މަނާ ބޭސްތަކާއެކު މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި ބިދޭސީއަކު ހައްޔަރުކޮށްފި
ސަފިކް 30 ދުވަހުގެ މުއްދަތަށް ބަންދަށް ލުމަށް ކްރިމިނަލް ކޯޓުން އަމުރުކޮށްފައިވޭ
މަސްތުވާތަކެތީގެ އޮޕަރޭޝަނެއްގައި ފުލުހުން ހަރަކާތްތެރިވަނީ
މަނާ ބޭސްތަކާއެކު މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި ބިދޭސީއަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ ބަންގުލަދޭޝް އަށް ނިސްބަތްވާ ސަފިކް (40އ) އެވެ. މި މައްސަލައިގައި އޭނާ ހައްޔަރުކޮށް 30 ދުވަހަށް ބަންދުކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ.
ފުލުހުން ބުނެފައިވަނީ އޭނާ ހުރި ކޮޓަރި ތެރެއިން ހާމައަށް މަނާ ބޭސްތަކަކާއި، ފޮއިލް ކޮޅަކާއި، އޭނާގެ ފޯނު މޭޒު މަތިން ފެނުނު ކަމަށާއި، މޭޒުގެ ދަމާވަތްގަނޑު ތެރެއިން ފެނުނު ސިގިރެޓް ފޮއްޓެއްގެ ތެރެއިން ގިނަ އަދަދެއްގެ މަޏާ ބޭސްތަކެއް ފެނިފައިވާ ކަމަށެވެ. އަދި ފުރަތަމަ ފަންގިފިލާގެ ސިޑިން އަރާއިރު ވާތްފަރާތު ދެވަނަ ކޮޓަރި ބަލާ ފާސްކުރި ކުރުމުން ކޮޓަރީގެ ފާރުގައި ހަރުކޮށްފައި ހުރި ހަރުމަތިން ނެގި ބާޒާރު ކޮތަޅެއްގެ ތެރެއިން ގިނަ އަދަދެއްގެ މަނާ ބޭސް ކަމަށް ޝައްކުކުރެވޭ ގުޅަތަކަކާއި 1 ރަބަރު ޕެކެޓް ފެނިފައިވާކަމަށާއި، އަދި މީނާގެ ކުޑަކަމުދާތަކެތި އެމްފިޓަމިން އަށް ޕޮޒިޓިވްވެފައިވާ ކަމަށް ފުލުހުން ބުނެފައިވެއެވެ.
ބަންދުގެ ބަޔާނުގެ ބުނެފައިވަނީ އޭނާ އަކީ އެތަނުގައި ދިރިއުޅޭ ފަރާތެއް ނޫން ކަމަށާއި އެތަނަށް ދިޔައީ ރޫމެއް ކުއްޔަން ނަގަން ކަމަށާއި، ނަމަވެސް އެތަނުގައި ކޮޓަރިއެއް ކުއްޔަށް ހިފައިގެން މަޑޫކޮށްފައި ނުވާކަމަށް ފާހަގަކޮށްފައިވެއެވެ. އަދި ސްޕޮންސަރގެ ފަރާތުން އޭނާ ގެ ބަދަލުވާން މަސައްކަތް ކުރާކަން އެނގޭ ލިޔުމެއް ވެސް ފޮނުވާފައިވާނެ ކަމަށް ބަޔާނުގައިވެއެވެ. ނަމަވެސް ފުލުހުން ހުށަހަޅާފައިވާ ހެކިވެރިއެއްގެ ބަޔާނުގައި އޭނާ އެތަނުން ކޮޓަރިއެއް ކުއްޔަށް ހިފާފައިވާކަން އެނގޭކަމަށް ބަޔާންކޮށްފައިވާ ކަމަށް އިންވެސްޓިގޭޝަން އޮފިސަރު ވަނީ ފާހަގަކޮށްފައެވެ.
މި މީހާ ބަންދު ކުރުމަށް އަމުރުކޮށްފައިވަނީ އޭނާގެ މައްޗަށް ތުހުމަތުކޮށްފައިވާ ކުށް އޭނާ ކުރިކަމަށް ތުހުމަތުކުރެވޭ އެކަށީގެންވާ މިންވަރުގެ ހެކި ގަރީނާ ހުށަހެޅިފައިވާތީ ކަމަށް ބުނެފައިވެއެވެ. އަދި ބަންދުން ދޫކޮށްލައިފިނަމަ މުޖްތަމައުގެ ސަލާމަތަށް ނުރައްކާވެދާނެ ކަމަށް ފެންނާތީ ބަންދުގައި ބަހައްޓަންޖެހޭ ހާލަތެއް އޮތް ކަމަށް އަމުރުގައި ބުނެފައިވެއެވެ.
