ސައުދީ އަރަބިއްޔާގެ ޖިއްދާ ގައި ޓްރަމްޕް ބިނާ ކުރާ 1 ބިލިއަން ޑޮލަރުގެ ޕްލާޒާ މަޝްރޫއު ލޯންޗް ކޮށްފި

ދާރް ގްލޯބަލް އާއި ޓްރަމްޕް އޯގަނައިޒޭޝަން ގުޅިގެން ޖިއްދާ ގައި 1 ބިލިއަން ޑޮލަރުގެ ބިޔަ މަޝްރޫޢެއް އިފްތިތާޙްކޮށްފި އެވެ.

ޢިމާރާތްކުރުމުގެ ދާއިރާގައި ފާހަގަކޮށްލެވޭ ކުންފުންޏެއް ކަމަށްވާ ދާރް ގްލޯބަލް އާއި ޓްރަމްޕް އޯގަނައިޒޭޝަން ގުޅިގެން، 1 ބިލިއަން ޑޮލަރަށްވުރެ އަގުބޮޑު "ޓްރަމްޕް ޕްލާޒާ ޖިއްދާ" ރަސްމީކޮށް އިފްތިތާޙްކޮށްފި ކަމަށް ހާމަ ކުރީ އެ ކުންފުނިން ހޯމަ ދުވަހު ނެރުނު ބަޔާނެއްގަ އެވެ. މިއީ އެކި ބޭނުންތަކަށް ބޭނުންކުރެވޭ ގޮތަށް ފަރުމާކޮށްފައިވާ ބިޔަ މަޝްރޫޢެކެވެ.

ލަންޑަންގެ ސްޓޮކް އެކްސްޗޭންޖްގައި ލިސްޓުކޮށްފައިވާ ލަގްޒަރީ ޑިވެލޮޕަރ، ދާރް ގްލޯބަލް އާއި ޓްރަމްޕް އޯގަނައިޒޭޝަނާ ދެމެދު ސައުދީ އަރަބިއްޔާ ގައި ކުރިއަށްގެންދާ މިއީ ތިންވަނަ ބޮޑު މަޝްރޫޢެވެ. މީގެ ކުރިން 2024 ވަނަ އަހަރުގެ ޑިސެމްބަރު މަހު "ޓްރަމްޕް ޓަވަރު ޖިއްދާ" ވެސް ވަނީ އިފްތިތާޙްކޮށްފަ އެވެ.

ކިންގް ޢަބްދުލްޢަޒީޒް މަގުގައި ހުންނަ "އަމާޔާ" ތަރައްޤީކުރާ ސަރަޙައްދުގައި ބިނާކުރާ މި ޕްލާޒާ އަކީ މީހުން ދިރިއުޅޭ އެޕާޓްމަންޓްތަކާއި، ވިޔަފާރި މަރުކަޒުތަކުގެ އިތުރުން ޒަމާނީ ދިރިއުޅުމުގެ އެންމެހާ ޚިދުމަތްތައް އެއްފުރާޅެއްގެ ދަށުން ލިބޭނޭހެން ފަރުމާކޮށްފައިވާ ތަނެކެވެ.

"ޖިއްދާގެ އެންމެ ފުރިހަމަ މަރުކަޒު" ގެ ގޮތުގައި ސިފަކުރެވޭ މި މަޝްރޫޢުގައި މަތީ ފަންތީގެ އޮފީސްތަކާއި، އަގުބޮޑު ފިހާރަތަކާއި، ކެފޭ ރެސްޓޯރެންޓްތަކުގެ އިތުރުން "ޓްރަމްޕް" ބްރޭންޑުގެ ލަގްޒަރީ ޚާއްޞަ ކްލަބެއް ހިމެނެއެވެ. މި ހުރިހާ ބިނާތަކެއް ވެސް ފަރުމާކޮށްފައި ވަނީ މެދުގައި އޮންނަ ޚާއްޞަ ބަގީޗާއެއްގެ ވަށައިގެންނެވެ. މިއީ ބައިނަލްއަޤްވާމީ ފެންވަރުގެ ދިރިއުޅުމަކަށް ބޭނުންވާ ހުރިހާ ވަޞީލަތްތަކެއް ހިމެނޭހެން ބިނާކުރާ ސަރަހައްދެއް ކަމަށް ރިޕޯޓު ކޮށްފައިވެ އެވެ.

ޓްރަމްޕް އޯގަނައިޒޭޝަންގެ އެގްޒެކެޓިވް ވައިސް ޕްރެޒިޑެންޓް އެރިކް ޓްރަމްޕް ވިދާޅުވި ގޮތުގައި، މި މަޝްރޫ ޢަކީ ދުނިޔޭގެ ވިޔަފާރީގެ މައި މަރުކަޒެއްގެ ގޮތުގައި ޖިއްދާ ކުރިއަރަމުންދާ ކަމަށް އެ ކުންފުނިން ކުރާ އިތުބާރު ހާމަކޮށްދޭ ކަމެކެވެ. "ސައުދީ އަރަބިއްޔާ ގައި އަޅުގަނޑުމެންގެ މަސައްކަތްތައް ފުޅާކުރުމަކީ ދުނިޔޭގެ ފެންވަރުގެ ފަރުމާތަކަށާއި ފެންވަރު ރަނގަޅު މަސައްކަތްތަކަށް އަޅުގަނޑުމެން ދޭ ސަމާލުކަން ހާމަކޮށްދޭ ކަމެއް،" އޭނާ ވިދާޅުވިއެވެ.

ދާރް ގްލޯބަލްގެ ސީ.އީ.އޯ ޒިއާދު އަލް ޝާޢަރު ވިދާޅުވި ގޮތުގައި، މިއީ ސައުދީގައި އެ ކުންފުނިން ކުރިއަށްގެންދާ މަސައްކަތްތަކަށް ލިބުނު ވަރަށް ބޮޑު ކުރިއެރުމެކެވެ. "މިއީ ހަމައެކަނި ޢިމާރާތެއް ނޫން، މިއީ އެއް ތަނަކުން މަސައްކަތްކޮށް، ދިރިއުޅެ، ގުޅުންތައް ބަދަހިކުރަން ބޭނުންވާ ފަރާތްތަކަށް ޚާއްޞަކޮށްގެން ފަރުމާކުރެވިފައިވާ ފުރިހަމަ އަވަށެއް،" އޭނާ ފާހަގަކުރެއްވިއެވެ.