ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައާ ގުޅިގެން، ރަޝިޔާގެ ކަންބޮޑުވުންތައް އެމެރިކާގެ ރައީސް ޑޮނަލްޑް ޓްރަމްްޕްގެ ސަރުކާރުން އަހަމުން ގެންދަވާ ކަމަށް، ރަޝިޔާގެ ރައީސް ވުލަޑިމިއަރ ޕުޓިން ވިދާޅުވެއްޖެ އެވެ.

ޗައިނާ އަށް ކުރެއްވި ދަތުރުފުޅުގެ ތެރެގައި ވާހަކަ ދައްކަވަމުން ޕުޓިން ވިދާޅުވެފައި ވަނީ، އެމެރިކާ އާއި ރަޝިޔާއާ ދެމެދު މަޝްވަރާތައް ކުރެވޭ ކަމަށާއި، އެމެރިކާގެ ރައީސް ޓްރަމްޕްގެ ސަރުކާރުން ރަޝިޔާގެ އަޑު އަހާ ކަމަށެވެ. އަދި އެކަމުގައި ދެ ޤައުމުގެ ދެ މެދުަގައި އެއްބަސްވުމަކަށް ވާސިލުވެފައިވާ ކަމަށް ވެސް ޕުޓިން ވިދާޅުވި އެވެ.

އެ ދަތުރުފުޅުގެ ތެރެއިން ވާހަކަ ދައްކަވަމުން ޕުޓިން ވިދާޅުވެފައި ވަނީ، އެމެރިކާގެ ކުރީގެ ރައީސް ޖޯ ބައިޑަންގެ ސަރުކާރާ ޚިލާފަށް، މިހާރުގެ ރައީސް ޓްރަމްޕްގެ ސަރުކާރުން ރަޝިޔާ އަށް ކަންފަތް ދީފައިވާ ކަމަށެވެ. އެކަން ފާހަގަ ކުރައްވައި ޕުޓިން ވިދާޅުވީ އެއްބަސްވުން ވަރަށް ސާފުކޮށް ފެންނަން އޮތް ކަމަށާއި، ބިނާ ކުރަނިވި މަޝްވަރާތައް ކުރިއަށް ދާނެ ކަމުގެ އުންމީދު އޮތް ކަމަށެވެ.

ޕުޓިން މިފަދައިން ވާހަކަ ދައްކަވާފައި ވީ ނަމަވެސް، އެމެރިކާ އިން ހަނގުރާމަ ނިންމުމަށް ކުރަމުން އަންނަ މަސައްކަތުގައި ރަޝިޔާގެ ބައިވެރިވުން ކުޑަވުމާ ގުޅިގެން އެމެރިކާގެ ރައީސް ޓްރަމްޕް ވަނީ ހިތްހަމަ ނުޖެހުން ފާޅު ކުރައްވައިފަ އެވެ. އަދި ރަޝިޔާއާ ދެކޮޅަށް ހަރުކަށި ފިޔަވަޅު ތަކެއް އަޅުއްވާނެ ކަމުގެ އިންޒާރު ވެސް ޓްރަމްޕް ވަނީ ދެއްވައިފަ އެވެ.

ހުސްވި އޮގަސްޓު މަހުގެ ތެރޭގައި ޓްރަމްޕް ވަނީ، އެލަސްކާ ގައި ޕުޓިން އާ އެކު މަޝްވަރާ ކުރުންތައް ކުރިއަށް ގެންދަވައިފަ އެވެ. ޓްރަމްޕްގެ އެންމެ ބޮޑު އަމާޒަކީ، ގާތް ގަނޑަަކަށް ތިން އަހަރު ދުވަހަށް ދެމިގެންދާ މި ހަނގުރާމަ ނިންމުމެވެ. ނަމަވެސް، މިހާތަަނަށް ޓްރަމްޕް ކުރައްވަމުން އައި މަސަައްކަތުގައި އަލި މަގެއް ފެނިފައި ނުވެ އެވެ.

ޝަންހާއި ކޯޕަރޭޝަން އޯގަނައިޒޭޝަންގެ ސަމިޓްގައި ބައިވެރިވެ ވަޑައިގަތުމަށް ކުރެއްވި ދަތުރުފުޅުގައި ޕުޓިން ވަނީ، ޔުކްރެއިން ހަނގުތާމަ ނިންމުމަށް ކުރެވޭ މަސައްކަތުގައި ކުރިއެރުން ލިބިދާނެ ކަމުގެ އުންމީދު ފާޅު ކުރައްވައިފަ އެވެ. އަދި ޔުކްރެއިންގެ ސަލާމަތީ ގެރެންޓީތަކާ ގުޅޭ ގޮތުން އެއްބަސްވުމަކަށް ވާސިލުވުމުގެ ފުރުސަތު އޮތް ކަމަށް ވެސް ޕުޓިން ވިދާޅުވި އެވެ.

ޔުކްރެއިންގެ ހަނގުރާމައާ ގުޅޭ ގޮތުން ޕުޓިން އުންމީދީ ވާހަކަ ތަކެއް ދެއްކެވި ނަމަވެސް، ޔުކްރެއިން އިން ނޭޓޯއާ ގުޅުމަކީ ރަޝިޔާ އިން ޤަބޫލު ކުރާނެ ކަމެއް ނޫން ކަމަށް، މީގެ ކުރިން ވެސް ވިދާޅުވެފައިވާ ވިދާޅުވުން ޕުޓިން ތަކުރާރު ކުރެއްވި އެވެ.