ގާބިލުކަން ނެތް ކުންފުންޏަކަށް 250،000 ޑޮލަރުގެ ގޭސް އޯޑަރު ދިނީ އެމްޑީގެ އިރުޝާދުގެ މަތިން ކަން ހާމަވެއްޖެ
މޯލްޑިވްސް ގޭސްއިން އޮކްޓޯބަރު 2024 ގައި 800،000 ޑޮލަރުގެ ޝިޕްމަންޓަކަށް އޯޑަރު ދިން ނަމަވެސް އެޑްވާންސްގެ ގޮތުގައި ދެއްކި 246،645 ޑޮލަރު ވަނީ ގެއްލިފަ. އެ މައްސަލަ އޭސީސީ އިން ދަނީ ތަހުގީގުކުރަމުން.
މޯލްޑިވް ގޭސްގެ އަބްދުالله މުހައްމަދު: މޯލްޑިވް ގޭސްއިން ގޭހުގެ ޝިޕްމަންޓަކަށް ދެއްކި އެޑްވާންސް ފައިސާތައް ވީނުވީއެއް ނޭނގި ގެއްލުނު މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ވަނީ ތަހުގީގުކުރަން ފަށާފަ | މޯލްޑިވް ގޭސް
މޯލްޑިވްސް ގޭސް ކުންފުނިން ގާބިލުކަން ނެތް ކުންފުންޏަކަށް 250،000 ޑޮލަރުގެ ގޭސް އޯޑަރު ދިނީ އެމްޑީގެ އިރުޝާދުގެ މަތިން ކަން ހާމަވެއްޖެ އެވެ.
ދައުރު ނޫހުން ހާމަކޮށްފައިވާ ގޮތުގައި 250،000 އެއްހާ ޑޮލަރު ގޭސް ކުންފުނިން ވަނީ ގެއްލިފަ އެވެ. އެއީ ބާޒާރުގެ އަގުން ބަލާ ނަމަ 5 މިލިއަނެއްހާ ރުފިޔާ އެވެ. އެ ފައިސާ ގެއްލުނީ ގޭސް ކުންފުނީގެ މެނޭޖިން ޑިރެކްޓަރު އެމްޑީ އަބްދުﷲ މުހައްމަދު ގެ އިރުޝާދަށް ނާގާބިލު ކުންފުންޏަަކަށް (ޖަކްސާ އެނަރޖީ ޓްރޭޑިންގ ކޮމްޕެނީ މޯލްޑިވްސް ގޭސް) އެ އޯޑަރު ދީފައި ވަނިކޮށެވެ.
އެ ނޫހުން ހާމަކޮށްފައިވާ ލިޔެކިޔުންތަކުން އިނގޭ ގޮތުން މޯލްޑިވްސް ގޭސް އިން އޮކްޓޯބަރު 2024 ގައި 800،000 ޑޮލަރުގެ ޝިޕްމަންޓަށް ވަނީ އޯޑަރ ދީފަ އެވެ. ނަމަވެސް އެ އޯޑަރ އަށް އެޑްވާންސް ފައިސާގެ ގޮތުގައި ދެއްކި 246،645 ޑޮލަރު ވަނީ ގެއްލިފަ އެވެ.
އެ ޝިޕްމަންޓު ގެ ވެންޑަރސް ރަޖިސްޓްރޭޝަނަށް މޯލްޑިވްސް ގޭސްގެ ގަވާއިދާއި އެއްގޮތަށް، ޓެކްސް ދައްކާ އަހަރީ އާމްދަނީ 5 މިލިއަން ޑޮލަރަށް ވުރެ މަތިވާން ޖެހެ އެވެ. ހަމައެހެންމެ ފާއިތުވި ދެ އަހަރުގެ އޯޑިޓް ފައިނޭންސް ސްޓޭޓްމަންޓް ވެސް ހުށަހަޅަން ޖެހެ އެވެ.
އެހެންނަމަ ވެސް ޖަކްސާ އެނަރޖީ ޓްރޭޑިންގ ކޮމްޕެނީ މޯލްޑިވްސް ގޭސްގެ ވެންޑަރ އެއްގެ ގޮތުގައި ރަޖިސްޓްރީ ކުރީ އެމްޑީގެ ހާއްސަ ހުއްދަ އަކާއި އެކުގަ އެވެ. ދުބާއީގައި ރަޖިސްޓްރީކޮށްފައިވާ އެ ކުންފުނިން 31 ޑިސެމްބަރު 2023ގެ ތާރީހުގައި ހުށަހެޅި ފައިނޭޝަނަލް ސްޓޭޓްމަންޓަށް ބަލާ ނަމަ އެ ކުންފުންޏަށް އެ އަހަރު އާމްދަނީގެ ގޮތުގައި ލިބުނީނީ 1.4 މިލިއަން ޑޮލަރެވެ.
އެ އަދަދަކީ މޯލްޑިވްސް ގޭސްގެ ޤަވާއިދުގައި ބުނާ މިންގަނޑު ހަމަވުމަށް 3.6 މިލިއަން ޑޮލަރު މަދު އަދަދެއްކަން ފާހަގަކޮށްލެވެ އެވެ. ހަމައެހެންމެ އެ އަހަރު އެ ކުންފުނީގެ ސާފު ފައިދާގެ ގޮތުގައި ލިބުނު އަދަދަކީ ވެސް 800،000 ޑޮލަރުގެ ޝިޕަމަންޓަކާ އެކަށީގެންވާ އަދަދެއް ނޫނެވެ.
މޯލްޑިވްސް ގޭސްއިން ގޭހުގެ ޝިޕްމަންޓަކަށް ދެއްކި އެޑްވާންސް ފައިސާތައް ވީނުވީއެއް ނޭނގި ގެއްލުނު މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ވަނީ ތަހުގީގުކުރަން ފަށާފަ އެވެ.
