ. އަދި އިންޑިއާ އާއި ރަޝިޔާއާ ދެމެދު ގޮތް ގުޅުން އިތުރަށް ބަދަހި ކުރުމާއި، ދެ ޤައުމު ގުޅިގެން ކުރިއަށް ދިޔުމަށް އެންމެހައި މަޝްވަރާތައް ވެސް ކުރާނެ އެވެ.

ހަމަ އެހެންމެ، ޕުޓިންގެ އެ ދަތުރުފުޅުގައި ސަރަހައްދީ މައްސަލަ ތަކާއި، ބައިނަލްއަޤުވާމީ މައްސަލަތަކާ ގުޅޭ ގޮތުން އިންޑިއާގެ ބޮޑު ވަޒީރު މޯދީއާ އެކު މަޝްވަރާ ކުރައްވާނެ ކަމަށް ކްރެމްލިން އިން ވަނީ ހާމަ ކޮށްފަ އެވެ.

ޕުޓިން އިންޑިއާ އަށް މި ވަޑައިގަންނަވަނީ ބައެއް ޤައުމުތަކާ އިންޑިއާއާ ދެމެދު ނުތަނަވަސް ކަމެއް އުފެދިފައި ވަނިކޮށެވެ. އެއީ 2022 ވަނަ އަހަރުގެ ފެބްރުވަރީ މަހު ރަޝިޔާ އިން ފެށި ޔުކްރެއިން ހަނގުރާމަ އަށް ފަހު ވެސް، އިންޑިއާ އިން ރަޝިޔާގެ ތެޔޮ ހެޔޮ އަގެއްގައި ގަންނަމުން އައުމުގެ ސަބަބުން އުފެދިފައިވާ ނުތަނަވަސް ކަމެކެވެ.

އެކަމަކުގެ ސަބަބުން އެމެރިކާގެ ރައީސް ޑޮނަލްޑް ޓްރަމްޕް ވަނީ އިންޑިއާގެ މުދަލުން 50 އިންސައްތައާ ހަމައަށް ޓެރިފް ނެގުމަށް ވެސް ނިންމަވައިފަ އެވެ. ނަމަވެސް، އެ ނިންމުމާ އެކު ވެސް، އިންޑިއާ އިން ރަޝިޔާއާ އެކު ގުޅުން ބަދަހި ކުރަމުން ގެންދާނެ ކަމަށް އިންޑިއާ ސަރުކާރުގެ އޮފިޝަލުން ވަނީ ހާމަ ކުރައްވައިފަ އެވެ.