ސައުދީ އަރަބިއްޔާ އަށް ވަގަށް އެތެރެކުރަން އުޅުން 4.7 މިލިއަން އެމްފެޓަމިން ގުޅަ އަތުލައިގަނެފި
މި ތަކެތި އެތެރެ ކުރަން އުޅުނީ ދެލި ބަސްތާތަކެއްގެ ތެރޭގައި ވަރަށް ބޮޑަށް ފޮރުވައިގެން ޖިއްދާ އިސްލާމިކް ޕޯޓަށް ގެނައި ކާގޯ ޝިޕްމެންޓެއްގައި.
ޖިއްދާ އިސްލާމިކް ޕޯޓަށް ގެނައި ޝިޕްމަންޓެއްގެ ތެރޭގައި ފޮރުވައިގެން އެތެރެކުރަން އުޅުނު އެމްފެޓަމިން ގުޅަ | ސައުދީ ގެޒެޓް
ސައުދީ އަރަބިއްޔާ އަށް ވަގަށް އެތެރެކުރަން އުޅުނު މަސްތުވާތެކެތީގެ ބާވަތެއް ކަމަށްވާ 4.7 މިލިއަން އެމްފެޓަމިން ގުޅަ އަތުލައިގަނެފި އެވެ.
ސައުދީ އަރަބިއްޔާގެ ޒަކާތް، ޓެކްސް އަދި ކަސްޓަމްސް އޮތޯރިޓީ (ޒަޓްކާ) އިން ޖިއްދާ އިސްލާމިކް ޕޯޓަށް ގެނައި ޝިޕްމަންޓެއްގެ ތެރޭގައި ފޮރުވައިގެން އެތެރެކުރަން އުޅުނު 4,793,000 އެމްފެޓަމިން ގުޅަ އަތުލައިގަނެ، އެ ތަކެތި ސްމަގުލް ކުރުމަށް ކުރި މަސައްކަތް ނާކާމިޔާބުކޮށްލައިފި ކަމަށް ވަނީ ބުނެފައެވެ.
އެ އޮތޯރިޓީގެ ތަރުޖަމާނު ޙައްމޫދު އަލް-ޙަރްބީ ސައުދީ މީޑީއާ އަށް ވިދާޅުވި ގޮތުގައި، ދެލި (ޗާކޯލް) ކަމަށް ބުނެ އެތެރެކުރި މި ޝިޕްމަންޓް ކަސްޓަމްސްގެ އުސޫލުތަކުގެ ތެރެއިން ޒަމާނީ ސަލާމަތީ ވަސީލަތްތަކާއި ތަކެތި ދެނެގަންނަ ވަސީލަތްތައް (ކޭ-9) ބޭނުންކޮށްގެން ހިންގި އޮޕަރޭޝަނެއްގައި މި މަސްތުވާތަކެތި ފެނިފައި ވަނީ ދެލި ބަސްތާތަކުގެ ތެރޭގައި ވަރަށް ބޮޑަށް ފޮރުވާފައި ހުއްޓަ އެވެ.
އޭނާ އިތުރަށް ވިދާޅުވީ، މި ތަކެތި އަތުލައިގަތުމާ ގުޅިގެން، އެ ގައުމުގެ މަސްތުވާތަކެއްޗާ ބެހޭ ޖެނެރަލް ޑައިރެކްޓަރޭޓާ ގުޅިގެން ހިންގި ހަރަކާތްތަކުގެ ތެރެއިން، ސައުދީ އަރަބިއްޔާގެ ތެރެއިން މި ތަކެއްޗާ ހަވާލުވާން އައި މީހާ މިހާރު ހައްޔަރުކޮށްފައިވާ ކަމަށެވެ.
