ގޭންގެއް ކަމަށް ކަނޑައަޅަން މިހާތަނަށް ފޮނުވީ އެންމެ މައްސަލަ އެއް، އަތޮޅު ތެރެއިން ގޭންގެއްގެ ޝަރުތު ހަމަވާ ފަރާތްތައް ދަނީ ބަލަމުން: ފުލުހުން
ގޭންގް ކުށްތައް މަދުކުރުމަށް އާ ޤާނޫނާއެކު ފުލުހުން މަސައްކަތް ކުރަމުންދާ ކަމަށް ގޭންގް ކްރައިމް އެންފޯސްމެންޓް ޑިޕާޓްމެންޓުގެ އިސްވެރިޔާ ވިދާޅުވI. އާ ގޭންގް ޤާނޫނުގެ ދަށުން މިހާތަނަށް 7 މައްސަލަ ހުށަހަޅައި 11 މީހުން ހައްޔަރު ކޮށްފައިވޭ.
ފުލުހުން ބޭއްވި ނޫސްވެރިންގެ ބައްދަލުވުމުގެ ތެރެއިން
ގޭންގެއް ކަމަށް ކަނޑައަޅަން މިހާތަނަށް ފޮނުވީ އެންމެ މައްސަލަ އެއް ކަމަށާއި އަތޮޅު ތެރެއިން ގޭންގެއްގެ ޝަރުތު ހަމަވާ ފަރާތްތައް ދަނީ ބަލަމުން ކަމަށް ފުލުހުން ބުނެފި އެވެ.
ފުލުހުން އެެހެން ބުނެފައި ވަނީ އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގަ އެވެ. ގޭންގް ކްރައިމް އެންފޯސްމެންޓް ޑިޕާޓްމެންޓުގެ އިސްވެރިޔާ، ސުޕްރިޑެންޓެންޓް އޮފް ޕޮލިސް، އިސްހާގް އާދަމް ވަނީ އާ ޤާނޫނާއި އެކު ގޭންގް ކުށްތައް މަދު ކުރެވިފައިވާ ކަމަށް ވިދާޅުވެފަ އެވެ.
އޭނާ ވިދާޅުވީ ގޭންގް ކުށް ހުއްޓުވުމަށް ފުލުހުން ކުރަމުންދާ މަސައްކަތްތައް މައިގަނޑު ގޮތެއްގައި ބައްޓަން ކުރެވިފައިވަނީ ޕްރޯއެކްޓިވްކޮށް ތަހުގީގީ މަސައްކަތްތައް އަދި ޕްރޯއެކްޓިވް ޕްރިވެންޓިވް މަސައްކަތުގެ މައްޗަށް ކަމަށެެވެ. މިހާރު ވެސް ފުލުހުންނަށް ކުށް ކުރާ ގްރޫޕްތައް ހަރަކާތްތެރިވާ އަދި ކުށުގެ ރިކޯޑް އޮންނަ ފަރާތްތައް ޖަމާވާ ކަމަށް ފާހަގަކުރެވޭ ތަންތަން 24 ގަޑި އިރު ބަލާ ފާސްކުރާ ކަމަށް އޭނާ ވިދާޅުވި އެވެ. ހަމައެހެންމެ އިންޓެލިޖެންސް މައުލޫމާތުގެ އެހީގައި ފާހަގަ ކުރެވޭ ސޭފް ހައުސްތައް ކޯޓު އަމުރާއި އެކު ބަލާ ފާސްކުރާ ކަމަށް ވެސް އޭނާ ވަނީ ވިދާޅުވެފަ އެވެ.
އޭނާ ވަނީ ގޭންގު ކުށްތައް ހުއްޓުވުމަށް ފުލުހުން ކުރަމުންދާ މަސައްކަތަށް އަލިއަޅުވާލައްވާފަ އެވެ. އާ ގޭންގް ޤާނޫނުގެ ދަށުން މިހާތަނަށް ހުށަހެޅީ ޖުމްލަ 7 މައްސަލަ އެވެ. އަދި 11 މީހުން ހައްޔަރު ކުރި އިރު ފުލުހުންގެ ބަންދުގައި ތިބީ 2 މީހުންނެވެ. އަދި 2 މީހަކަށް ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް ވަނީ ފޮނުވާފަ އެވެ.
ގޭންގު ކުށްތައް ހުއްޓުވުމުގެ ޤާނޫނުގެ ދަށުން އިންތިޒާމުވެގެން ކުށެއް ކުރާ ގްރޫޕެއް އުފެއްދުމާއި ހިންގުމަކީ ވެސް ކުށެކެވެ. އެ ޤާނޫނު ބުނާގޮތުން އެފަދަ ގްރޫޕެއް އުފައްދައިފި ނަމަ ނުވަތަ ހިންގައިފި ނަމަ 25 އަހަރުގެ ޖަލު ހުކުމެއް އަންނާނެ އެވެ. ހަމައެހެންމެ 200،000 ރުފިޔާއާ 10 މިލިޔަން ރުފިޔާއާ ދެމެދުގެ އަދަދަކުން ޖޫރިމަނާ ވެސް ކުރެވޭނެ އެވެ. އެ ޤާނޫނު ބުނާ ގޮތުން މިބާވަތުގެ ކުށެއް ކުރަން އުޅެފި ނަމަ ނުވަތަ އެހީތެރިވެއްޖެ ހާލަތެއްގައި 18 އަހަރުގެ ޖަލު ހުކުމެއް އަންނާނެ އެވެ. އަދި 100،000 ރުފިޔާއާއި 5 މިލިޔަން ރުފިޔާ އާއި ދެމެދު ގެ އަދަދަކުން ޖޫރިމަނާ ކުރެވޭނެ އެވެ.
