ސަނީ އުމަރު ޖިންސީ ގޯނާ ކުރި ކުދިން ތިބި ގެއަށް ގެންދިއުމުން މައްސަލަ ހޫނުވެއްޖެ
ހޯމަ ދުވަހު ގެ މެންދުރު އެ އެޕާޓްމަންޓަށް ފުލުހުން ސަނީ އުމަރު ގެންގޮސްފައި ވަނީ، ފުލުހުންގެ ކާރެއްގަ އެވެ. އޭނާ ގޮވައިގެން އެ ގެއަށް ފުލުހުން ވަނުމާއެކު ގޭގެ ވެރިންނާއި ގޭގައި ދިރިއުޅޭ މީހުން ވަނީ ނުރުހުން ފާޅުކޮށްފަ.
ސަނީ އުމަރު ފުލުހުން ގެ ކާރަށް އެރުވުން - ގެންދިޔަ ވަގުތު ގޭތެރެއިން ފުލުހުންނާ ގޭގައި ދިރިއުޅެމުން ދިއަ ފަރާތްތަކާ ކޮންމެ ވެސް ވަރެއްގެ ކުރިމަތިލުންތަކެއް ހިނގި
ކުޑަކުދިންތަކަކަށް ޖިންސީ ގޯނާ ކުރި ކަމުގެ ތުހުމަތުގައި ހައްޔަރުކޮށް، ޝަރީއަތް ނިމެންދެން ބަންދުކޮށްފައި ހުރި ހުސައިން ސަނީ އުމަރު ދިރިއުޅުނު ހ. އަނދުންގެއަށް އޭނާ ގޮވައިގެން ގޮސް ފުލުހުން އެގެ ބަލައި ފާސްކޮށްފި އެވެ.
އިތުބާރުކުރެވޭ މަގާމެއްގައި ތިބި ކުދިންތަކަކާއެކު ޖިންސީ އަމަލެއް ހިންގި ކަމުގެ ތުހުމަތުގައި ސަނީ އުމަރު ހައްޔަރުކޮށް ޝަރީއަތް ނިމެންދެން ވަނީ ބަންދުކޮށްފަ އެވެ.
ހޯމަ ދުވަހު ގެ މެންދުރު އެ އެޕާޓްމަންޓަށް ފުލުހުން ސަނީ އުމަރު ގެންގޮސްފައި ވަނީ، ފުލުހުންގެ ކާރެއްގަ އެވެ. އޭނާ ގޮވައިގެން އެ ގެއަށް ފުލުހުން ވަނުމާއެކު ގޭގެ ވެރިންނާއި ގޭގައި ދިރިއުޅޭ މީހުން ވަނީ ނުރުހުން ފާޅުކޮށްފަ އެވެ.
އެޕާޓްމަންޓު ބަލައި ފާސްކުރުމަށްފަހު ފުލުހުން ވަނީ ސަނީ އުމަރު އަނބުރާ ގެންގޮސްފަ އެވެ. އޭނާ އެ ގެއަށް ގެނެސް އެ ގޭގައި ގިނަ އަދަދެއްގެ ފުލުހުން ވަނީ ހަރަކާތްތެރި ވެފަ އެވެ. އޭނާ ގެންދިޔަ ވަގުތު ވެސް ގޭތެރެއިން ފުލުހުންނާ ގޭގައި ދިރިއުޅެމުން ދިއަ ފަރާތްތަކާ ކޮންމެ ވެސް ވަރެއްގެ ކުރިމަތިލުންތަކެއް ހިނގާފައި ވެ އެވެ.
ރާއްޖެއެމްވީ އާ އެ ގެއިން ވާހަކަ ދެއްކި މީހަކު ބުނީ އެފަދަ ބޮޑު ކުށެއްގެ ތުހުމަތު ކުރެވޭ މީހަކު ގޭގައި ދިރިއުޅޭ ފަރާތަށް ވެސް އެންގުމެއް ނެތި، އަދި ސަނީ އުމަރު ޖިންސީ ގޯނާ ކުރި ކަމަށް ބުނާ ކުދިން ވެސް ތިބި ގެއަށް ގެނައުމަކީ ބަލައިގަނެވޭނެ ކަމެއް ނޫން ކަމަށެވެ.
ސަނީ އުމަރު އަށް ކުރެވެނީ އޭނާ ގެ އަންހެނުންގެ އާއިލާ އަށް ނިސްބަތްވާ ކުއްޖަކަށް ޖިންސީ ގޯނާ ކުރި ކަމުގެ ތުހުމަތެވެ. މީގެ އިތުރުން ވެސް އިތުރު ކުޑަކުދިންތަކަކަށް ޖިންސީ ގޯނާ ކުރިކަމުގެ ތުހުމަތު އޭނާ ގެ މައްޗަށް ކުރެވޭ އިރު، އޭގެ ތެރޭގައި 2 އަންހެން ކުދިންނާއި ފިރިހެން ކުއްޖަކު ހިމެނެ އެވެ.
ކުޑަކުދިންތަކަކަށް ޖިންސީ ގޯނާ ކުރިކަމަށް ތުހުމަތުކުރެވޭ ސަނީ އުމަރު، ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްސަ އުސޫލުތަކަކަށް އަމަލު ކުރުމުގެ ގާނޫނު ގެ 30 ވަނަ މާއްދާ އާއި، ގާނޫނު އަސާސީ ގެ 49 ވަނަ މާއްދާއަށް ރިއާޔަތް ކޮށް، ޝަރީއަތް ނިމެންދެން ބަންދުގައި ބެހެއްޓުމުގެ އަމުރެއް ނެރެދިނުމަށް ޕީޖީ އޮފީހުން ކްރިމިނަލް ކޯޓަށް ހުށަހެޅި އެވެ.
އެ ހުށަހެޅުމާއި ގުޅިގެން ހުކުރު ދުވަހު އެ ކޯޓުން ވަނީ އޭނާ ޝަރީއަތް ނިމެންދެން ބަންދުކުރުމަށް ނިންމާފަ އެވެ. މިކަމާއި ގުޅިގެން ސަނީގެ ވަކީލުންނަށް ގުޅުމަށް ރާއްޖެ އެމްވީ އިން ކުރި މަަސައްކަތް ކާމިޔާބުވެފަ އެއް ނުވެ އެވެ.
ސަނީ އުމަރުގެ މައްޗަށް ތުހުމަތުކުރެވޭ ކުޑަކުއްޖަކަށް ޖިންސީ ގޯނާކުރި މައްސަލައާ ގުޅިގެން އޭނާ ހައްޔަރު ކުރީ ޑިސެމްބަރު މަހު ކުރީކޮޅެވެ. އޭގެ ކުރިން، ކުޑަކުދިންތަކަކަށް ޖިންސީ ގޯނާ ކުރިކަމުގެ ތުހުމަތު ކުރެވި، އަދި ފިލައިގެން ދާން ދެ ފަހަރަށް އުޅުމުން ވެސް ފުލުހުން ހުރީ ސަނީ އުމަރު ހައްޔަރު ނުކޮށް ދޫކޮށްލާފަ އެވެ. އަދި އެއީ ކީއްވެގެންތޯ ކުރެވުނު ސުވާލަށް ފުލުހުން ޖަވާބެއް ވެސް ނުދެ އެވެ.
