'ޕަރީ' ގެ ޕޯސްޓަރ އަދި ޓީޒަރ ލޯންޗްކޮށްފި

މުނިފޫހިފިލުވުމުގެ ދާއިރާގައި ދިވެހިންގެ މެދުގައި ބޮޑު މަޤްބޫލްކަމެއް ހޯދާފައިވާ އަލީ ސީޒަންގެ، ސީޒަން އަލީ ޕްރޮޑަކްޝަން އިން ދިވެހިންނާއި ހަމައަށް ގެނެސްދޭ "ޕަރީ" ގެ ޕޯސްޓަރ އަދި ޓީޒަރ ލޯންޗްކޮށްފި އެވެ.

ދަ ގާރޑަން ރެސްޓޯރަންޓްގައި ބުދަ ދުވަހުގެ ރޭ ބޭއްވި އިވެންޓްގައި ވާހަކަދައްކަވަމުން ސީޒަން ބުނީ މިފިލްމުގެ އެންމެ ތަފާތު ކަމަކީ، ފިލްމު ގެނެސްދީފައި ހުންނާނީ ފަސް ގައުމުގެ ފަސް ބަހުރުވައިން ކަމަށާއި، ގިނަ ބަޔަކު އެކުގައި މަސައްކަތްކޮށްގެން މޮޅު ފިލްމެއް އުފެއްދިފައިވާ ކަމަށެވެ.

ޕަރީގެ ޕޯސްޓަރ ޑިޒައިން ކުރުމުގެ މުބާރާތެއް އޮގަސްޓް 27 ވަނަ ދުވަހު ހުޅުވާލާފައިވާއިރު، އެންމެ މޮޅު ފަސް ޕޯސްޓަރު ވަނީ ހޮވާފައެވެ. ޕަރީގެ ޓީމުން ޖަޖްކޮށްގެން ހޮވާ އެންމެ މޮޅު ފަސް ޕޯސްޓަރު، ޕަރީގެ ސޯޝަލް މީޑިއާ އެކައުންޓްތަކުގައި ޕޯސްޓްކޮށް ބެލުންތެރިންގެ ވޯޓަށް ހުޅުވާލާފައިވާއިރު، އެއްވަނައަށް އަންނަ ޕޯސްޓަރަކަށް ހޮވާނީ އެންމެ ގިނަ ލައިކްސް ލިބޭ ޕޯސްޓަރެއް ކަމަށް ޕަރީގެ ޓީމުން ބުނެއެވެ.

މިމުބާރާތުން އެއްވަނަ އަށް ހޮވޭ ޕޯސްޓަރަކަށް އިނާމެއްގެ ގޮތުގައި 10،000 ރުފިޔާ ދޭން ނިންމާފައިވާ ކަމަށް ޕަރީގެ ޓީމުން ބުނެއެވެ.

މިމުބާރާތުން އެއްވަނަ އަށް އަންނަ ޕޯސްޓަރު އިއުލާން ކުރުމާއި އިނާމް ދިނުން އޮންނާނީ ޑިސެމްބަރު 1، 2025 ވަނަ ދުވަހު، ޕަރީ ފިލްމުގެ ރަސްމީ ޓްރެއިލާ ލޯންޗް ކުރާ ހަފްލާގައެވެ.

ސީޒަންގެ އިތުރުން އަހުމަދު އަހުސަން އަކީ ވެސް ފިލްމްގެ ޕްރޮޑިއުސަރއެވެ.

ފިލްމްގެ ޕްރޮޑަކްޝަންގެ ވާހަކަ އާއި ހިސާބުން ދިވެހިންގެ ޝައުގުވެރިކަން މިފިލްމަށް ވަނީ ދަމައިގަނެފައެވެ. މި ފިލްމް ވެގެންދާނީ ދިވެހި ސިނަމާގައި ފާހަގަކޮށްލެވޭ ފިލްމަކަށެވެ.

އޭގެ ތެރެއިން އެއް ސަބަބަކީ މި ފިލްމަކީ ސީޒަން އާއި އަހުސަން ޕްރޮޑިއުސްކުރާ ފިލްމަކަށް ވެފައި މިއީ ސީޒަން ޑައިރެކްޓް ކުރާ ފިލްމެއް ދިވެހި ސިނަމާ އަށް ތިން އަހަރަށް ފަހު ގެނެސްދޭ ފިލްމަށް ވުމެވެ.

ފިލްމުގެ ކާސްޓުންނަކީ ފިލްމް ޝައުގުވެރިކޮށްދޭ އަނެއް ސަބަބެވެ. ފިލްމްގެ ކާސްޓުންގެ ތެރޭގައި ޝީލާ ނަޖީބް، ރިޝްމީ ރަމީޒް، އައިޝަތު ލަމްސާ ލަތީފް، ޖުމައްޔިލް ނިމާލް، މުހައްމަދު ނައުޝާދު އަލީގެ އިތުރުން އަލީ ސީޒަން ފަދަ މޫނުތައް ފާހަގަކޮށްލެވެއެވެ. ފިލްމްގެ ކާސްޓުންގެ ގޮތުގައި ތިބީ ދިވެހިންގެ ތަރުހީބު ލިބިފައިވާ ކުޅަދާނަ ފަންނާނުންކަމަށް ވުމާއި އެކު މި ކާސްޓާއި އެކު ޕަރީ ފިލްމް ދިވެހިންނާއި ހަމައަށް އަންނާނެ އިރެއްގެ އިންތިޒާރުގައި މިހާރުވެސް ސިނަމާ އަށް ލޯބިކުރާ އެތައް ބަޔަކު ތިބިކަން ފާހަގަކޮށްލެވެއެވެ.