ވައިޓް ހައުސްއަށް ޒިޔާރަތް ކުރެއްވި ސީރިއާގެ ފުރަތަމަ ރައީސް އަކަށް އަލް-ޝަރާ
އެމެރިކާގެ ޓްރެޝަރީ ޑިޕާޓްމަންޓުން ބުނީ ޓްރަމްޕާއި އަލް-ޝަރާއާ ބައްދަލުވުމާ ގުޅިގެން ސީޒަރ ގާނޫނުގެ ދަށުން އަޅާފައިވާ ދަތިކުރުމުގެ ފިޔަވަޅުތައް 180 ދުވަހަށް ސަސްޕެންޑް ކޮށްފައިވާ ކަމަށެވެ.
ސީރިއާގެ ރައީސް އަހުމަދު އަލް-ޝަރާއާ އެމެރިކާގެ ރައީސް ޑޮނަލްޑް ޓްރަމްޕް ވައިޓް ހައުސްގައި ބައްދަލުކުރައްވަނީ - ނޮވެމްބަރު 10، 2025
އެމެރިކާއަށް ކުރައްވާ ރަސްމީ ދަތުރުފުޅުގައި އެގައުމުގެ ރައީސް ޑޮނަލްޑް ޓްރަމްޕާއި ސީރިއާގެ ރައީސް އަހުމަދު އަލް-ޝަރާ ބައްދަލު ކުރައްވާ، ވައިޓް ހައުސްއަށް ޒިޔާރަތްކުރެއްވި ސީރިއާގެ ފުރަތަމަ ރައީސްގެ ގޮތުގައި އޭނާ ހިމެނިވަޑައިގެންފި އެވެ.
ސީރިއާގެ ރައީސް އަހުމަދު އަލް-ޝަރާ އާ ހޯމަ ދުވަހު ވައިޓް ހައުސްގައި އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރެއްވި އިރު، މިއީ 1946 ވަނަ އަހަރު ސީރިއާ އަށް މިނިވަން ލިބުނު ފަހުން ވައިޓް ހައުސްއަށް ވަޑައިގެންނެވި ސީރިއާގެ ފުރަތަމަ ލީޑަރެވެ.
ހޯމަ ދުވަހު އޯވަލް އޮފީހުގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ ސީރިއާ "ވަރަށް ކާމިޔާބު ގައުމަކަށް" ވާން ބޭނުންވާ ކަމަށާއި، ޝަރާ އަށް އެކަން ކުރެވޭނެ ކަމަށެވެ.
އެމެރިކާގެ ޓްރެޝަރީ ޑިޕާޓްމަންޓުން ބުނީ ޓްރަމްޕާއި އަލް-ޝަރާއާ ބައްދަލުވުމާ ގުޅިގެން ސީޒަރ ގާނޫނުގެ ދަށުން އަޅާފައިވާ ދަތިކުރުމުގެ ފިޔަވަޅުތައް 180 ދުވަހަށް ސަސްޕެންޑް ކޮށްފައިވާ ކަމަށެވެ. ސީޒަރ ގާނޫނުގެ ދަތިކުރުމުގެ ފިޔަވަޅުތަކަކީ ސޫރިޔާގެ ސަރުކާރާއި، ރަޝިޔާ އާއި އީރާން ފަދަ ޤައުމުތަކުން އެމީހުންގެ ޖަރީމާތައް ޖަވާބުދާރީ ކުރުވުމަށް އަޅާފައިވާ ދަތިރިކުރުމުގެ ފިޔަވަޅުތަކެކެވެ. މި ދަތިކުރުމުގެ ފިޔަވަޅުތަކުގެ ބޭނުމަކީ ހަނގުރާމައިގެ ޖަރީމާތަކުން ސަލާމަތްވުމަށްޓަކައި، ސީރިއާ ސަރުކާރާ ގުޅުން ބަދަހި ކުރުމަށް ބޭރުގެ އިންވެސްޓަރުން ހުރަސް އެޅުމެވެ.
ސީރިއާގެ ޕްރެޒިޑެންސީން ބުނީ އޯވަލް އޮފީހުގެ މަޝްވަރާތަކުގައި އެމެރިކާއާއި އާއި ސީރިއާ ދެމެދު އޮންނަ ދެގައުމުގެ ގުޅުން ބަދަހިކޮށް ތަރައްގީ ކުރެވޭނެ ގޮތްތައް ވެސް ފާހަގަކޮށްފައިވާ ކަމަށެވެ. އާންމު މަސްލަހަތު އޮންނަ ބައެއް ސަރަހައްދީ އަދި ބައިނަލްއަގުވާމީ މައްސަލަތަކާ ގުޅޭ ގޮތުން ވެސް މަޝްވަރާ ކުރެވުނު ކަމަށް ބަޔާނުގައިވެ އެވެ.
ވަކިން ނެރުނު ބަޔާނެއްގައި ސީރިއާގެ ފޮރިން މިނިސްޓްރީން ބުނީ ސީރިއާގެ ފޮރިން މިނިސްޓަރު އަސަދު އަލް-ޝައިބާނީ އެމެރިކާގެ ޚާރިޖީ ވަޒީރު މާކޯ ރޫބިއޯ އާއި ތުރުކީގެ ފޮރިން މިނިސްޓަރު ހަކާން ފިދާންއާ އެކު ވޮޝިންޓަންގައި ބައްދަލުވުމެއް ބާއްވާފައިވާ ކަމަށެވެ.
އެމީހުން އެއްބަސްވީ އެމެރިކާގެ ތާއީދު އޮންނަ ކުރުދީންގެ ބާރު އޮންނަ ސީރިއަން ޑިމޮކްރެޓިކް ފޯސަސް ސީރިއާ ސިފައިންގެ ތެރެއަށް ވައްދައިގެން ކުރިއަށް ދިއުމަށް ކަމަށް ވެސް މިނިސްޓްރީން އިތުރަށް ބުނެފައިވެ އެވެ.
ސީރިއާ އިން ދާދި ފަހުން އައިއެސް ބަލިކުރުމަށް ގްލޯބަލް ކޯލިޝަން އާއި އެކު ސިޔާސީ އެއްބާރުލުމުގެ އިއުލާނެއްގައި ސޮއިކޮށްފައިވާ ކަމަށް ސީރިއާގެ އިންފޮމޭޝަން މިނިސްޓަރު ވިދާޅުވި އެވެ. މި އެއްބަސްވުމަކީ ސިޔާސީ އެއްބަސްވުމެއް ކަމަށާއި މިހާތަނަށް އައިއިރު އަސްކަރީ އެއްވެސް ބައެއް ހިމެނޭ އެއްބަސްވުމެއް ނެތް ކަމަށް އޭނާ އިތުރަށް ވިދާޅުވި އެވެ.
އިންފޮމޭޝަން މިނިސްޓަރު އިތުރަށް ވިދާޅުވީ އިސްރާއީލާއެކު ސަލާމަތީ އިންތިޒާމުތަކެއް ހަމަޖައްސަން ޓްރަމްޕް ތާއީދު ކުރެއްވި ކަމަށާއި، އެމެރިކާގައި ހުންނަ ސީރިއާ އެމްބަސީ ރަސްމީކޮށް ހުޅުވާކަން އެމެރިކާއިން އިއުލާން ކުރައްވާފައިވާ ކަމަށެވެ.
ސީޒަރ ގާނޫނުގެ ދަތިކުރުމުގެ ފިޔަވަޅުތައް އުވާލުމާ ވަރަށް ބޮޑަށް ދެކޮޅު ހައްދަވާ ހައުސްގެ ފޮރިން އެފެއާޒް ކޮމިޓީގެ ޗެއާމަން ބްރައިއަން މާސްޓް އާދީއްތަ ދުވަހު އަލްޝަރާއާ ބައްދަލުކުރައްވާފައިވެ އެވެ. މާސްޓްގެ ސޮއި އަނބުރާ ގެންދަން ޖެހުނު ނަމަވެސް އޭނާ ވަނީ "އެންމެންނަށް ވެސް ސާފުވާން ޖެހޭ" ކަންބޮޑުވުންތަކެއް ފާހަގަކޮށްފަ އެވެ.
